sábado, 25 de maio de 2013

MAP sei dezenvolve Kadiuk no Ikan Nila

MAP sei dezenvolve Kadiuk no Ikan Nila

DÍLI—Atu dezenvolve agrikultura iha Timor Leste, Ministériu Agrikultura no Peskas liu husi Sekretária Estadu Peskas ba tinan 2013 sei fó apoiu ba Sentru Fini Haki’ak Fini Kadiuk no Ikan Bee-Moos hodi distritbui ba distritu seluk ne’ebé durante ne’e haki’ak iha Ermera, Bobonaro no Manufahi. “Ita sei dezenvolve mós ita nia sentru haki’ak kadiuk oan ne’ebé oras ne’e ita dezenvolve hela iha bee masin ne’ebá, oinsá maka ita atu oferese ba iha tinan ida ne’e rasik nune’e bele produs ikan ne’ebé oan atu nune’e ita bele distribui ba ita nia agrikultór sira ne’ebé iha interese atu haki’ak ikan no kadiuk oan,” Sekretáriu Estadu Peskas Rafael Pereira ba BT iha nia knaar fatin, Segunda foin lalais ne’e.
Nia hatutan, aleinde ne’e mós iha proposta adisionál ho montante osan mill 222 ne’ebé sei konsentra hodi dezenvole agrikultura ne’ebé sei konsentra iha Distritu Liquiça, Oe-Cusse no mós Metinaro. Sira mós sei mantein ho posizaun rekursu umanu tau didi’ak oinsá bele optimaliza para garantia sustentabilidade ba agrikultór sira. “Importante mós ba governu TL tomak atu tau atensaun ba tasi parte Com Tutuala no parte Atauro, Manatuto, tanba tuir peskiza ne’ebé maka parseiru dezenvolvementu sira halo hatudu katak fatin refere potensiál ba ikan no presiza governu fó protesaun atu nune’e ikan refere nasaun seluk labele kaer.
Parseiru dezenvolvementu sira mós fó apoiu ba Ministériu Agrikultura no Peskas (MAP) oinsá bele dezenvolve setór agrikultura inklui bee midar, ne’ebé apoiu husi Governu Nova Zelandia. Nune’e mós, Rafael informa, sira servisu hamutuk ho kompañia lokál sira ne’ebé dezenvolve setór agrikultura atu nune’e bele fó motivasaun ba agrikultór sira seluk, tanba ita nia nasaun mós infrenta hela malnutrisaun.
Nia esplika katak agora dadauk sira halo hela asesumentu ba iha área peska nia wainhira komunidade rasik iha rai no mós iha bee, maske ho orsamentu oituan maibé neneik-neneik sei la’o to’o iha ne’ebá. “En-prinsípiu iha kompañia ida rua maka servisu hamutuk ho Governu iha área peska. Soké dala ruma governu nia osan maka sei ki’ik, ne’ebe ita la’o neneik maibé importante maka iha interasaun entre kompañia lokál no mós ho ami kona-ba atividade peska no agrikultura,” Rafael tenik. (Fanus)

Sem comentários:

Enviar um comentário