segunda-feira, 21 de março de 2016

ACBN husu Median Line/linha klaran

ASSOCIAÇÃO DOS COMBANTENTES DA BRIGADA NEGRA (ACBN) KONA-BÁ Rezolusaun Parlamentu Nasional Númeru: 12/2014, Datada, 24 de Outubro de 2014 posted: Thursday, November 27, 2014 | 0 comments | 222 Views Depois de Parlamentu Nasional hatun Rezolusaun Númeru 12/2014, datada, 24 de Outubro de 2014, kona-bá Kriasaun Konselhu Ida ba delimitasaun definitiva kona-bá FRONTEIRAS MARÍTIMAS. Hanesan públiku tomak hatene katak, Prinsipiu Legal Internasionál tuir UNCLOS 1982, United Nations Convention on Law of the Sea/Konvensaun Nasoins Unidas kona-ba Lei Tasi nian fó sai katak atu sukat fronteira maritima entre nasaun rua tenke marka ho liña klaran (Median Line), metade entre tasi ibun, bainhira entre nasaun rua nia Zona Ekonómiku Eskluzivu nian kobre parsialmente (overlap). Infelizmente Governu Australia lakohi atu aplika uza prinsipiu ne’e iha Tasi Timor. Karik uza “Median Line”, 100% husi kampu gas no petróleu iha Bayu Undan, Greater Sunrise, Laminaria no Corallina sei sai parte husi territóriu Timor-Leste nian. Estadu Timor-Leste foin ratifika UNCLOS iha Janeiru 2013 no Governu Australia rasik dezde 1994, maibé unilateramente iha Marsu 2002 Australia retira ona hosi prosesu rezolusaun mandatóriu atu rezolve disputa fronteira maritima iha UNCLOS, fulan rua antes Timor-Leste restora nia independénsia, hodi hatudu katak Australia lakohi iha prosesu legal mandatóriu atu rezolve kestaun sira ne’e, ne’ebé Canberra prefere atu halo ida ne’e liu hosi negosiasaun. Istória no provas barak hatudu katak, dezde kleur ona Governu Australia iha interese boot atu haluan sira nia asesu ba kampu mina-rai no gas iha Tasi Timor, hetan porsaun boot liu duke ida ne’ebé sira merese tuir prinsipiu legal internasionál. Australia uza aproximasaun hanesan atu okupa territóriu tasi nasaun viziñu sira nian, uza negosiasaun bilateral ne’ebé fó valor ba nasaun ho podér ekonómiku no polítiku ne’ebé boot. Iha ezemplu barak hanesan: Zona Kooperasaun ka ZOCA (Zone of Cooperation) ZOCA ikus mai bolu JPDA, Greater Sunrise, Laminaria, Corallina no Buffalo, kazu Ashmore Reef, kazu fronteira ho Nova Zelándia no ho kazu disputa ho viziñu sira balu iha area Antartika. Ba kazu espesífiku ho Timor-Leste, maske Tratadu Tasi Timor ne’e asina iha 2002, maibé foin vigora iha 2003 bainhira Governu Australiano konsege obriga Timor-Leste hodi asina Akordu Unitizasaun Internasionál (IUA) atu fasilita dezenvolvimentu Greater Sunrise. Governu Australia hakarak duni atu dezenvolve Greater Sunrise, no sira hatene katak Estadu Timor-Leste nudár nasaun foun ho situasaun ekonómiku ne’ebé fraku, presiza duni Bayu Undan lalais atu finansia atividade Estadu nian. Nune’e Australia adia atu ratifika Tratadu Tasi Timor to’o Timor-Leste asina Akordu Unitizasaun Internasionál ba Greater Sunrise iha 2003. Iha tempu ne’ebá Governu Timor-Leste sente katak presaun Australia nian la justu no hanesan hanehan tiha Timor-Leste, no Timor-Leste rejeita atu ratifika ida ne’e. Ikus mai, Akordu Unitizasaun Internasionál ne’e ratifika duni liu husi Parlamentu Nasional iha tinan 2007, no iha tempu ne’ebé hanesan nasaun rua ne’e ratifika Tratadu CMATS (Certain Maritime Arrangements in the Timor Sea). Provizaun Tratadu CMATS ne’e fó abrigu katak sei laiha kualkér asaun hodi ko’alia kona-ba fronteira maritima durante periodu tinan 50 (Lima Nulu) nia laran. Maske, durasaun Tratadu ne’e bele habadak husi parte ida, husi nasaun rua ne’e bainhira órgaun reguladór hosi Australia no Timor-Leste la aprova Planu Dezenvolvimentu ba kampu Greater Sunrise nian iha tinan neen nia laran hafoin Tratadu CMATS vigora, katak 23 Fevreiru 2013. Kualkér tempu hafoin data ne’e, parte Timor-Leste ka Australia bele fó notifikasaun hodi husu atu termina tratadu ida ne’e, ne’ebé sei vigora durante fulan tolu nia laran. Maske Tratadu CMATS bele termina depende ba pozisaun kada nasaun rua ne’e atu halo renegosiasaun ba Tratadu CMATS. Konsidera-mos ba situasaun atual ne’ebé depois de Rezolusaun ne’e hatun husi Parlamentu Nasional, iha tentativa oin-oin HO MEIUS PROXY WAR hodi fó presaun direitamente ba V Governu Konstitusional ne’ebé lidera husi Maun Boot Kayrala Xanana Gusmão. Tentantiva hirak ne’ebé, detetadu hanesan: – Dezakredita, ofende no alegasaun ba imajem ka personajem lideransa Nasional ho ninia intensaun ATU OHO KARATER KA CHARRATER ASASSINATION ho ALEGASUN KORUPTOR!! – Hahu tenta atu SORAN ÓRGAUN SOBERANA TIMOR-LESTE, Entre Exekutivu-Judisiariu-Legislativu (Tribunais versus Governu versus Parlamentu); – Hahu tenta PROVOKA NO SORAN entre Entidade Religizioza hanesan “ISLAM Versus KATÓLIKA” nebé liu husi insulta iha asaun grafika “ANTI-MUSLIM” iha dalan públiku balun iha Kapital Dili laran. – Issu NINJA hahu moris ona iha komundadi nia le’et. Ho, akontesimentu hirak ne’ebé ami tenik iha leten. Ita tenki konfesa katak “NIA HUN NO NIA ABUT, LA SELUK-LA LET MAK KESTAUN RIKU SOI ITA NIA MINIARAI NE’EBÉ DADAUN NE’E ESTADU TIMOR-LESTE FOTI POZISAUN FIRME BA NINIA DIREITU SOBERANIA BA KALOHAN, RAI NO TASI NE’EBÉ TENKI TUIR TERMUS JURISDISAUN DIREITU INTERNASIONAL. Nuné, Ami ASSOCIAÇÃO DOS COMBANTENTES DA BRIGADA NEGRA, sente urjentimente, sem dúvidas, apio 100% ho karater Inkondisionalmente (tanpa syarat), ba Rezolusaun Parlamentu Nasional Númeru: 12/2014, datada, 24 de Outubro 2014, atu fó mandatu tomak ba V Governu Konstitusional hodi kria Konselhu Espesial ida hodi foti medida adekuada ba DELIMITASUAN DEFINITIVA BA FRONTEIRAS MARÍTIMAS, HODI: – Husu ba Sua Excelênsia Primeiru Ministru, Maun Boot Kayrala Xanana Gusmão atu aselera lalais exekusaun mandatu Rezolusaun Parlamentu Nasional Númeru: 12/2014, datada, 24 de Outubro 2014; – Apela ba Komunidade tomak no ba PARTIDUS POLÍTIKUS ne’ebé existe iha rai ida ne’e, atu MATAN MORIS NO NEON NAIN hodi KONDENA ba manobra GRUPU ORGANIZADU balun, ne’ebé hakarak soran ita ho meiu oin-oin no mos ho osan. Hahalok sira ne’e mos potensialmente bele hamosu sosiedade kaótiku, tan la-fiar malu no mos la-fiar ba Lideransa Nasional sira hodi fasilmente hamosu krize lideransa ne’ebe nu’udar odamatan ka konvite ba DEZINTEGRASAUN NACIONAL no INTERVENSAUN INTERNASIONAL hodi kria nafatin ESTADU EMERJENSIA, FUNU NO DEPENDENTE NAFATIN. – EXIZI no APELA ba Komunidade Timorense ne’ebé iha diaspora, hanesan iha; PORTUGAL, AUSTRALIA NO MOS IHA RAI LIUR SELUK, atu foti pozisaun ho “LIAN IDA BA ASAUN IDA” hodi DEFENDE ITA NIA SOBERANIA LINHA MÉDIA (median line), ne’ebé dadauk ne’e ita inferenta hasoru Nasaun Jigantes, hamutuk ho sira kompanhia Petróleo, tanba deit sira sente “karik matenek no mafiozu”, hodi sira uza instrumentos legais sira ne’ebé ita kompromete iha tempo difisil, atu explora ita nia mina, la selu tan ita nia taxa, maibe hakarak hatama tan ita ba Tribunal! Husu ba Estadu Timor-Leste ne’ebé reprezenta husi V Governu Konstitusional atu tetu katak; vantajen ba Estadu Timor-Leste ATU SAI HUSI TRATADU CMATS mak iha posibilidade diak liu atu negosia fila fali fronteira maritima hodi reklama ita nia direitu soberania ba Tasi Timor, inklui kampu Greater Sunrise, Area Dezenvolvimentu Petróleu Konjunta, kampu Laminaria no Corallina! – Apoio inkondisionalmente ba Kampaña ba Justisa Tasi Timor nian (Timor Sea Justice Campaign – TSJC) ne’ebé lidera husi Belun Tom Clarke ho ninia kompanheiru sira, Sidadaun Austaliano ne’ebé ho justu no solidaridade humanu entre povo Australiano ho povu Timorense, rekonhense katak; sira nian Governu Australiano tenki rekonhese ho omilde no justu ba saida-mak Direitu Teritorial Internasional haruka. No tenki rekonhese pozisaun politika “kan-ten” Governu Australiano ba teritori Timor-Leste nian! – Apoio inkondisionalmente ba pozisaun polítika Prezidente Repúblika Indonézia Sua Excelênsia, Ir. Joko Widodo hamutuk ho Povu Indonezia ne’ebé solidariza iha tempu defisil rezistentesia Timor-Leste nian, hodi hahu ona re-negosiasaun tuir Prinsipiu Legal Internasionál UNCLOS ba linha fronteira tasi entre Indonézia,Timor-Leste no Australia. Ikus mai, ami apelu ba ita tomak katak “Você nunca vai ganhar se você nunca começar” ka “Ita nunka bele manan wanhira ita la hahú komesa”… Nune, Mai ita tomak hahú, tamba ita nia vitoria certa, kestaun mak tempu deit….!!!! A Luta Continua, hanesan PALAVRA DE ORDEM iha Passadu, no mos sei relevante iha tempu prezente, hodi defende ita nia Soberania Nasional ne’ebé ita seidauk liberta mak ITA NIA TASI KETAN, TASI MANE, MAK TASI TIMOR!!!! Díli, 25 de Novembru 2014 Reprezentante ACBN, Prezidente ACBN : Nuno Corvelo “Laloran” Sekretáriu-Jeral ABCN : Nelson Correia “Maotula” Vogal ABCN : Constançio dos Santos “Tamalaka Aquita”

quarta-feira, 9 de março de 2016

Governu Konstitusionál VI simu pose iha loron 16 fulan fevereiru tinan 2015

PREÁMBULU Governu Konstitusionál VI simu pose iha loron 16 fulan fevereiru tinan 2015, tanba sirkunstánsia esepsionál sira ba remodelasaun profundu V Governu, ho baze ba-iha kompreensaun hotu-hotu nian ba nesesidade atu iha dinámika ne'ebé boot ba efisiénsia no efikásia iha Governu nia laran no hotu-hotu hamutuk ezekuta Planu Estratéjiku Dezenvolvimentu 2011-2030, no liuliu ba-iha prestasaun serbisu di'ak liu ba populasaun. Transformasaun estruturál ne'e atuhodi fó mós oportunidade ba líder jerasaun foun nian hodi governa, la'ós de'it ba nível ministériu nian maibé mós ba-iha nível xefia ba Governu tomak, hodi nune'e bele prepara jerasaun foun sira atubele dirije destinu Nasaun nian, liuhusi tranzisaun ne'ebé hakmatek no neineik. Formasaun Governu Konstitusionál VI hanesan akontesimentu istóriku ida ba-iha vida polítika Timor-Leste nian. Tranzisaun Governativa ne'e hanesan mós momentu importante ida ba-iha demokrasia Timor Leste nian, tanba tranzisaun ne'e kria ona atuhodi serbí interese nasionál aas liu interese polítika-partidáriu, hodi fó solusaun ba dezafiu sira ne'ebé país aprezenta. Governu ida ne'e halibur liu vontade, esperiénsia, talentu no kualifikasaun sira, ne'ebé sei fó forma no konteúdu ba kompromisu sira ne'ebé asume iha povu no eleitoradu sira nia oin, ne'ebé fó lejítimidade ba Governu Konstitusionál V no VI. Maske iha mandatu ida ho prazu ne'ebé limitadu, besik tinan rua ho balu, Governu haka'as –an atu dezenvolve país, ho hanoin hotu katak, dezafiu ne'ebé maka sei mosu mai la bele hasoru mesamesak de'it. Governu ida ne'e asume, dahuluk, kompromisu ida katak diálogu, konsertasaun no kooperasun institusionál entre ekipa governamentál, ka ekipa governamentál ho órgaun sira seluk Estadu nian, ne'e fundamentál tebes hodi bele alkansa objetivu dezenvolvimentu nasionál nian. Governu Konstitusionál VI asume kompromisu atu serbisu hamutuk ho organizasaun Sosiedade Sivil, Igreja Katólika no konfisaun relijiosa sira seluk, liu liu sidadaun timoroan sira hotu, – atu hotu-hotu sai ativu, partisipativu no responsável – nune'e hodi materializa valór no prinsípiu demokrátiku sira. Sai nu'udar prioridade fundamentál ida ba Governu ida ne'e nian, atu promove inklusaun no unidade nasionál, hodi investe no promove inisiativa organizasaun sosiedade sivil no meiu komunikasaun sosiál nian sira atu haburas liután moris demokrasia nian no hodi salvaguarda interese nasionál. Prosesu transformasaun país ne'e nian presiza hotu hotu nia partisipasaun. Hotu hotu iha direitu no devér sira no tan ne'e hotu-hotu tenke partisipa ho responsabilidade atu harii Estadu no Nasaun. Governu ida ne'e, hakarak estabelese parseria ne'ebé hotu hotu iha funsaun ida ativu liu ba-iha buat ida ne'ebé hanaran auditoria sosiál, ne'ebé indikadór asaun governativa nian sei haree ho detalle sira ho izensaun no responsabilide, atu nune'e ita hotu hamutuk bele hetan prestasaun servisu ne'ebé di'ak ba ita nia povu. Ukun liuhusi diálogu, aproveita krítika konstrutiva ne'ebé di'ak liu no korrije krítika ne'ebé la hatudu rezultadu pozitivu, ne'e sai hanesan kompromisu ne'ebé sei implementa ho susesu bainhira hetan partisipasaun husi ema hotu. Atu bele harii sosiedade ida ne'ebé inkluziva no tolerante, bainhira hotu hotu iha vontade atu partisipa ho responsabilidade ba-iha dezenvolvimentu nasionál. Nune'e mós, estrutura orgánika Governu Konstitusionál VI nian bazeia ba hanoin atu fó kontinuidade ba serbisu ne'ebé dezenvolve ona husi Governu sira uluk nian no fó onra ba serbisu ne'ebé sira husik hela. Hanoin fó kontinuidade ne'e sei reflete ba-iha kontinuasaun ba programa no polítika ne'ebé hahú no estabelese ona ba-iha Planu Estratejiku Dezenvolvimentu no Programa Governu Konstitusionál V nian. Sei ko'alia mós kona-ba dezafiu foun sira ne'ebé país hasoru, haree ba kresimentu ne'ebé lao lalais iha Timor-Leste no agora ezije atuasaun foun hodi asegura katak populasaun bele hetan proveitu husi dezenvolvimentu ekonómiku no sosiál ne'e. Parte importante no estratéjiku husi prosesu ne'e mak atu garante prestasaun servisu di'ak liu ba populsaun, inklui hadi'a kualidade obra sira nian no efikásia, efisiénsia no responsabilizasaun ba-iha utilizasaun rekursu públiku sira, hodi fó prioridade liu ba 1) reforma administrasaun públika nian, 2) armonizasaun no uniformizasaun ba lei no 3) reforma fiskál. Ajenda politika Governu Konstitusionál VI nian sei hala'o ho profisionalizmu, inovasaun no kapasidade, hodi kombate kultura burokratizasaun ne'ebé hala'o dadauk iha organizasaun públika sira, nune'e, Administrasaun Públika bele sai efikáz no efisiente liu. Ho razaun ida ne'e, ezekutivu foun ne'ebé lidera hosi Primeiru-Ministru no Ministru Koordenadór sira no kompostu hosi estrutura ida ne'ebé di'ak tebe-tebes tau atensaun liu ba prestasaun servisu públika ne'ebé di'ak liu no ba-iha responsabilidade no responsabilizasaun ne'ebé boot hodi bele hetan kordenasaun ba atividade governamentál ne'ebé di'ak liután. Ministru Koordenadór maka Ministru Estadu no Presidénsia Kosellu Ministrus nian ho Ministru na'in tolu seluk ho responsabilidade atu halo koordenasaun ba setór tolu ne'ebé importante tebes ba dezenvolvimentu nasionál – maka setór sosiál, setór ekonomiku no setór governasaun nian. Implmentasaun ba ami nia ajenda polítika bazeia ba estrutura no vizaun Planu Estratejiku Dezenvolvimentu 2011-2030 nian hanesan tuirmai ne'e: Dezenvolvimentu Setór Sosiál nian Dezenvolvimentu Setór Infra-estrutura nian Dezenvolvimentu Setór Ekonomiku nian Dezenvolvimentu Setór Governasaun nian Mai ita hotu hamutuk, iha tempu badak, médiu no naruk nia laran, to'o 2030, transforma Timor-Leste ne'ebé agora daudaun hanesan país ho rendimentu ki'ik liu, ba país ida ho rendimentu médiu-aas, ne'ebé hamutuk liu ba populasaun ne'ebé isin di'ak, matenek no seguru, no sosiedade ida ne'ebé moris di'ak no auto- sufisiente kona-ba aihan nian. Ita tenke haraik-an maibé ambisiozu, laran-luak maibé ezijente, no serbisu hamutuk ho respeitu ba ema seluk ninia hanoin hodi harii ita nia Nasaun. Bainhira ita Serbisu ho espíritu unidade no solidariedade, ita bele alkansa dezenvolvimentu ne'ebé justu no mantein nafatin. "Ida ba ema hotu, ema hotu ba ema ida" hanesan liafuan matadalan ba ezekutivu Governu Constitusional VI nian. "Ita hotu hamutuk bele halo di'ak liu", ne'e espiritu ne'ebé tenke lori ita nia sosiedade ba oin atu hamutuk harii ita nia Nasaun, hodi halo Timor-Leste no ita nia-an rasik tahan no bele enfrenta dezafiu sira agora no futuru nian. 1. DEZENVOLVIMENTO SETÓR SOSIÁL NIAN Kualkér Nasaun ninia rikusoin loloos maka ninia povu nia forsa. Maksimizasaun (fornese buat hotu-hotu hodi hadi'a) saúde, edukasaun no kualidade vida jerál timoroan sira nian sai esensiál tebes atuhodi harii sosiedade ida ne'ebé justu no progresivu. 1.1 Saúde Hadi'a prestasaun servisu ba-iha área saúde nian sai esensiál ba kualidade moris nian. Nune'e, Governu mantein vizaun katak "timoroan sira saudável ba-iha Timor Leste ida saudável", ne'ebé ninia mensajen mak atuhodi garante asesu ba servisu sira saúde nian no atendimentu médiku ne'ebé di'ak liu, nune'e mós atu regula sistema nasionál saúde, reforsa insfra-estrutura ho kualidade no rekursu umanu kulifikadu ba-iha área saúde nian. Governu sei halo lejislasaun foun hodibele regula servisu sira saúde nian ne'ebé hala'o liuhusi entidade privadu no asosiasaun sira ne'ebé hala'o atividade la'ós hodi buka lukru, atu, nune'e, promove kumprimentu ba prinsípiu deontologíku no norma sira ne'ebé bele aplika ba Servisu Nasionál Saúde nian, hodi kompleta no tuir polítika nasionál saúde nian. Ita sei estabelese prosedimentu operasionál padraun saúde no seguransa nian ba-iha servisu, no mós rejime selu seluk ne'ebé hanesan nian. Governu mós sei fortalese sistema saúde nian, liuhusi kapasitasaun ba instituisaun sira ne'ebé fó apoiu ba formasaun no jestaun servisu saúde nian, nune'e mós liuhusi prestasaun kuidadu ho kualidade, inklui fornese medikamentu esensiál sira, sistema transferénsia no emerjénsia médika, sistema diagnóstiku no fó raan, no mós liuhusi Institutu Nasionál Saúde nian. 1.1.1 Prestasaun Servisu integradu saúde komunitária nian Família timoroan barakliu ninia kontaktu dahuluk ho sistema saúde nian halai liu ba serbisu kuidadu saúde primáriu ne'ebé hala'o hosi estrutura Sentru Saúde iha kapitál Munisipiu nian sira, no ho referénsia ba Sentru Saúde Komunitária iha Postu Administrativu no Postu Saúde ne'ebé responsável ba prestasaun saúde komunitária iha Suku sira. Aleinde reforsa no hadi'a di'ak liután servisu saúde primária, Governu promete atu kria kondisaun ne'ebé maka presiza atu suku ne'ebé ho populasaun entre ema 1.500 to'o 2.000 ne'ebé hela iha área remota liu, bele hetan apoiu hosi Postu sira Saúde nian, hodi lori ba populasaun sira pakote ida ne'ebé kompostu hosi servisu promotivu, preventivu, kurativu no reabilitativu sira. Nune'e mós sei hala'o servisu integradu saúde komunitária lubun ida iha aldeia sira ne'ebé ema la'o ain lori oras ida resin hodi to'o ba iha Sentru ka Postu Saúde ne'ebé besik liu. Aldeia sira ne'e sei hetan benefísiu husi asisténsia regular, husi profisionál saúde nian ida ne'ebé tenke hela iha aldeia sira tuir kontratu, durante pelumenus tinan tolu, ho ekipamentu oi-oin saúde nian, transporte no insentivu sira. Ba ida ne'e, sei hala'o modelu jestaun ho kualidade nian, hadi'a asesu, atuhodi utiliza di'ak liután infrastrutura sira ne'ebé iha ona, aumenta kualifikasaun no formasaun ba profisionál saúde sira, habelar servisu espesializadu no espesialidade nian sira, sustentabilidade finanseira ba sistema nasionál saúde nian. Nune'e mós, tuir Planu Estratéjiku Nasionál Setór Saúde nian ba tinan 2011-2030, atu dezenvolve rekursu umanu sira ne'ebé presiza iha tempu médiu no naruk nia laran, atu suku sira ne'ebé ho populasaun 2.000 mai kraik, pelumenus iha médiku ida, enfermeiru rua, parteira rua no tékniku laboratóriu ida. Ho ida ne'e, governasaun ne'ebé tinan hirak tuirmai, Postu Saúde hotu- hotu, sei iha médiku ida, enfermeiru ida ka parteira ne'ebé hela dunik iha fatin ne'e, bainhira forma ona rekursu umanu sira mínimu ne'ebé presiza ba prestasaun servisu integradu saúde komunitária ne'ebé ho kualidade no bele hetan hosi kamada sosiedade hotu hotu. Ita sei hala'o Modelu Servisu Komunitáriu, hanesan purezemplu programa sira saúde famíliar no vizita uma-ba-uma, nune'e mós dezenvolve protokolu hodi halo tratamentu no deskobre moras iha tempu ne'ebé adekuadu. Matadalan ba Kuidadu Saúde Primária sei hala'o hotu, hodi fó kontinuidade ba serbisu ne'ebé hahú tiha ona husi Governu liubá. 1.1.2 Programa Xave Saúde Públika Progresu importante sira ne'ebé rejista ona ba-iha diminuisaun ba mortalidade materna, kosok- oan no labarik ne'ebé ho idade tinan lima mai kraik, tanba hadi'ak tiha ona asesu ba kuidadu pre-natál, asisténsia ba inan ne'ebé hahoris no halo asistênsia saúde ho kualidade bainhira liu tiha partu, nune'e mós servisu emerjénsia kona-ba tratamentu ba inan isin rua no partu sira no planeamentu famíliar. Iha área prestasaun servisu saúde nian, Governu haree liu atu hadi'a sistema nutrisaun, ba-iha saúde inan, kosok-oan no labarik nian, no hadi'a impaktu hosi moras no mate sira tanba moras hirak ne'ebé infeta no bele da'et ba ema seluk, inklui mear raan, HIV-SIDA no malária. Ba asuntu ne'e, Governu sei kontinua hadi'a asesu no kualidade servisu sira nutrisaun nian ba-iha instalasaun saúde no ba-iha komunidade sira, inklui hadi'a kualidade prestasaun servisu edukasaun nian, tratamentu no prevensaun ba malnutrisaun, halo kobertura vasinasaun ba labarik hasoru moras poliomielite, sarampu, mear raan, difteria no epatite. Ami sei fó kontinuidade ba programa sira sensibilizasaun no edukasaun nian ba populasaun kona-ba moras sira ne'ebé bele da'et ba ema seluk hanesan HIV-SIDA, mear raan, malária no moras seluk. Kona-ba kombate HIV-SIDA, sei dezenvolve programa ida, iha ámbitu Komisaun Nasionál Kombate HIV-SIDA nian, kona-ba reinsersaun no inkluzaun sosiál ba ema ne'ebé infetadu, inklui mós finalizasaun ba konstrusaun Uma Mahon (lokáliza iha Tibar) ba sidadaun sira ne'ebé infetadu husi moras ida ne'e. Sei fó mós atensaun espesiál ba moras krónika sira ne'ebá la da'et, ba vítima sira asidente no violénsia nian, no asesu ba tratamentu defisiénsia físika no moras mentál sira nian, liuhusi implementasaun ba estratéjia nasionál, hodi reforsa programa integradu atendimentu no referénsia saúde primária no ospitalar nian. Ami sei promove mós asesu ba instalasaun sira saúde nian hodi halo tratamentu ba moras mentál no moras bibi-maten, hodi fó atensaun liu ba formasaun profisionál saúde ba-iha Sentru no Postu Saúde sira atuhodi halo diagnóstiku no tratamentu ba pasiente sira ne'ebé sofre moras bibi-maten, hodi promove sensibilizasaun boot ba-iha komunidade sira atu nene'e sira bele komprende liután kona-ba saúde mentál. Governu sei kontinua kaer-metin aliserse atu Ospitál Nasionál Guido Valadares kontinua fó prestasaun kuidadu espesializadu no sub espesializadu sira, nune'e, neineik-neineik, bele mós fó apoiu ba prestasaun servisu saúde referensiadu iha país laran tomak. Servisu ba-iha Ospitál Nasionál Guido Valadares sei kontinua halo boot tan to'o 2017, atuhodi mós hamenus evakuasaun médika ba estranjeiru. Ami sei kontinua prosesu planeamentu nian atuhodi viabiliza dezenvolvimentu servisu onkolojia, kardiolojia no hemodiálize hodi halo mudansa ba-iha natureza epidemiolójika iha país ne'e, no ba-iha implikasaun finanseira ne'ebé aas tebes ba Estadu, bainhira pasiente no família sira halo evakuasaun médika ba rai li'ur. 1.1.3 Rekursu Umanu no Infra-estrutura sira Saúde nian Ami sei garante avansu sira ba-iha dezenvolvimentu inisiativa ba formasaun no jestaun ba rekursu umanu sira iha setór ne'e, inklui mós polítika ne'ebé atuhodi asegura rekrutamentu rekursu umanu sira ne'ebé adekuadu, hadi'a kondisaun servisu profisionál saúde nian sira, fiksa kuadru iha nível lokál, asesu ba pós-graduasaun, espesializasaun no formasaun kontínua. Sei dezenvolve padraun no kódigu konduta ba profisionál saúde nian sira, hodi haree liu ba aspetu tékniku, étiku no deontolójiku. Iha aspetu ida ne'e, sei estabelese Komisaun Téknika hodi halo Avaliasaun Profisionál ne'ebé ho mandatu atuhodi define kritériu espesífiku sira avaliasaun dezempeñu profisionál saúde nian sira no kontribui ba dezenvolvimentu kurríkulu sira formasaun no edukasaun ba-iha setór saúde nian, liuhusi kordenasaun ho Ministériu Edukasaun nian. Ikusmai, infra-estrutura bázika sira apoiu nian hodi hadi'ak asesu no kualidade servisu saúde nian tenke hetan atensaun maka'as, inklui reparasaun no reabilitasaun ba Ospitál sira, Sentru no Postu Saúde ne'ebé iha ona, ekipadu no iha asesu ba bee mós no saneamentu báziku. Sei kontinua hala'o serbisu ne'ebé hahú tiha ona ho jestaun ne'ebé apropriada ba transporte iha setór ne'e, hanesan ambulánsia no veíkulu sira ho multifunsaun, hodi hadi'a sistema teknolojia informasaun no komunikasaun nian ne'ebé maka presiza hodi halo kontinuasaun ba-iha objetivu sira iha setór ne'e nian. Objetivu ne'ebé trasa ona iha Planu Estratéjiku Dezenvolvimentu nian atu harii Postu Saúde ida iha Suku ida-idak, hamutuk Suku 442 iha territóriu laran, kontinua sai hanesan prioridade ba Governu ida ne'e, hodi konsidera katak to'o ohin loron iha ona Postu Saúde 272. Governu sei harii edifísiu foun ida ba Pediatria iha Ospitál Nasionál Guido Valadares ne'ebé sai sentru espesializadu no subespesializadu referénsia nasionál nian atuhodi fó atensaun liu ba tratamentu, diagnóstiku no terapia ba kosok-oan no labarik sira ne'ebé moras. 1.2 Edukasaun Edukasaun no formasaun profisionál ho kualidade sai estratéjiku no fundamentál tebes nu'udar enfluénsia boot ba dezenvolvimentu setór sira seluk nian. Populasaun timoroan liu 50% mak iha tinan 19 mai kraik, nune'e sai hanesan dezafiu boot ba governasaun ida ne'e, atu haree ba nesesidade no aspirasaun grupu sira ne'e nian ne'ebé maka reprezenta liu ita ninia sosiedade – hanesan labarik no joven sira. Nune'e, presiza atu hadi'a oportunidade moris ita nia povu nian atu ita nia labarik no jóven sira bele konkretiza sira nia kapasidade hotu-hotu. Nune'e mós importante tebe-tebes ba dezenvolvimentu sosiál no ba kresimentu ekonómiku Timor Leste nain, tanba ita bele hetan dezenvolvimentu no progresu de'it bainhira ita iha ona populasaun ne'ebé maka matenek no isin di'ak. Governu kontinua halo esforsu hodibele garante katak, labarik sira hotu bele frekuenta eskola no hetan ensinu ho kualidade, ne'ebé, fó ba sira koñesimentu no kualifikasaun ne'ebé sira presiza atu bele hetan moris ida ne'ebé saudável no produtiva no hodibele kontribui ho forma ativa ba dezenvolvimentu ita ninia Nasaun nian. Ba ida ne'e, Governu sei reforsa liután iha jestaun administrativa no finanseira ne'ebé di'ak, planeamentu adekuadu, koordenasaun institusionál, rekursu umanu, infra-estrutura ne'ebé hakarak ajusta ba nesesidade no investe iha meta sira ne'ebé atu hetan rezultadu sira atu nune'e bele presta servisu di'ak liu ba-iha setór edukasaun nian. Ba ida ne'e, Governu halo esforsu hodi aumenta kompetensia no kualifikasaun ba profesór sira, no mós fó formasaun ba dosente foun ho komponente pedagógika no sientífika ne'ebé forte, no asegura kondisaun adekuada hodi nune'e sira bele hala'o serbisu importante ne'e, hodi transmite koñesimentu ba ita nia labarik no jóven sira. Sai mós hanesan prioridade iha governasaun tinan rua ho balu oin mai, atu promove aprendizajen no hanorin lian portugés, no mós promove nia utilizasaun bainhira hanorin siénsia, matemátika no área sira seluk. 1.2.1 Ensinu pré-eskolár Ensinu pré-eskolár fó ba labarik sira, vantajen boot ba- iha sira nia estudu sira tuirmai, maibé iha Timor-Leste, sira ninia partisipasaun iha eskola maka ki'ik liu. Atu garante katak labarik timoroan sira bele hahú sira nia estudu ho maneira di'ak liu, Governu sei haboot no hadi'a di'ak liután servisu pré-eskolár sira hodi bele garante kuidadu no hanorin ba labarik hotu hotu, liuliu ba sira ne'ebé vulnerável no desfavoresidu liu. Aprova ona Politika Nasionál foun ba Edukasaun Pré-Eskolár no elabora no aprova tiha ona Kurríkulu Nasionál baze ba Edukasaun Pré-Eskolár, ami agora atu asegura ninia implementasaun no monitorizasaun no disponibiliza programa formasaun ba profesór sira, materiál sira ensinu no aprendizajen nian ho kualidade, tanba ne'e importante atu ensinu no aprendizajen hatán ba-iha nesesidade ne'ebé identifika ona no prátika di'ak liu ba-iha programa dezenvolvimentu infantil. Iha tempu tinan rua ho balu nia laran, Governu sei kontinua hala'o projetu konstrusaun pelumenus pré-eskola foun hamutuk 250 no sei halo rekuperasaun ba sala aula nian ne'ebé daudaun ne'e aat hotu, hodi nune'e bele iha sala aula nian ho númeru sufisiente ba-iha área hotu-hotu iha país laran tomak. Eskola no sala aula nian foun tenke ho ekipamentu sira. Governu sei kontinua dezenvolve programa formasaun abranjente ba profesór pré-eskolár sira, iha nível teóriku no prátiku, atu sira bele hetan formasaun iha metodolojia pedagójika apropriadu ba ensinu pré-eskolár. Objetivu ne'e atu garante katak, pelumenus, metade husi labarik timoroan hotu-hotu, husi tinan tolu to'o tinan lima, bele hetan ona ensinu pré-eskolár ho kualidade, no mós simu apoiu programa saúde foun no nutrisaun infantil espesifiku nian ba labarik sira ho idade hirak ne'e. Atuhodi hadi'a asesu ba edukasaun, ami sei kontinua asegura katak labarik sira iha baze ne'ebé metin koñesimentu nian, hanesan hatene lee no hakerek no hatene sura, tuir métodu ensinu no aprendizajen hodi fasilita sira domina lian ofisiál Timor-Leste nian. Governu sei hala'o akreditasaun ba eskola pré-eskolár ne'ebé iha ona no define kritériu mínimu funsionamentu nian no dezenvolve papél Asosiasaun Aman-Inan no Profesór sira nian hodi bele akompaña prosesu ensinu-aprendizajen, medida hirak ne'e sai hanesan objetivu hotu-hotu nian ba-iha ensinu báziku no sekundáriu. 1.2.2 Ensinu báziku Hahú husi tinan 1999, Timor Leste halo esforsu boot hodi hadi'a ensinu primáriu, ne'ebé daudaun abranje nível estudu nian to'o tinan sia, no hetan ona progresu di'ak, liuliu ba-iha formasaun profesór sira no ba-iha konstrusaun eskola sira. Maibé kontinua iha dezafiu barak, inklui labarik sira ne'ebé hahú sira nia estudu ho tinan boot liu, ida fali maka labarik sira ne'ebé husik hela eskola, ida tan maka labarik sira ne'ebé ho tinan barak atu halo hotu sira ninia estudu báziku no ikusliu maka sira ne'ebé husik hela eskola hosi parte labarik feto sira boot liu fali labarik mane sira. Ho kresimentu populasaun nian ne'ebé boot tebes mós sai hanesan preokupasaun iha futuru atu aumenta tan profesór, sala hanorin no despeza ho edukasaun. Governu sei kontinua reforsa sistema hodibele fó asesu ba ema hotu no fó garantia atu halo hotu ensinu báziku ida ho kualidade hosi labarik hotu-hotu. Iha tinan rua ho balu nia laran, Governu sei kontinua fó garantia : Labarik sira ne'ebé tama ba-iha 1o anu ensinu báziku, tuir idade ne'ebé determina tiha ona; Hamenus abandonu eskolár liuhusi hala'o projetu prevensaun nian ba sira ne'ebé husik eskola iha munisípiu hotu-hotu. Bele haree katak taxa abandonu eskolár sa'e maka'as husi pursentu 2.24 iha 2012 ba pursentu 2.3 iha 2013 ne'ebé daudaun ne'e labarik sira sei presiza iha média tinan 11.2 maka bele remata sira nia sestu anu eskolaridade. Hetan kompetensia mínimu hodi hatene lee-hakerek no sura, bazeia ba rekomendasaun no rezultadu sira husi "politika ensinu multilingue nian" liuhosi avaliasaun ba projetu pilotu ne'ebé hala'o hela. Implementasaun no monitorizasaun ba kurríkulu foun nasionál baze nian ba-iha 1o no 2o siklu ensinu báziku nian. Hadi'a kualidade sistema ensinu nian, inklui formasaun kontínua ba profesór sira, hadi'a kualidade konteúdu kurrikulár ne'ebé foun no adota ba metodolojia foun ne'ebé haree liu ba-iha alunu. Disponibiliza edifísiu no instalasaun eskola nian ne'ebé presiza no proponsionál ba kresimentu populasaun labarik sira nian ne'ebé iha idade eskolár, hodi kontinua implementa Programa Nasionál Reabilitasaun ba Patrimóniu Komunitáriu ne'ebé haree-liu ba iha infra-estrutura sira ne'ebé iha ona. Dezenvolvimentu no implementasaun kurríkulu eskolár kontestuál ida no pedagojia adekuadu, hodi implementa no monitoriza kurríkulu foun 1o no 2o siklu ensinu báziku nian no disponibiliza programa formasaun profesór nian sira, no materiál ensinu nian ho aprendizajen ne'ebé ho kualidade. Kontinua introdús mekanizmu foun jestaun eskolár nian, ne'ebé garante katak bele fornese edukasaun ho kualidade ho forma efisiente, asesível no sustentável. Abordajen ida ne'e inklui aspetu administrativu, finanseiru, akadémiku, lojístiku no rekursu umanu sira, nune'e mós envolvimentu profesór inan-aman no alunu sira nian. Halo avaliasaun ba mapa eskolár daudaun nian bazeia ba alunu sira ne'ebé iha interese atu tau naran ba eskola no distribuisaun populasionál. Implementa Programa Nasionál Transporte Eskolár nian, hodi garante ninia sustentabilidade. Introdús metodolojia foun ida formasaun nian ba profesór sira, ba-iha faze ida dahuluk nian, hodi fó formasaun lian portugés ba profesór sira. Dezenvolve sistema kolokasaun anuál profesór sira nian. Dezenvolve kursu ida formasaun espesífiku nian ba kuadru sira administrasaun no inspesaun eskolár nian. Habelar programa kona-ba to'os hodi hanorin alunu sira iha eskola. Harii Fundu Espesiál Merenda Eskolár nian, hodi integra ba iha programa ida ne'e hamutuk ho programa governamentál seluk, inklui Loja Povu nian no Koperativa sira. Fó-sai programa ho karáter edukativu, ne'ebé prodús husi Ministériu Edukasaun ne'ebé fó- sai loron-koron. Promove kriasaun biblioteka Munisípiu sira, fornese livrus ho kuantidade boot. Estabelese rede komunikasaun ba-iha eskola bázika sentrál hamutuk 202, liuhusi rede internet no telekonferénsia. 1.2.3 Ensinu sekundáriu Governu sei garante katak, alunu hotu hotu ne'ebé konklui ona ensinu báziku, sei iha asesu ba ensinu sekundáriu. Ba ida ne'e, presiza aumenta tan asesu ba ensinu sekundáriu liuhusi fornese infra-estrutura adekuada, formasaun ba profesór sira iha eskola sekundáriu sira no adota kurríkulu sira ne'ebé adekuadu, hodi hatán ba nesesidade dezenvolvimentu país nian, la'ós de'it atu garante asesu hodi fasilita merkadu servisu nian maibé mós atu liuliu motiva alunu sira hodi kontinua ho sira ninia estudu superiór. Ensinu sekundáriu iha Timor-Leste fahe ba eskola sekundária jerál no eskola sekundáriu tékniku. Ensinu sekundáriu jerál atuhodi prepara alunu sira hodi bá kontinua iha ensinu superiór, maibé ensinu sekundáriu tékniku atuhodi prepara alunu sira hodi bele tama ba iha merkadu serbisu nian, no hodi mós bele hetan asesu ba ensinu superiór tékniku no ensinu universitáriu. Atu bele atinje meta sira ne'e, Governu sei kontinua : Aumenta tan kapasidade eskola sekundáriu sira nian atuhodi bele simu númeru ida alunu sira nian ne'ebé boot liu, mai husi sira ne'ebé konklui ona ensinu báziku, hodi haboot liután sistema ensinu sekundáriu tékniku-vokasionál iha país nia laran tomak. Kontinua implementa programa ida kona-ba infra-estrutura hodi harii eskola modernu sira tuir padraun ne'ebé estabelese tiha ona. Hahú programa ida kona-ba Sentru Tékniku Exselensia nian (sentru formasaun profisionál), ba área ekonomia, agrikultura no enjeñeria, no mós ba kursu ne'ebé relasiona ho setór serbisu nian, turizmu no otelaria. Implementa no monitoriza kurríkulu foun ensinu sekundáriu jerál no tékniku-vokasionál. Hadi'a kualidade hanorin nian ho rekezitu abranjente kona-ba formasaun no kualifikasaun dosente sira nian liuhusi introdusaun metodolojia foun sira ba-iha formasaun dosente, no ba-iha sira nia formasaun kontínua. Dezenvolve no implementa sistema ida administrasaun no jestaun eskolár nian ne'ebé orienta ba-iha eskola hirak ne'e rasik. Dezenvolve sistema ESTV – Eskola Sekundáriu Tékniku-Vokasonal – hodi kria saída profisionál ba estudante sira ensinu sekundáriu nian, maibé mós liuhusi serbisu hamutuk iha setór estratéjiku dezenvolvimentu nian (agrikultura, peska, turizmu no enerjia). Kria laboratóriu prátika kurríikulár nian ba-iha eskola sekundária sira. Introdús mekanizmu foun jestaun nian hodi garante katak iha Eskola Sekundária ida-idak iha manuál no materiál didátiku nesesáriu no adekuadu. Insentiva hanorin kompeténsia transversál empreendedorizmu no kooperativizmu nian. Halo auditoria esterna ba fundasaun sira ne'ebé mak utiliza transferénsia públika sira. Promove kriasaun asosiasaun eskola privadu sira nian. Hala'o sertame iha nível nasionál hodi halo avaliasaun ba estudante ne'ebé iha dezenpeñu eskolár di'ak liu. (kadi kakutak) Dezenvolve kooperasaun ida ativa ho Igreja Katólika no konfisaun relijioza sira seluk hodi hadi'a liután hanorin Relijiaun, Etika no Moral nian. 1.2.4 Ensinu rekorrente Ensinu rekorrente destina ba ema ne'ebé ho idade boot liu, ne'ebé laiha oportunidade atu frekuenta eskola iha idade eskolár. Ensinu rekorrente inklui ba-iha programa nasionál alfabetizasaun, kursu pos-alfabetizasaun no programa ensinu báziku no ekivalénsia nian. Governu servisu ho hanoin ida atu halakon analfabetizmu (la hatene lee no hakerek) to'o 2015. To'o ohin loron, estudante hamutuk 6.390 mak konklui ona kursu pos-alfabetizasaun nian. Iha tinan 2015 sei halo levantamentu ida ba dadus espesífiku ba ensinu rekorrente hodi nune'e bele halo avaliasaun ba progresu ne'ebé hetan husi kampaña nasionál alfabetizasaun nian. Governu prevee katak to'o 2017 iha tan besik ema nain 15.000 maka sei partisipa iha kursu pos-alfabetizasaun nian. Governu mós sei kontinua hadi'a Programa Nasionál Ekivalénsia nian ba ensinu báziku no ekivalénsia ho konsepsaun no implementasaun ba kurríkulu ida ne'ebé ho kualidade no sei mantein objetivu ida ne'e ba-iha tinan hirak oinmai. Governu sei kontinua ho meta kona-ba estabelesimentu Sentru Komunitáriu Aprendizajen nian, liuhusi servisu hamutuk ho Banku Mundiál, no ho UNESCO ne'ebé prevee iha ona Sentru Komunitáriu Aprendizajen hamutuk 16, ne'ebé 10 funsiona tiha ona no sei identifika no estabelese 6 sira seluk. Parte husi projetu ne'e inklui atu elabora projetu legál, ne'ebé regula ensinu rekorrente no regulasaun ekivalénsia nian entre Programa Ensinu Rekorrente no Ensinu Formál, ho introdusaun mekanizmu tranzisaun adekuadu entre ensinu formál no ensinu rekorrente. 1.2.5 Ensinu superiór Ensinu superiór ida ne'ebé forte ne'e fundamentál atuhodi harii ita nia rekursu umanu no asegura ita nia dezenvolvimentu nasionál. Governu sei promove setór politékniku no universitáriu ne'ebé efikás hodi fó oportunidade ba ita nia povu nia oan sira, hodi hetan ensinu ho kualidade no partisipa ba-iha konstrusaun ita nia rain nian. Hodi bele atinje meta sira ne'e iha tinan hirak oinmai, Governu sei : Implementa padraun no kritéria sira ne'ebé bele garante kualidade ensinu superiór nian, garante rejistu hotu-hotu kualifikasaun nasionál ba-iha Kuadru Nasionál Kualifikasaun nian sira. Kontinua dezenvolve no apoia Ajénsia Nasionál Avaliasaun no Akreditasaun Akademika (ANAAA) nian, ne'ebé responsável hodi determina padraun no kritériu sira ne'ebé bele garante kualidade ensinu superiór nian. Kontinua promove parseria ho instituisaun sira ensinu superiór nian. Kontinua dezenvolve sistema ida armoniozu no efikáz hodi koordena intervensaun Governu nian ho Instituisaun sira Ensinu Superiór hotu hotu. Estabelese Institutu Superiór Politékniku tolu, nune'e mós harii Akademia Peska nian. Implementa sistema ida metin hodi bele garante kualidade, ho rejistu ba kualifikasaun nasionál hotu hotu ba-iha Kuadru Nasionál Kualifikasaun nian. Kontinua reforsa kualidade ensinu ba-iha UNTL. Harii kompleksu ida modernu ba Fakuldade Engeñaria, iha Hera. Dezenvolve no fó apoiu ba atividade sira Institutu Nasionál Siénsia no Teknolojia nian, hodi dezenvolve estudu sira investigasaun no análize nian ba siénsia sira ne'ebé aplika tiha ona. Promove ligasaun entre Ensinu Sekundáriu Tékniku-Vokasionál no Ensinu Superiór Tékniku. Dezenvolve Institutu Formasaun Dosente no Profisionál Edukasaun (INFORDEPE) nian ne'ebé haree-liu ba formasaun kontínua profesór sira nian. Regulamenta rejime ekivalénsia grau akadémiku sira nian no abilitasaun sira seluk kursu nasionál sira nian. Determina polítika "Ensinu à distansia ( hanorin la'ós iha universidade nia laran)", liuhusi servisu hamutuk ho SEFOPE. Dezenvolve biblioteka ida "online". Promove partisipasaun autoridade nasionál sira nian ba-iha atividade akademika no eskolár iha nivel hotu hotu. Dezenvolve polítika ida kona-ba kolokasaun kuadru sira kualifikadu nian ba-iha área sira remota nu'udar ajente dinamizadór sistema edukativu nian. 1.3 Formasaun Profisionál no Empregu Aumenta kualifikasaun profisionál povu timoroan sira nian, ne'e esensiál tebes ba dezenvolvimentu sosiál no ekonómiku Nasaun nian, no atuhodi kria serbisu ne'ebé merese atu hetan.Timor-Leste hasoru kondisionalizmu sira ne'ebé krítiku tebes iha nível rekursu umanu nian atu bele serbisu ba-iha setór privadu, ka ba-iha prestasaun serbisu administrasaun públika Estadu nian, liuliu, iha setór prinsipál sira hanesan saúde no edukasaun nian. Atu ita nia Nasaun bele dezenvolve ho di'ak, presiza fó resposta urjente ba kualifikasaun ne'ebé menuz, liuliu kona-ba jóven, dezenpregadu no ba populasaun sira zona rurál nian sira. Kualifikasaun sira ne'e importante tebes atuhodi konkretiza ita nia objetivu hodi fasilita asesu timoroan hotu hotu nian ba merkadu serbisu, ba aumentu rendimentu per kapita, no atuhodi kontribui dunik ba-iha prosesu konstrusaun nasionál. Nune'e mós importante tebes fó oportunidade hanesan ba feto sira iha parte edukasaun no formasaun profisionál, nune'e mós atu sira bele tama ba-iha merkadu serbisu nian no kontribui ba dezenvolvimentu nasionál. Iha tinan hirak liubá, hetan ona progresu ne'ebé iha signifikadu tebes hodi harii sistema ida formasaun modernu nian iha Timor-Leste. Ita iha ona Kuadru Nasionál Kualifikasaun sira nia, ne'ebé prevee kualifikasaun sira ba formasaun ne'ebé hetan akreditasaun no ami estabelese hela ona mós subkomisaun sira fomasaun nian iha indústria prinsipál ida-idak. Halo tiha ona planu ida kona-ba Formasaun no Edukasaun Téknika no Profisionál ba Timor-Leste, ne'ebé implementa ona iha tinan 2012, atuhodi orienta no dezenvolve setor ne'e. Sistema formasaun ne'ebé hala'o hela ne'e sei fó kualifikasaun ba ita nia povu hodi aproveita oportunidade sira ba-iha indústria minarai no gás, turizmu no ospitalidade, agrikultura, konstrusaun sivil, marítima no automotora nian. Formasaun foun ne'e sei ajuda mós ema ne'ebé maka la hela iha Dili, no liuliu sira ne'ebé hela iha área remota, atu bele kria empreza foun no negosiu sira. Atudodi kontinua aproveita aliserse di'ak hirak ne'e, ita nia sistema formasaun tenke konta mós ho rekursu ne'ebé bele forma forsa ida traballu nian ne'ebé iha kualifikasaun no promove asesu ba merkadu traballu nian. Governu sei kontinua asegura lideransa ne'ebé maka presiza ba-iha dezenvolvimentu kualifikasaun sira país nian no atua iha área fundamentál oin- oin, inklui : Sistema nasionál ba estájio sira, ho apoiu Konsellu Nasionál Kualifikasaun, Empregu no Produtividade nian, hodi tau alunu sira atuhodi hala'o estájiu ba-iha empreza sira no insentiva beibeik empreza partisipante sira kona ba programa Governu nian relasiona ho dezenvolvimentu forsa traballu ne'ebé iha kualifikasaun. Apoiu ba sistema formasaun nian ne'ebé enkoraja atu fó formasaun kualidade nian husi parte prestadór sira husi Governu , indústria, komunidade no la'ós hosi Governu ne'ebé hetan akreditasaun, no Haboot liután padraun nasionál kualifikasaun nian hodi bele inklui okupasaun prinsipál hotu-hotu no garante kurríkulu nasionál no materiál sira ba programa sira formasaun nian ne'ebé rejista tiha ona. 1.3.1 Kompromisu nasionál ho formasaun Governu implementa ona Kompromisu Nasionál ho Formasaun ne'ebé ninia pakote hetan ona aprovasaun husi Parlamentu Nasionál, hodi garante katak, to'o tinan 2015 nia rohan, alunu 50% husi sira ne'ebé husik hela sira nia eskola ka hakotu ona sira nia estudu no la hetan empregu, sira sei iha asesu ba programa ida formasaun nian ne'ebé hetan akreditasaun no finansiamentu. Programa ne'e hahú ona iha tinan 2013, ho pozisaun hamutuk 2.500, hodi forma perkursu ida ba alunu sira ne'ebé presiza hetan formasaun hodi bele partisipa iha merkadu serbisu nian ka hodi hahú sira nia negósiu rasik. Governu sei asegura katak, mane ho feto hetan asesu hanesan ba formasaun ne'e. Nune'e, Governu sei asegura katak mane no fetu sira hetan asesu hanesan ba formasaun ne'e. Nune'e, Governu sei kontinua nafatin programa formasaun profisionál nian, hodi garante nune'e média ida pozisaun formasaun nian hamutuk 2.500 ba tinan ida. Kompromisu Nasionál ho Formasaun iha aspetu rua : Billete Formasaun Nasionál nian ne'ebé fó formasaun ho finansiamentu durante tinan ida ne'ebé organiza hosi organizasaun ida formasaun ne'ebé hetan akreditasaun nian ba-iha sala ka ofisina ida. Alunu sira ne'e mós sei hetan kolokasaun ba-iha empreza lokál ida, atuhodi hetan esperiénsia servisu nian maibé la hetan saláriu. Programa Nasionál Estájiu nian fó ba alunu sira aprendizajen no esperiénsia teoria-prátika ba-iha indústria lokál sira. Ida ne'e bele introdús formasaun prátika ba-iha indústria timor nian, ne'ebé kria iha tempu hanesan formandu sira bele tama ona ba-iha merkadu traballu. Graduadu hotu-hotu ne'ebé iha aproveitamentu husi Programa Nasionál Estájiu nian, sei simu sertifikadu nasionál kualifikasaun nian. 1.3.2 Polítika nasionál ba konteúdu laborál Governu sei kontinua implementa Politika Nasionál Konteúdu Laborál nian ne'ebé estabelese rekizitu ba empregu no formasaun timoroan sira nian liuhusi projetu nasionál sira. Politika Nasionál Konteúdu Laborál nian sei kontinua ezije ba empreza boboot hotu-hotu, atu garante persentajen ki'ik ida kona-ba valór "maundobra- kolen badai'in" nian, ba-iha projetu prinsipál hotu hotu iha Timor-Leste, hodi kontribui ba empregu ka formasaun akreditada sidadaun timoroan sira nian. Timor-Leste sei kontinua simu empreza internasionál sira nu'udar mamaluk (hala'o knaar-lisuk) ba-iha dezenvolvimentu Nasaun nian, katak, Politika Nasionál Konteúdu Laborál nian sei kontinua ho aplikasaun ba regulamentu sira ne'ebé estabelese tiha ona no justu ba ita nia mamaluk sira hotu. Polítika ida ne'e aplika ba empreza internasionál sira ne'ebé atu hala'o serbisu iha Timor-Leste, no kontratu governamentál hotu-hotu no implementa ona tuir konsulta ne'ebé hala'o tiha ona ho Kámara Komérsiu no Indústria Timor-Leste nian, ho Konsellu Nasionál Kualifikasaun, Empregu no Produtividade nian no ho Sosiedade Sivil. Governu sei kontinua promove dezenvolvimentu no kumprimentu ba norma sira kona-ba kondisaun servisu, prevensaun ba risku profisionál, kolokasaun no protesaun empregu nian, liuhusi Inspesaun Jerál ba Traballu, nu'udar entidade públika, ho papél esensiál ba-iha regularizasaun ba aspetu esensiál sira merkadu serbisu nian, ba-iha promosaun ba direitu traballadór no ba-iha hadi'an kondisaun serbisu nian. Iha ámbitu ne'e, Governu sei buka haka'as-an no promove rezolusaun konflitu laborál sira nian ne'ebé mosu ba-iha relasaun individuál no koletiva sira serbisu nian, liuhusi mekanizmu sira mediasaun no konsiliasaun nian hodi kumpri dunik prinsípiu imparsialidade, independensia, seleridade prosesuál no justisa. 1.3.3 Investimentu ba formadór kualifikadu, materiál nasionál formasaun no instalasaun formasaun nian Sentru Dezenvolvimentu Rekursu Aprendizajen nian hala'o ona serbisu ho finalidade atu hasa'e padraun profisionál formadór sira nian no atu fornese materiál ensinu no aprendizajen nian ba prestadór akreditadu sira formasaun nian, inklui Eskola Sekundária Téknika no Institutu Politékniku sira. Atu hatán ba nesesidade formasaun nian ba-iha ita nia rain, iha tinan 20 oin- mai, no atu implementa Kompromisu Nasionál Formasaun nian, sei ezije atu iha instalasaun no infra-estrutura formasaun nian, atuhodi utiliza husi organizasaun sira formasaun públika no privada sira nian ne'ebé rejista tiha ona. Nune'e mós sei presiza nafatin materiál sira formasaun nian ne'ebé modernu no formadór kualifikadu sira. Governu sei aumenta ninia investimentu ba-iha instalasaun ensinu no apredizajen nian, nune'e mós ba-iha rekursu umanu sira, hodi bele kumpre hakaran atu fó formasaun kualifikada. Governu hakarak atu utiliza sistema " E-Education" ka edukasaun elektronika, ba-iha formasaun aselerada juventude nian. Ne'e sei inklui : Dezenvolvimentu formadór sira nian ne'ebé kualifikadu no profisionál liután. Dezenvolvimentu kandidatu/alunu sira nian ne'ebé kualifikadu no preparadu ona ba merkadu traballu nian iha estranjeiru. Dezenvolvimentu infra-estrutura no instalasaun sira ensinu no formasaun profisionál nian. Dezenvolvimentu kurríkulu sira formasaun relevante nian ba nesesidade atuál país nian, hanesan purezemplu ba-iha área industriál. Estabelesimentu Sentru Formasaun nian ida ba-iha Minarai no Gás. Inkluzaun formasaun nian nu'udar atividade fundamentál ba área negósiu sira nian. Ligasaun dezenvolvimentu ekonómiku lokál no empreza lokál ba servisu formasaun nian. Estabelesimentu Sentru Formasaun nian ida ba-iha Jestaun Finansas Públika nian. 1.3.4 Nesesidade sira ba-iha nível munisipál no sentru kualifikasaun munisipál nian sira Importante tebes atu timoroan hotu bele iha oportunidade, hodi dezenvolve sira nia kualifikasaun no atu munisipiu hotu-hotu bele fornese asesu ba Sentru Kualifikasaun no Formasaun nian ne'ebé bele dezenvolve ekonomia lokál. Governu sei halo levantamentu ida ba nesesidade munisipiu ida-idak nian, kona-ba kualifikasaun sira no mós dezenvolvimentu ekonómiku no sosiál. Levantamentu ida ne'e sei orienta atu harii Sentru Kualifikasaun Munisipál no governamentál no la'ós-governamentál nian sira, ne'ebé maka sei hala'o formasaun akreditada ne'e. Sentru hirak aleinde bele fó formasaun kredensiada, sira mós fó korajen ba joven sira atu tama ba-iha merkadu traballu, fó orientasaun profisionál, halo ponte entre prestadór formasaun nian no formando sira mak iha kapasidade, apoia feto sira hodi tama ba-iha merkadu traballu, implementa programa sira empregu nian no promove empregu ho konta rasik, liuhusi dezenvolvimentu empreendedorizmu (kapasidade inisiativa privadu nian) no ensinu kualifikasaun emprezariál nian sira. 1.3.5 Programa internasionál traballadór konvidadu nian sira Timor-Leste estabelese ona parseria internasionál, atu traballadór timoroan sira bele partisipa ba-iha programa sira internasionál traballdór konvidadu" sira nian. Daudaun ne'e, Korea- du- Sul no Australia oferese hela programa sira ne'ebé hetan susesu di'ak. Programa hirak ne'e fornese esperiénsia no formasaun internasionál ne'ebé folin tebes ba joven timoroan feto no mane ne'ebé bele mós halo sira hetan rendimentu ne'ebé di'ak dunik ba sira no sira ninia família. Governu sei kontinua fó apoiu maka'as ba inisiativa hirak ne'e, no sei servisu hodi haboot liután programa ne'ebé hala'o ona no sei dezenvolve programa foun sira. Apoiu ida ne'e sei inklui renkrutamentu partisipantes sira nian, tuir prátika ne'ebé di'ak liu, no formasaun ne'ebé luan molok atu sai ba rai li'ur. Ho nune'e mak ita bele garante katak traballadór timoroan sira konsege aproveita másimu esperiénsia internasionál sira ne'e, atu nune'e, bainhira fila-hikas mai Timor-Leste, bele aplika ona sira nia koñesimentu hodi dezenvolve ita nia indústria estratégijika sira. 1.4 Protesaun sosiál no Solidariedade Garantia ba padraun mínimu moris di'ak nian ba-iha sosiedade, bainhira hatán nesesidade bázika sira ema nian no protesaun ba sidadaun sira hasoru risku sosiál sira, hodi kombate ki'ak no promove dezenvolvimentu sai nu'udar konseitu báziku ba Protesaun Sosiál no obrigasaun ida ba Estadu Modernu sira. Bazeia ba-iha prinsípiu sira ne'e, dezafiu ida hosi dezafiu sira seluk ne'ebé Governu hasoru maka dezeñu no konsepsaun husi sistema koerente ida ba protesaun sosiál ne'ebé bazeia liu ba ba-iha integrasaun no komplementaridade konjuntu polítika públika ida nian, programa sira no servisu sira ne'ebé atu dezenvolve ona, hodi nune'e bele promove kombate ida sai efikás no efisiente liu hasoru ki'ak no promosaun hodi hadi'a moris di'ak komunidade sira nian. Tanba iha territóriu nia laran no servisu ho populasaun sira maka bele komprende di'ak liu sira nia problema sosiál sira no bainhira "iha ona mudansa" maka Governu buka atu rezolve sistemátika liu, hodi fó apoiu ba Instituisan sira Solidariedade Sosiál no kria Servisu Atendimentu Sosiál nian ba-iha delegasaun sira territórál. Aprosimasaun servisu sira nian ida ne'e ba populasaun sira, hanesan iha ona "tékniku sosiál sira" ho kompeténsia profisionál espesífika, situasaun ne'ebé maka hatudu importánsia tebe-tebes, atu investe ba-iha formasaun asistente sira sosiál iha tempu oin-mai nian. Nune'e Governu sei kontinua fó apoiu no proteje ita nia labarik no joven sira, família sira ne'ebé iha situasaun mukit, ferik-katuas, no sidadaun sira ne'ebé serbisu no kontribui ba rikeza nasionál. Hakarak, nune'e, atu asegura protesaun durante ema nia moris tomak, la haluha mós fó protesaun espesiál ba-iha kondisaun no grupu balun. Kona-ba Kombatente sira Libertasaun Nasionál nian, Governu sei haka'as-an hodi rezolve problema sira ne'ebé pendente hela, maibé iha sorin seluk, ezije mós atu iha, seriedade no onestidade ba deklarasaun sira rejistu nian. Bainhira kontinua haka'as-an hodi harii instituisaun sira fundamentál país nian, Governu sei kontribui, nune'e, hodi harii Estadu ida ho moris-di'ak ba sosiedade, nu'udar konsagra ona iha ita nia Konstituisaun, ne'ebé bele hadi'a efisiensia ekonómika, hamenus ki'ak, promove igualdade sosiál, inkluzaun sosiál, estabilidade sosiál no autonomia sidadaun nian hodi bele hatudu nia kapasidade nu'udar ema nian. 1.4.1 Seguransa Sosiál Kontributiva Atuhodi garante prinsípiu substituisaun rendimentu nian ba ema ne'ebé serbisu, iha tempu balun moris nian, bainhira hasoru situasaun ne'ebé lakon rendimentu servisu nian (porezemplu, ferik-katuas ona, invalidés, maternidade, etc.), Governu sei adapta no haluan tan rejime tranzitóriu seguransa sosiál daudaun nian, hodi kria rejime definitivu ida, ne'ebé bazei liu ba-iha sistema úniku obrigatóriu no kontributivu ida ne'ebé garante seguransa sosiál ba traballadór hotu-hotu no sira ninia família sira ne'ebé depende ba sira, liuliu ba setór públiku, pelumenus ba-iha situasaun sira ne'ebé daudaun ne'e prevee tiha ona iha rejime transitóriu ne'e (katuas-ferik, invalidés no mate/sobrevivénsia) Prestasaun sosiál ne'ebé hetan tiha ona garantia sei haluan tan ba kazu sira seluk, tuir prioridade no reseita sira ne'ebé prevee tiha ona ba seguransa sosiál (importante maka liuhusi kontribuisaun sira). Bainhira sistema definitivu no kontributivu seguransa sosiál nian tama iha vigór, sei la implika funsionáriu públiku sira lakon sira ninia direitu adkiridu (direitu ne'ebé sira hetan tiha ona) ne'ebé daudaun ne'e hetan benefisiu husi rejime tranzitóriu, maibé sira ne'e sai nafatin "grupu fexadu" ida. 1.4.2 Rejime naun kontributivu protesaun sosiál nian 1.4.2.1 Protesaun ba-iha katuas – ferik, idozu Bazeia ba prinsípiu redistribuisaun rendimentu nian, Governu sei kontinua garante pilar báziku ida protesaun sosiál nian ba sidadaun idozu hotu hotu ne'ebé la bele tama ba-iha rejime kontributivu seguransa sosiál nian, hodi garante sira rendimentu mínimu ida: subsídiu apoiu nian ba idozu sira (SAII). Iha tinan rua ho balu oin- mai, Governu hakarak konklui estudu kona-ba nesesidade kona-ba halo revizaun ba subsídiu ida ne'e no ka hodi introdús medida foun sira protesaun foun nian, nune'e mós halo polítika estratéjika ida hodi fó apoiu espesífiku ba idozu sira iha situasaun ne'ebé sira moris mesak de'itizolamentu ka laiha uma. Governu sei fó mós apoiu adisionál ho sasán de'it (liuliu aihan) ba idozu no vulnerável sira no apoiu finanseiru no sasán de'it, indiretu liuhusi fó subsídiu ba Instituisaun sira ne'ebé simu no serbisu ho idozu sira. 1.4.2.2 Protesaun ba infánsia no juventude – labarik ho joven sira Populasaun nasionál barak liu maka labarik no foin-sa'e no sira ne'e maka sai hanesan ita-nia nasaun nian futuru. Protesaun iha infánsia no foin-sa'e hanesan mós prioridade ida iha sistema Protesaun Sosiál integradu ne'ebé Governu sei dezenvolve . Nune'e, iha perspetiva ida atu garante kondisaun mínimu hirak ne'ebé presiza hodi fó protesaun sosiál ba grupu husi faze idade hirak ne'e, Governu sei kontinua proteje labarik ho foin-sa'e sira ho idade ki'ik, husi família ne'ebé kbiit laek liu, liuhusi "Programa Bolsa da Mãe" – liuhusi tulun osan ba família sira ne'ebé merese dunik, hodi nune'e iha kondisaun ba investimentu saúde no edukasaun ba labarik ne'ebé hela ho sira. Governu asume atu hadi'a programa ne'e iha tinan rua hobalun oin mai, inklui kobertura no kritéria sira kona-ba identifikasaun ba elejibilidade. Governu mós sei investe atu elabora kuadru legál ne'ebé adekuadu hodi defende Direitu no Protesaun ba Labarik Ki'ik sira, inklui Lei Protesaun ba Labarik, Lei ba Adosaun, Lei Tutelár Edukativa ba Labarik sira, no Rejime Penál Espesiál ba foin-sa'e sira husi tinan 16 to'o 21. Governu sei kontinua proteje mós labarik sira ne'ebé iha situasaun vulnerabilidade nia laran, no dezenvolve estratéjia atubele garante katak labarik timoroan hotu hetan protesaun hasoru violénsia, neglijénsia (la iha atensaun) no abuzu sira. Nune'e sei fó kontinuidade ba programa sira kona-ba edukasaun ba komunidade – família, viziñu, eskola, Igreja no prestadór servisu sira seluk – kona-ba labarik sira-nia direitu no konseitu ‘Uma Mahon' liuliu ida ne'ebé refere ba feto-oan no labarik defisiente sira. Sei foti mós medida atubele halakon prátika hirak ne'ebé viola direitu labarik sira nian hanesan kaben ho idade seidauk to'o, traballu infantíl no tipu esplorasaun nian sira seluk, inklui violénsia doméstika, abuzu seksuál, prostituisaun, tráfiku no neglijénsia . Sei estabelese liña telefone gratuitu ida, iha oras 24 nia laran loroloron, durante loron 7 semana tomak nian laran, ho naran "linha da criança [liña labarik nian]" hodi fó hatene kona-ba abuzu hasoru labarik ki'ik sira. Governu sei kontinua mós investe iha identifikasaun ba kazu violasaun hasoru direitu labarik no foin-sa'e sira-nian, no iha dezeñu no implementasaun programa sira kona-ba resposta sosiál ba situasaun sira ne'e. Sei kontinua investe mós iha programa reabilitasaun ba labarik lurón nian sira. Governu sei asegura mós protesaun ba labarik no foin-sa'e sira, indiretamente, liuhusi fó subsídiu no apoiu ho sasán oin-oin ba Instituisaun privadu sira ne'ebé hala'o serbisu Solidariedade Sosiál ne'ebé maka halibur no fó apoiu ba sidadaun husi faixa idade ida ne'e nian, iha Centro de Dia, Lar/Orfanatu no apoiu "ambulante". Sei estabelese mós estrutura Komisaun Direitu Labarik nian ida, hodi promove advokasia bázika ba direitu labarik sira-nian, no realiza eventu no semináriu balun hodi proteje no promove labarik sira-nia direitu hirak ne'ebé fundamentál liu. Ikusliu, Governu sei kotinua nafatin Programa Komisaun Nasionál Servisu Infantíl nian, inklui implementasaun Planu Nasionál Kontra Traballu Infantíl, hodi nune'e bele garante sensibilizasaun ba asuntu ne'e no kombate efetivu esplorasaun ba labarik ho idade ki'ik. 1.4.3 Instituisaun Solidariedade Sosiál sira Governu rekoñese knaar fundamentál ne'ebé Instituisaun privada Solidariedade Sosiál nian sira hala'o hodi fó protesaun sosiál no promosaun moris di'ak populasaun sira nian, liuliu iha rejiaun hirak ne'ebé izoladu liu. Nune'e, iha tinan hirak mai ne'e, Governu sei hadi'a no aumenta, apoiu finanseiru ne'ebé fó ba Instituisaun ho natureza ida ne'e, nu'udar kumprimentu ba regra hirak ne'ebé estabelese tiha ona. Klaru, ida ne'e hanesan forma protesaun sosiál nian ida ne'ebé importante, ne'ebé Governu garante indiretamente, no abranje dimensaun moris-kiak no dezenvolvimentu umanu nian oin-oin no kobre sidadaun sira husi grupu ida oin-oin (labarik, foin-sa'e, adultu no ferik-katuas sira) 1.4.4 Apoiu no Servisu Sosiál sira seluk Ho forma komplementár ba transferénsia osan ne'ebé prevee tiha ona iha ámbitu rejime kontributivu no la kontributivu seguransa sosiál nian, no ba subsídiu sira ne'ebé fó ba Instituisaun privadu Solidariedade Sosiál nian sira, Governu sei kontinua fó nafatin mós apoiu sasán (ai-han no sasán seluk) no servisu sira (hanesan servisu kareta tula mate no kaixaun sosiál) – ba ema, família no grupu hirak ne'ebé iha situasaun moris-kiak no vulnerabilidade ne'ebé maka'as tebes, ka ema hnirak ne'ebé monu iha situasaun espesiál sira ne'ebé ezije resposta emerjénsia (inklui, hanesan ezemplu, ema ne'ebé atu tama komarka, ema moras, no sira-nia família, ne'ebé evakua husi Munisípiu sira seluk mai Dili). Koordenasaun nasionál atu hatán ba situasaun sira ne'e, no fó apoiu ne'ebé efikás sai hanesan prioridade ne'ebé Governu sei asume iha tinan rua hobalu oinmai ne'e. Ho konsiderasaun katak, hela-fatin ne'ebé digna sai mós hanesan dimensaun importante ida husi Dezenvolvimentu Umanu nian, Governu sei mantein nafatin projetu disponibilizasaun abitasaun sosiál ba família kbiit laek sira – Casas do Milenio. 1.4.5 Protesaun iha Invalidéz no Defisiénsia – Inválidu no ema sira ho kondisaun defisiénsia Ema sira ne'ebé konsideradu hanesan inválidu ba profisaun ida, seguransa sosial sei proteje sira liuhusi dalan rua: dalan rejime kontributivu, liuhusi fó pensaun invalidéz nian, iha kazu ema sira ne'ebé hala'o serbisu iha setór públiku no setór privadu ne'ebé fó kontribuisaun ba sistema ne'e; ka dalan rejime la'ós kontributivu, liuhusi fó subsídiu hodi fó apoiu ba inválidu sira (SAII), ba sidadaun hirak ne'ebé maka la enkuadra iha rejime (jerál) kontributivu seguransa sosiál nian. Iha kazu rua ne'e hotu, sei eiije meiu hirak ne'ebé komprova situasaun invalidéz ne'e nian, nune'e Governu sei kontinua hala'o serbisu nafatin, ho sistema integradu no interministeriál, atu fasilita prosesu sertifikasaun médika nian ba ida ne'e. Iha parte seluk, ita hotu hatene katak ema sira ho kondisaun defisiénsia nian, maske la konsidera hanesan inválidu hodi bele hala'o servisu ruma, maibé, dala barak ema sira ne'e sai hanesan vítima husi diskriminasaun no izolamentu, nune'e halo sira sai vulneravel tebetebes, kiak no ema esklui sira iha sosiedade nia laran. Governu sei dezenvolve no insentiva asaun no kampaña sensibilizasaun sosiál no komunitária, kona-ba defisiénsia no ema ho defisiénsia sira ninia direitu, hodi nune'e promove sira nia integrasaun no inkluzaun. Sei kria mós Konsellu Nasionál Defisiente sira nian no sei estuda nesesidade no relevánsia atu konstrui Politika Nasionál ba Defisiénsia foun ida, ne'ebé integra dimensaun oin-oin Dezenvolvimentu Umanu nian. Ba fali protesaun reál no imediata, Governu sei kontinua fó asisténsia ba ema ho kondisaun defisiénsia nian, liuhusi servisu sira ne'ebé hala'o iha Sentru Nasionál Reabilitasaun nian, apoiu ba Instituisaun privada sira ne'ebé halibur no tau-matan ba sidadaun sira ne'e, no fó apoio sasán oin oin (inklui ai-han no ajuda téknika sira). 1.4.6 Kombatente Libertasaun Nasionál nian sira Governu sei kontinua fó onra ba ita-nia pasadu no ba ita nia eroi nasionál sira. Importante tebes ba dignidade ita nia Nasaun nian atu veteranu sira tenke hetan tratamentu ho respeitu no apoiu ne'ebé sira merese. Ba ida ne'e, Governu propoin ona atu estabelese, iha tempu badak nia laran, Konsellu Kombatente sira nian, hahú husi Munisípiu sira, hodi sira bele salvaguarda verifikasaun no validasaun rejistu sira no finalizasaun prosesu sira ne'ebé hamosu reklamasaun no kontestasaun. Atu ida ne'e bele konkretiza, sei ezije la'ós de'it partisipasaun husi kuadru rezisténsia nian sira uluk, maibé tenke tau ketak mós problema Veteranu sira nian husi interese partidu nian. Governu sei asegura mós katak Kombatente Libertasaun Nasionál nian sira sei hetan apoiu ho rejime permanente seguransa sosiál nian. Ita sei kontinua fó onra ba sira-nia kontribuisaun ba independénsia, liu mós husi Arkivu no Muzeu Rezisténsia Timor nian no Jardín Eroi sira nian iha Metinaru. Ita sei kontinua implementa sistema atribuisaun bolsa estudu ba Martir no Kombatente Libertasaun Nasionál sira nia oan sira, sistema ne'ebé sei fó prioridade ba família sira ne'ebé maka presiza liu. Governu sei fó apoiu tomak ba prezervasaun ne'ebé di'ak dunik ba ita-nia Istória Libertasaun Nasionál nian. 1.4.7 Jestaun Risku no Dezastre Naturál sira Jestaun risku dezastre kontinua sai hanesan prioridade ida ba Governu ne'ebé hakerek ona iha dokumentu Polítika Nasionál ba Jestaun Risku Dezastre nian. Jestaun dezastre nian sai hanesan asuntu ida ne'ebé ninia responsabilidade kabe ba setór oin-oin no sai bebeik ona hanesan ajenda prinsipál instituisaun mundiál boboot sira nian. Iha relasaun ho alterasaun klimátika no impaktu la di'ak husi dezastre naturál, ne'ebé ninia konsekuénsia maka halakon ema-nia vida, estraga materiál no ambiente hodi halo populasaun moris iha situasaun ne'ebé vulneravel, liuliu ba sira ne'ebé hela iha área rurál, konfirma ona katak sai hanesan ona abordajen foun ida ba kestaun sira ne'e. Solusaun ba problema dezastre sira nian, ezije polítika públika sira ne'ebé orientada ba hamenus risku dezastre nian no aumenta reziliénsia ba komunidade sira liuhusi medida prevensaun, mitigasaun, preparasaun, resposta ba emerjénsia no rekuperasaun, ne'ebé integra iha sistema Protesaun no hametin liután komunidade sira. Avaliasaun no mapeamentu kona-ba risku sira iha territóriu Timor Leste nian, ne'ebé dezenvolve iha 2013, identifika katak iha tendénsia atu mosu inundasaun, siklone tropikál, bailoro naruk, rai monu, no selu seluk, hodi halo familia no komunidade sira tama iha situasaun risku ho konsekuénsia maka populasaun lakon rendimentu. Haree ba situasaun ida ne'e, Governu dezenvolve ona esforsu hodi bele fó atendimentu imediatu ba populasaun sira ne'ebé afetadu. Maibé, atu resposta sira ne'e efikás dunik, haree mós ho emerjénsia ne'ebé asosiadu no orsamentu ne'ebé tinan tinan aloka, Governu iha hanoin atu implementa Politika Nasionál Jestaun Risku Dezastre nian, ne'ebé orienta estratéjia kona-ba intervensaun públika iha domíniu ida ne'e no enkuadra futuru Lei Jestaun Risku Naturál sira. 1.5 Dezenvolvimentu no Koezaun Sosiál Iha prosesu dezenvolvimentu no kombate hasoru moris-kiak, husi pontudevista multidimensionál, ne'ebé ohin loron mundu tomak aseita, Governu dezempeña papél sentrál ida, maibé partilla mós ho instituisaun sira no mós komunidade. Partisipasaun komunidade sira nian importante tebes, tantu iha protesaun ba populasaun sira ka iha jestaun, prevensaun, mediasaun no rezolusaun konflitu, hanesan fatór esensiál sira ba moris di'ak no pás sosiál. Maske nune'e, ita rekoñese katak sei iha difikuldade iha komunidade sira-nia leet. Ho hanoin ida ne'e, Governu sei kontinua dezenvolve atu promove diálogu sosiál no armonia iha komunidade nia leet, liuhusi asaun formasaun no sensibilizasaun ba ajente sosiál oin-oin (inklui lider lokál no mós lider komunidade nian sira), kona-ba atividade simulasaun no rezolusaun konflitu sira no dinamizasaun komunitária. 1.6 Igualdade Jéneru no Violénsia Doméstika Governu sei kontinua hadi'a nia kompromisu ba igualdade entre mane ho feto iha parte moris nian hotu-hotu. Igualdade jéneru konsagra tiha ona iha ita-nia Konstituisaun no presiza sai hanesan konsiderasaun sentrál husi programa no desizaun Governu nian hotu-hotu. Autonomia feto sira nian depende, dala barak liu, ba responsabilidade Governu nian hodi lidera kolaborasaun ne'ebé presiza entre órgaun soberania nian sira, sosiedade sivíl, organizasaun relijioza, ONG sira no komunidade. Ita sei kontinua ita-nia esforsu tomak hodi bele garante implementasaun plataforma Asaun Pekin no CEDAW nian, ne'ebé garante igualdade ba feto no labarik-feto sira, hamenus moris-kiak iha feto sira nia leet, aborda diskriminasaun hasoru feto, iha nivel saúde no edukasaun, no halakon violénsia doméstika. Igualdade jéneru sei sai hanesan kestaun tranzversál ida, tanba tratamentu ba igualdade jéneru sai hanesan servisu ida ba Governu tomak, ne'ebé presiza kolaborasaun no koezaun entre setór sira hanesan seguransa, saúde no edukasaun, Komisaun Funsaun Públika, setór judisiál no mós ministériu no instituisaun sira seluk. Governu sei garante katak igualdade jéneru sei hetan fatin nafatin iha inisiativa, sorumutu no planeamentu iha administrasaun governu nian tomak. Liuhusi inisiativa Abordajen Integradu Jéneru nian, iha ona ema ne'ebé sai hanesan reprezentate ba kestaun jéneru nian iha instituisaun governu nian hotu hotu hodi haree ba dezenvolvimentu nasionál. Maibé, Governu hakarak tau atensaun maka'as liután ba kestaun jéneru nian iha Ministériu relevante balun, hanesan Ministériu Agrikultura no Peska, Saúde, Solidariedade Sosiál, Edukasaun, SEFOPE no Justisa, no konta mós ho apoiu husi Sekretaria Estadu ba Apoiu Sosio-Ekonómiku ba Feto, ne'ebé sei kontinua promove sorumutu regulár entre grupu servisu jéneru nian, iha nivel nasionál no munisipál no iha Instituisaun Estadu nian ida-idak. Abordajen Integradu Jéneru sei hetan nafatin konsiderasaun iha definisaun programa nasionál sira, iha implementasaun Planu Estratéjiku Dezenvolvimentu nian, iha planeamentu anuál no iha fundu hirak ne'ebé aloka ba, ho dalan ne'ebé la haluha mós kestaun jéneru nian iha Orsamentu Jerál Estadu nian, nune'e mós iha monitorizasaun ba atividade hirak ne'ebé liña ministeriál sira implementa. Governu sei promove inisiativa hirak ne'ebé akompaña no asegura partisipasaun ida ne'ebé ativa liután husi feto sira iha dezenvolvimentu ekonómiku, inklui asesu ba kréditu, envolvimentu iha programa investimentu no insersaun nian sira, iha setór produtivu sira nasaun ne'e nian. Sei promove mós feto sira-nia partisipasaun iha vida polítika, inklui kapasitasaun ba Asosiasaun feto sira-nian iha munisípiu hotu-hotu, no iha Rejiaun Administrativa Espesiál Oe-kuse Ambenu, atu sira bele kandidata an iha eleisaun suku sira nian. Fó aopiu ba Asosiasaun feto sira-nian atu implementa plataforma Asaun Kongresu Feto Munisípiu sira, sai hanesan parte integrante husi estratéjia ida ne'e. Violénsia bazeia ba jéneru hanesan buat ne'ebé labele hetan fatin iha sosiedade ne'ebé livre no tolerante, tanba ne'e maka Governu sei dezenvolve asaun hirak ne'ebé forte atubele rezolve problema ne'e. Tanba violénsia bazeia ba jéneru sai hanesan forma violénsia nian ne'ebé komún liu ne'ebé ema hato'o hanesan keixa ba polisia, Governu sei fó prioridade ba implementasaun ajenda polisiamentu nian ida ne'ebé abranjente, inklui formasaun ajente kona-ba protesaun, prevensaun no asisténsia. Governu sei haka'as an liután hodi fó akonsellamentu ba vítima sira husi violénsia doméstika, hasa'e kapasidade hodi julga autór sira ne'e iha sistema justisa nian, no alarga servisu umanu no servisu saúde nian hodi proteje vítima sira. Governu sei aumenta númeru sentru apoiu nian ba vítima husi violénsia bazeia ba jéneru iha nasaun laran tomak, atubele fó kuidadu no apoiu ne'ebé vítima sira ne'e presiza. Governu sei aumenta mós sesaun formasaun no informasaun nian ba Xefe Suku no Xefe Aldeia sira, liuhusi kolaborasaun ho Polísia Nasionál Timor Leste. Governu sei kontinua promove mós kampaña informasaun nian ba públiku, iha Munisípiu ida-idak, haklaken mensajen kona-ba Polítika Toleránsia Zero ba violénsia hasoru labarik feto sira iha eskola no iha uma. Sei kontinua promove konseitu "casa segura – uma mahon", liuliu ba labarik feto sira iha zona rurál sira. Sekretaria Estadu Apoiu Sosioekonómiku ba Feto sei dezenvolve asaun konkreta hodi reforsa implementasaun Lei Hasoru Violénsia Doméstika, inklui mós sosializasaun kona-ba lei ne'e, no kona-ba implemensaun Planu Asaun Nasionál kona-ba violénsia bazeia ba jéneru no violénsia. 1.7 Juventude no Desportu Foin-sa'e timoroan sira maka sei sai lider Nasaun ida ne'e nian aban-bainrua. Sira ne'e, feto no mane, maka sei remodela Timor-Leste no kontribui ba transfomasaun ba ita-nia sosiedade no ita-nia ekonomia. Nune'e, ita presiza halo buat hotu ne'ebé ita bele atu tulun ita-nia foin-sa'e sira, hodi fó ba sira oportunidade ne'ebé sira presiza atubele hetan esperiénsia, kualifikasaun no valór ne'ebé bele kapasita sira hodi partisipa loloos iha nasaun nia futuru. Timor-Leste maka Nasaun foun ida, iha ne'ebé populasaun 60% maka ho idade tinan 25 mai kraik. Ita nia foin-sa'e sira hasoru taxa dezempregu nian ne'ebé aas tebetebes, ho situasaun ne'ebé grave liután iha ne'ebé maka sira barak serbisu iha empregu ne'ebé la'os kualifikadu, ka iha situasaun ho empregu ne'ebé la seguru. Iha mundu globalizadu ohin loron nian, ita-nia foin-sa'e sira hatene katak iha oportunidade barak, maibé oportunidade sira ne'e la to ba ema hotu. Governu sei asume kompromisu hodi hafila situasaun ida ne'e la'os de'it atu muda foin-sa'e sira-nia hanoin kona-ba sira nia posibilidade, maibé mós atu sira hetan asesu dunik ba oportunidade sira ne'e, liuhusi prestasaun servisu ba programa edukasaun nian no formasaun vokasionál husi Governu. Iha estudu ikusliu ne'ebé Sekretaria Estadu Juventude no Desportu halo iha tinan 2014, hatudu katak 24% husi foin-sa'e sira ne'ebé hela iha área rurál sira la iha servisu, kompara ho 15% ne'ebé hela iha área urbana (sidade) sira. Situasaun ida ne'e sai aat liután iha área remota sira, nune'e mosu kategoria joven marginalizadu ne'ebé tenke sai hanesan objetu prioritáriu atubele hetan atensaun. Ba ida ne'e, Governu sei kontinua fó prioridade atu apoia foin-sa'e sira, liuliu ba sira ne'ebé iha situasaun ne'ebé vulneravel liu, hodi hadi'a sira-nia kodisaun moris nian no promove sira-nia asesu ba programa estudu no formasaun nian hodi nune'e bele fó ba sira asesu ba merkadu serbisu nian. Estratéjia ida ne'e inklui mós aprovasaun ba Polítika Nasionál Juventude nian ida ne'ebé atualizadu no adaptadu tuir sirkunstánsia foun sira, iha ne'ebé sei inklui mós Fundu Nasionál Juventude nian hodi apoia diretamente dezenvolvimentu foin-sa'e sira-nian. Governu sei fó apoiu mós ba dezenvolvimentu Asosiasaun Foin-sa'e sira nian ne'ebé ejiste ona, no sei harii Sentru Multiuzu sira ba Foin-sa'e sira, hanesan mós formaliza estrutura ida no enkuadramentu legál koerente no prátiku ida ba Rede Nasionál Sentru Juventude nian sira. Governu sei prepara mós Polítika Nasionál Desportu nian ida no Planu Estratéjiku ba Dezenvolvimentu Desportu nian, ne'ebé sei promove desportu hanesan dalan atu apoia formasaun karater no hodi hala'o ba oin valór kooperasaun, forma di'ak no servisu iha ekipa. Planu ne'e sei haree liu ba dezenvolvimentu desportu nian hanesan parte importante ba ema nia vida, envolve sira iha relasaun sosiál, diálogu, toleránsia, étika no valór demokrátiku sira. Planu ne'e sei utiliza mós atividade desportu nian hanesan baze hodi envolve foin-sa'e sira iha atividade edukasaun no formasaun nian. Nune'e, depoisde aprovasaun ba diploma ne'ebé regula kriasaun Klube Desportivu sira iha rejime ne'ebé simplifikadu, Governu sei kontinua promove no fasilita kriasaun klube desportivu hahú husi munisipiu sira, iha modalidade desportiva oin-oin, ho hanoin atu fó apoiu ba dezenvolvimentu identidade nasionál ida ne'ebé forte, no sei estabelese estrutura ne'ebé presiza ba organizasaun liga amadora futeból nasaun ne'e nian. Iha kontestu ida ne'ebé luan liután, Governu rekoñese desportu iha podér atu halibur ema, hahú husi atividade sira iha aldeia to'o ba eventu desportivu nasionál no internasionál sira. La'os de'it apoia atividade desportiva lokál sira, Governu mós sei enkoraja no promove edukasaun fízika no desportu edukasionál ne'ebé hatama tiha ona iha kurríkulu ensinu nasionál nian. Ikus liu, Governu sei kontinua promove instalasaun no ekipamentu desportu nian sira iha munisípiu sira. 1.8 Ambiente Harii tiha baze ne'ebé forte ba ita nia Estadu Direitu Demokrátiku, ne'ebé defende justisa sosial ba sidadaun sira, Governu sei kontinua implementa estratéjia lubun ida ne'ebé ko'alia kona-ba protesaun ambiente no ba garantia sustentavel rekursu ambientaál Timor-Leste nian. Governu sei kontinua la'o tuir definisaun sustentabilidade nian ne'ebé fó sai iha Konferénsia Mundiál kona-ba Konservasaun no Dezenvolvimentu Ambientál tinan 2002 nian, ne'ebé dehan katak "dezenvolvimentu sustentavel maka dezenvolvimentu ne'ebé hatán ba nesesidade agora nian, maibé la kompromete kapasidade jerasaun aban bainrua nian atu hatán ba sira-nia nesesidade rasik". Dezenvolvimentu sustentavel sai hanesan pontu sentrál ne'ebé halo parte iha dezenvolvimentu ekonómiku, sustentabilidade ambientál no inkluzaun sosiál, ne'ebé apoia husi governasaun di'ak dunik. Ita-nia bei'ala sira moris iha armonia ho ambiente, hodi uza nia ho dalan ne'ebé sustentavel hodi bele fó hán sira-nia família. Governu sei utiliza ligasaun forte entre povu timoroan ho nia ambiente naturál, hodi bele garante katak ekonomia ne'e krexe ho armonia, hamutuk ho ambiente naturál no, tanba ne'e, sei kontinua promove realizasaun prátika tradisionál hanesan "tara-bandu" iha suku hotu-hotu. Governu hakarak halo Timor-Leste sai hanesan referénsia internasionál ida kona-ba dezenvolvimentu sustentável ninian. Esforsu ida ne'e sei komesa iha ita-nia eskola sira, iha ne'ebé alunu sira sei aprende importánsia husi konserva no proteje ambiente. Ida ne'e sei permite alunu sira bele komprende di'ak liután sa'ida mak ambiente, nune'e bainhira to'o sira nia tempu sira sei tranzmite matenek ida ne'e ba sira-nia oan sira. Governu hakarak atu aplika maka'as liután lei no regulamentu ambientál sira, no promove liután dezenvolvimentu sustentavel iha programa sira kona-ba sensibilizasaun ambientál, konservasaun rekursu ambientál sira, no forma intervensaun nian sira seluk, ho objetivu prinsipál mak atu realiza dezenvolvimentu ho dalan ne'ebé ekolójika, no buka atu atinje kreximentu ekonómiku sustentavel liuhusi interasaun ida ne'ebé armonioza entre ita ema ho ambiente. 1.8.1 Mudansa Klimátika Governu hatene katak kontribuisan Timor-Leste nian ba problema mudansa klimátika ne'e ladún maka'as, maibé ita tenke rekoñese katak Timor-Leste mós sofre konsekuénsia husi poluisaun ne'ebé poténsia ekonómika no indústria sira prodús. Ne'e signifika katak, ita tenke kontinua serbisu maka'as liuhusi kooperasaun ho nasaun sira seluk iha mundu atubele hamenus emisaun hirak ne'ebé hamosu poluisaun. Timor-Leste vulneravel ba alterasaun klimátika no ita-nia klima bele sai manas no maran liután iha tempu bailoro no mós sai variavel liután. Iha rekursu naturál tolu – bee, rai ho zona tasi-ibun – ne'ebé vulneravel ba alterasaun klimátika no ba aumentu husi nivel bee tasi nian. Buat ne'ebé hanesan akontese mós ba ahu-ruin sira ne'ebé vulneravel ba temperatura tasi-been nian no mós kompozisaun kímika. Alterasaun hirak ne'e, fó impaktu ba produsaun agríkola, seguransa ai-han no indústria turizmu nian, hodi aumenta risku dezastre naturál sira nian ne'ebé mosu tanba tanba inundasaun (bee sa'e), bailoro naruk no rai-monu. Governu kontinua dezenvolve Sentru Nasionál Alterasaun Klimátika nian, liuhusi servisu hamutuk ho Universidade Timor-Loro Sa'e, atu hala'o investigasaun no observasaun ba kestaun sira kona-ba alterasaun klimátika, atubele asegura rekolla dadus kona-ba impaktu husi mudansa klimátika no enkoraja inovasaun teknolójika hodi buka oinsa bele adapta no bele reduz alterasaun klimátika sira ne'e . 1.8.2 Ai-laran no zona konservasaun rai-maran no tasi nian sira Governu sei implementa Planu kona-ba Jestaun Florestál, ne'ebé sei diskuti ho Parlamentu Nasionál, ho objetivu atu promove reflorestasaun no prátika sira kona-ba jestaun rai nian ne'ebé sustentavel iha Timor-Leste. Sei implementa mós Polítika no Estratéjia Nasionál kona-ba komersializasaun Au nian, ne'ebé sei inklui promosaun kuda au ba objetivu reflorestasaun no kontrolu ba erozaun (rai halai), hodi nune'e fó kontinuidade ba lesgizlasaun ne'ebé hetan tiha ona aprovasaun tantu husi parte Ajensia Espesializada Investimentu nian, no mós Institutu Peskiza, Dezenvolvimentu, Formasaun no Promosaun Au, ho objetivu atu halo diversifikasaun ekonómika no sosiál nasaun nian, no dezenvolvimentu armoniozu rekusu naturál sira nian. Zona konservasaun naturál sira, ka parke nasionál sira, serve atu proteje ekosistema sira, liuhusi limitasaun ba atividade komersiál, maibé fó dalan ba atividade investigasaun no edukasaun nian, no mós atividade kulturál, turístika no rekreativa. Área protejida dahuluk iha Timor-Leste maka Parke Nasionál Nino Konis Santana, ne'ebé sai nu'udar pesa sentrál husi estratéjia turístika Timor-Leste nian. Ita halo tiha ona identifikasaun ba área ornitolojika (kona ba manu fuik) internasionál, no área sira ne'e mós sei hetan protesaun. Governu mós sei kontinua proteje área sira iha zona konservasaun nian sira seluk iha Tilomar, Ramelau, Fatumasin, Manukoko-Atauru, Matebian, Kablaki, Builo, Mota Klere, Lore, Foho Paitxau, Lago Iralalau, Ilha Jaku, Foho Diatuto, Bee-Malae Atabae, Maubara, Mak Fahik no Foho Sarim, Tasi-tolu, Areia Branca, Foho Kuri no mota ain Irabere no Iliomar. Atu proteje no konserva biodiversidade tasi nian no ita nia ahu-ruin sira ne'ebé furak, Governu sei kontinua servisu hamutuk ho Indonézia no governu sira seluk iha Rejiaun ne'e nian, ne'ebé asina ona inisiativa "Triângulo de Coral" atu salvaguarda rekursu tasi nian no tasi-ibun nian sira iha rejiaun ne'e, hodi nune'e posibilita kreximentu sustentavel, no asegura prosperidade ba jerasaun ohin loron nian no jerasaun aban-bainrua nian. Ita sei kontinua dezenvolve polítika ba jestaun iha área basia hidrográfika nian no ba zona tasi-ibun nian sira, hodi inklui estratéjia atu reabilita no proteje ai-parapa iha área tasi-ibun nian sira, atu regula esplorasaun rai-henek iha mota sira ne'ebé iha, liuliu iha mota komoro, no atu kria zona separasaun iha mota–ninin sira, no iha fatin besik barajen, kolan no iha área tasi-ibun nian, atubele ajuda konserva rekursu bee nian sira no kontrolu ba planísie aluviál (rai tetuk ne'ebé forma husi mota ka rai halai) Governu mós sei hadi'a sistema jestaun rai nian ne'ebé sustentavel, konserva no reabilita ai-laran no dezenvolve prátika ai-laran nian ne'ebé sustentavel, ne'ebé sei inklui implementasaun: Legizlasaun espesiál ida kona ba ai-laran sira ne'ebé suporta husi akordu sira kona-ba pose rai nian. Reflorestasaun ba zona ne'ebé degradada ona, liuliu ba área foho-lolon sira ne'ebé hale'u Dili. Introdusaun programa atu hamenus prátika sunu rai ka ai-laran, iha tempu bailoro. Substituisaun ai-sunu no fonte enerjia seluk (projetu fugaun rai-mean) Aplika lei ambiente no ai-laran, atu kontrola atividade hirak ne'ebé estraga ai-laran. 1.8.3 Biodiversidade Atu hatán ba ameasa sira ba biodiversidade iha Timor-Leste, Governu aprova tiha ona Estratéjia no Planu Asaun Nasionál kona-ba Biodiversidade. Estratéjia ne'e avalia ameasa sira ba biodiversidade tasi-laran no rai-maran nian iha nasaun ne'e no identifika buat hirak ne'ebé bele sai hanesan insentivu ba nia konservasaun. Foku husi estratéjia ne'e mak oinsá evita atu biodiversidade labele lakon, no oinsá garante katak ita bele jere, ho dalan ne'ebé sustentavel, ita nia rekursu biolójiku sira. Governu ida ne'e sei implementa Lei Nasionál kona-ba Biodiversidade, atubele regula planu asaun ne'e. Sei fó mós importánsia ba Konservasaun Natureza atu proteje no konserva natureza iha Timor-Leste, liuhusi asaun fiskalizasaun no sensibilizasaun ba populasaun kona-ba temátika ida ne'e. 1.8.4 Kontrolu kona-ba poluisaun Governu iha kompromisu atu asegura katak, iha tempu ne'ebé populasaun no ekonomia Timor-Leste nian sa'e, nia bele halo kontrolu ba poluisaun atu labele halo ema baruk atu moris iha Timor-Leste. Nune'e ita sei introdús regulamentu hodi kontrola poluisaun ar, bee no rai nian, nune'e mós ho poluisaun lian nian. Ita sei harii kapasidade rekursu umanu nian iha área kontrolu kualidade ambiente nian, inklui metodolojia ne'ebé uza ba teste ambientál. Ida ne'e sei inklui harii laboratóriu ambientál nian ida atu halo teste no konklui auditoria no asaun monitorizasaun ambientál nian, no atu avalia poluisaun husi atividade hotu-hotu iha Munisípiu sira. Governu sei halo estudu ambientál sira hodi lokaliza fonte husi poluente oin-oin. Ida ne'e sei inklui análize kona-ba iha atividade otél, restaurante, ofisina, ospitál no merkadu sira nian. Sei halo regulasaun atu ema sira ne'ebé hamosu poluisaun bele selu multa ba estragu hirak ne'ebé mosu tanba sira-nia asaun sira. Asesu ba eletrisidade ne'ebé fiavel no baratu, nu'udar rezultadu husi reforma setór eletrisidade nian, sei hamenus poluisaun atmosfera nian ne'ebé mai husi te'in uza ai-sunu. Poluisaun atmosfera nian iha Dili sei aborda kampaña atu hamenus hahalaok sunu du'ut ka ai-laran iha área sira ne'ebé hale'u sidade ne'e, no sei introdús mós lei atu regula emisaun sira husi veíkulu sira. Governu sei kontinua introdús norma hirak ne'ebé sei orienta jestaun lixu nian iha sidade tuir norma ambiente nian sira, atubele estabelese padraun sira ba tratamentu lixu sira iha Dili no iha sidade prinsipál sira seluk. Ita sei buka atu harii fatin ba transformasaun lixu ba adubu no atu halo resiklajen ba plástiku, surat-tahan no vidru. Ita sei kontinua implementa polítika jestaun lixu nian iha sidade, hodi fornese kaixote hodi tau lixu doméstiku nian atubele rekolla. Governu sei haree atubele kria estratéjia ida kona-ba jestaun ba lixu isin (rezídu sólidu), la'os de'it atu rekolla no tau iha armazen lixu nian, mabié atubele trata no utiliza fila-fali lixu orgániku sira. Óleu fo'er (uzadu) iha Dili ka iha munisípiu sira, sei rekolla liuhusi kareta tanke atu bele halo resiklajen, utiliza fila-fali ka soe los ona. Iha nesesidade ne'ebé boot tebetebes atu hamenus kuantidade saku no botir plástiku ne'ebé taka ita-nia bee-dalan sira no mós estraga buat hirak ne'ebé moris iha ita-nia tasi-laran. Tanba ne'e Governu sei kontinua dezenvolve kampaña hodi enkoraza ema atubele uza saku ne'ebé halo husi surat-tahan nu'udar alternativa ida no dezenvolve eskema resiklajen nian ida ba materiál uzadu hotu-hotu ne'ebé halo husi plástiku. 1.9 Kultura no Patrimóniu Ita nia liman-rohan kulturál fó forsa mai ita atu tuba-metin di'ak liután, hodi hetan ita-nia ukun-an, no agora fó tulun ita atu kaer metin ita-nia futuru, no hametin ita-nia identidade nasionál. Governu konsidera katak iha nesesidade urjente ida atu valoriza patrimóniu Timor nian, liman-rohan uluk nian, no buat hirak ne'ebé mak ita harii agora, tanba ne'e fanun populasaun atubele prezerva no tranzmite ba jerasaun sira tuir. Nune'e ita sei proteje patrimóniu kulturál – ita nia riku-soin, materiál ka la'ós materiál – ne'ebé tanba, valór ne'ebé sira ne'e iha, ita tenke konsidera ho interese ne'ebé relevante ba ita-ninia identidade kulturál. Ba ida ne'e, ita sei buka atu halo prezervasaun, modernizasaun no divulgasaun kultura Timor nian no fó apoiu ba promosaun arte kriativa iha ita-nia dezenvolvimentu ekonómiku. Iha prátika lubuk boot ida ne'ebé halo parte iha ita-nia ekonomia kriativa, hanesan soru-tais, halo estátua, dezeñu no pintura, design, múzika, reprezentasaun no aspetu hotu-hotu husi produsaun teatru nian, dansa, sinema, produsaun rádiu no televizaun, eskrita, publikasaun no publisidade. Prátika sira ne'e hotu uza kriatividade no koñesimentu kulturál sira atubele hetan rendimentu no rikeza. 1.9.1 Instituisaun kulturál sira Governu sei kontinua dezenvolve projetu Biblioteka Nasionál Timor-Leste nian, ho nune'e ita-nia rai bele soi intituisaun kulturál referénsia nian ida, ne'ebé fó apoiu ba sistema ensinu no apoui rede nasionál biblioteka sira nian, no hasa'e komunidade sira-nia nivel literasia (lee no hakerek) nian. Projetu kona-ba dezeñu no konstrusaun ba Biblioteka ne'ebé atu halo, la'o dadauk ona, no Governo mós asina ona protokolo kolaborasaun nian sira atubele fó rekursus hirak ne'ebé presiza ba instituisaun ne'ebé atu harii ne'e – livru, revista, rejistu, audiovizuál, nsst. Governu sei kontinua fó apoiu mós atu dezenvolve Muzeu no Sentru Kulturál Timor-Leste nian, iha Dili, atubele rai metin no hatudu no interpreta artefatu importante sira husi kultura no patrimóniu Timor nian. Sentru ne'e sei hatudu kolesaun jeolójika ne'ebé agora hatudu hela Palásiu Prezidente nian, sei hatudu mós kolesaun arkeolójika ne'ebé namkari hela iha nasaun barabarak, no kolesaun etnográfika, ne'ebé soi objetu kulturál kurakuran 1000, ne'ebé, provizoriamente, tau hela iha armazen Ministériu Edukasaun nian, iha Dili. Muzeu ne'e sei fó mós apoiu ba rede nasionál ida ba muzeu sira, no sei servisu hamutuk hodi dezenvolve projetu sira ho Arkivu no Muzeu Rezisténsia Timorense. Biblioteka no Muzeu Nasionál sira sei harii tuir padraun internasionál, atu objetu kulturál no lulik sira, pintura, livru no iten husi kolesaun sira seluk bele protejidu husi umidade, ahi han ka perigu sira seluk. Ida ne'e sei sai importante mós atu kolesaun patrimoniál sira ne'ebé iha valór, ne'ebé rai hela iha kolesaun internasionál sira, bele fó hikas fali mai Timor-Leste. Governu sei haree posibilidade oinsá projetu Biblioteka Nasionál integra mós Muzeu Nasionál no Akademia Arte no Indústria Kriativa Kulturál sira, nune'e bele hamenus rekursu no atu sidade Dili no ita-nia nasaun bele soi infra-estrutura edukativa no kulturál ida de'it no sai hanesan ikon, hodi bele sai hanesan elementu identidade nasionál nian ida, hodi kria empregu no dada turista sira. Governu sei harii mós Sentru kulturál iha Munísipiu ida-idak, atubele dezenvolve múzika, arte no dansa timor nian sira, hodibele sai hanesan foku kulturál iha rejiaun ida idak, ne'ebé sei la hatudu de'it kultura rejionál sira, maibé espresaun kulturál inter-rejionál. Sentru kulturál sira ne'e ida-idak sei iha biblioteka ida, fatin ba espozisaun, sentru meiu komunikasaun sosiál no teknolojia nian ki'ik ida, ho asesu ba internet, no sala reuniaun no mós fatin serbisu nian. To'o 2017, sei dezenvolve ona Sentru Kulturál lima, no to'o 2030, pelumenus Munisípiu ida-idak iha ona Sentru ida. 1.9.2 Akademia Arte no Indústria Kriativa Kulturál Timor-Leste nian Governu sei kontinua apoia atu estabelese Akademia Arte no Indústria Kriativa Kulturál Timor-Leste nian. Hahú husi fó formasaun ba profesór sira kona-ba ida ne'e, Akademia ne'e maka sei promove arte tradisionál Timor nian hanesan múzika, dansa, artezanatu no promove arte kriativa hanesan fotografia, audiovizuál no design. Kona-ba múzika, sei harii Eskola Múzika nian ida, atu promove kriasaun artístika iha setór múzika nian. Eskola múzika nian sei funsiona hanesan sentru nasionál ba aprendizajen no kriatividade, hodi permite ba asesu edukasaun muzikál, prezerva no halo gravasaun ba múzika tradisionál, repertóriu (kolesaun obra múzika nian), knananuk, dansa no instrumentu sira, no investigasaun muzikál. Akademia ne'e mós sei inklui Eskola ba ‘Belaz-Artes' nian ida, ne'ebé sei sai hanesan Sentru ida atu halo investigasaun kona ba arte vizuál sira iha Timor-Leste, no fatin formasaun nian ida iha ne'ebé artista sira sei dezenvolve sira-nia kualifikasaun téknika no artístika. Akademia Arte no Indústria Kriativa Kulturál ne'e, sei fó edukasaun no formasaun kona-ba soru tais, serámika, homan, halo obra ho ai, halo obra ho metál, obra halo husi animál nia kulit, no kualifikasaun artezanatu nian sira seluk, no mós marketing. Governu sei hahú halo planu atu harii Teatru Nasionál nian ida no mós Empreza Dansa nian ida, ne'ebé sei estabelese iha prazu médiu, hodi bele forma atór no dansadór sira no kria oportunidade entretenimentu nian. 1.9.3 Patrimóniu kulturál Governu sei hala'o knaar ida ne'ebé ativu iha área prezervasaun Patrimóniu Kulturál, inklui uma lulik (tradisionál) no monumentu istóriku sira, patrimóniu la'ós materiál (tradisaun, koñesimentu, espresaun artístika sira) no objetu kulturál sira. Iha sekuénsia husi serbisu ne'ebé dezenvolve hela to'o oras ne'e no ratifikasaun konvensaun kulturál UNESCO nian sira ne'ebé importante, ne'ebé iha hela preparasaun nia laran, área prezervasaun no promosaun patrimóniu kulturál, Timor-Leste tenke hetan atensaun espesiál liuliu tanba haree ba ninia potensiál ba dezenvolvimentu lokál, liuhusi posibilidade atu kria serbisu, no dada turizmu no dezenvolve ekonomia. Governu rekoñese katak importante dunik atu prezerva ita-nia patrimóniu arkitetóniku, liuliu Uma Lulik – uma sira ne'e maka sai hanesan fatin iha ne'ebé komunidade hala'o parte barakliuhusi sira-nia moris. Governu sei aprova no implementa Lei Patrimóniu Kulturál ida, hodi bele proteje, prezerva no hadi'a patimóniu kulturál, liuliu patrimóniu arkitetóniku tradisionál. 1.9.4 Audiovizuál Governu rekoñese potensiál ne'ebé boot husi teknolojia audiovizuál sira, kona-ba atu aumenta ema nia asesu ba fatin-fatin kulturál ne'ebé eziste iha Dili, no atu fahe prátika kulturál hirak ne'ebé úniku husi munisípiu sira iha Timor-Leste. Diseminasaun graduál kobertura televizaun, rádiu no meiu audiovizuál nian sira seluk, nu'udar rezultadu diretu husi implementasaun programa asesu no tranzmisaun eletrisidade nian iha nasaun laran tomak, sei fó kontribuisaun di'ak liután asesu ba kultura. Governu sei enkoraja kreximentu setór sinema no televizaun nian ida iha Timor-Leste. 1.9.5 Turizmu kulturál Governu sei kontinua apoia atu halo boot tan setór turizmu komersiál iha Timor-Leste. Ita-nia kultura tradisionál, ita-nia komunidade rurál nia istória moris loron-loron nian, ita nia artezanatu, múzika no dansa sei oferese ba vizitante sira, esperiénsia ne'ebé sira sei la haluha. Governu sei apoia dezenvolvimentu infraestrutura hodi suporta dezenvolvimentu turizmu nian, inklui alojamentu, iha knua sira ne'ebé namkari iha nasaun laran tomak atubele promove turizmu kulturál. Sei iha mós informasaun ba turista sira iha internet no kalendáriu ba peregrinasaun relijioza iha fatin importante sira iha Timor-Leste. 1.10 Meiu komunikasaun sosiál – Diversidade no Independénsia Direitu ba informasaun, ba liberdade espresaun no ba liberdade imprensa sai hanesan buat hirak ne'ebé importante ba konsolidasaun demokrasia iha Timor-Leste. Sirkulasaun informasaun nian maka bele aumenta públiku nia kompriensaun kona-ba projetu no atividade Governu nian, hodi ajuda harii unidade no koezaun nasionál. Ita-nia povu iha direitu atu hetan esplikasaun ne'ebé objetiva no imparsiál kona-ba eventu no projetu sira. Governu sei promove mós programa ne'ebé buka atu dezenvolve prinsípiu étiku, morál no integridade nian – edukasaun sívika – iha sosiedade. 1.10.1 Ajénsia Notísia Timor-Leste nian Timor-leste presiza alarga tan meiu atu rekolla no habelar informasaun kona-ba nasaun ne'e iha teritóriu nasionál laran tomak no mós iha nivel internasionál. Governu mós sei promove estudu, no sei prepara enkuadramentu legál no formasaun ba rekursus umanus ne'ebé presiza atubele estabelese Ajénsia Notísia Timor-Leste nian. 1.10.2 Institutu Nasionál Formasaun Jornaslista nian Governu sei apoia no promove estabelesimentu Institutu Nasionál Formasaun Jornalista sira nian hodi hadi'a kapasidade meiu komunikasaun sosiál sira nia iha nasaun ne'e, inklui rádiu, televizaun no jornál sira. 1.10.3 Lei komunikasaun sosiál nian Governu sei promove divulgasaun Lei Komunikasaun Sosiál ninian, ne'ebé ninia objetivu mak atu garante, proteje no regula ezersísiu liberdade informasaun, imprensa no meiu komunikasaun sosiál. Lei ne'e sei tradús ba tetun no sei halo kampaña informasaun públiku ba jornalista sira, ba órgaun komunikasaun sosiál, ba instituisaun Estadu no ba públiku sira hotu. 1.10.4 Enkorajamentu ba diversidade meiu komunikasaun sosiál nian Governu sei buka konsolida knaar Rádiu no Televizaun Timor-Leste, nu'udar empreza públika, no sei fó kapasitasaun no materiál ne'ebé presiza atu profizionaliza organizasaun ne'e. Governu mós sei kontinua hasa'e kapasidade Rádiu Komunidade nian sira, nu'udar instrumentu informasaun no koezaun nian iha komunidade sira nia leet. Governu sei buka atu insentiva investimentu husi setór privadu iha meiu komunikasaun sosiál nian sira, promove ambiente ida ne'ebé kompetitivu, no bele hetan setór komunikasaun sosiál nian ida ne'ebé diversifikadu, responsavel no dinámiku. 1.10.5 Konsellu imprensa Governu sei promove estebelesimentu Konsellu Imprensa nian, entidade administrativa independente ne'ebé prevee ona iha Lei Komunikasaun Sosiál ninian. Órgaun ida ne'e maka sei garante katak meiu komunikasaun nian sira independente dunik husi podér polítiku, no poder ekonómiku, nune'e mós, sei haree ba konduta profisionál no étika husi profisionál jornalizmu nian sira no husi operadór meiu komunikasaun nian sira no asegura kondisaun sira kona-ba asesu no ezersísiu atividade jornalista nian. Governu sei fó apoiu ne'ebé presiza atu harii órgaun ne'e, liuliu, iha nivel preparasaun Estatutu Konsellu Imprensa nian, apoiu iha eleisaun reprezentante jornalista sira no órgaun komunikasaun sosial sira nian no ba estabelesimentu entidade ne'e nian. 2. DEZENVOLVIMENTU SETÓR INFRA-ESTRUTURA NIAN Atu dezenvolve ita-nia Nasaun, no atu harii ekonomia ida ne'ebé modernu do produtiva, no atu kria empregu, ita presiza harii infra-estrutura bázika no produtiva sira. Maibé, tanba ita-nia nesesidade ne'ebé relasiona ho infra-estrutura sira ninia no kustu sei boot tebetebes, ita presiza planeia didi'ak, ita-nia programa infra-estrutura nian sira, ho dalan ne'ebé efikás no tetu didi'ak. Ba setór ida ne'e, ejize profisionalizmu, planeamentu ne'ebé di'ak, kontrolu ba sasán folin no relasaun ida ne'ebé di'ak entre presu no kualidade, husi materiál ka rekursus umanus no empreza kontratadu sira sai hanesan prioridade ida ba Governu ida-ne'e. Estrada, ponte, portu, aeroportu, edifísiu públiku, telekomunikasaun no konetividade ne'ebé ho kualidade hanesan baze fundamentál ba futuru Timor-Leste nian. 2.1 Estrada no Ponte sira Iha tinan rua hobalun oin mai, Governu sei kontinua hala'o programa investimentu nian ho eskala ne'ebé boot tebetebes, atu atualiza, reabilita no hadi'a ita-nia sistema estrada nasionál, munisipál no rurál ne'ebé boot lahalimar, nune'e mós atu garante katak rede ne'e sei hetan manutensaun ho di'ak. Ponte sai hanesan parte integrante estrada nian, nune'e, Governu sei kontinua halao rekonstrusaun ne'ebé hahú tiha ona husi Governu sira uluk hodi halo manutensaun ba ponte hamutuk 450 iha Timor-Leste. Engarrafamentu iha Dili kontinua sai hanesan preokupasaun, nune'e, sei implementa programa hodi hadi'a sirkulasaun tránzitu no seguransa rodoviária. Rede rodoviária nian ida ne'ebé abranjente no ho kulidade di'ak sai hanesan buat ne'ebé urjente, atu bele apoia ekilíbriu ne'ebé presiza iha ita-nia dezenvolvimentu nasionál, hodi fasilita transporte sasán ho presu ida ne'ebé natón, permite prestasaun servisu governu nian no promove agrikultura no kreximentu setór privadu nian. Timor Leste presiza programa rodoviáriu ida ba tempu naruk, katak la'ós de'it iha mandatu Governu ida ne'e nian. Nune'e, Governu sei implementa vizaun ida ne'ebé hakerek iha Planu Estratéjiku Dezenvolvimentu nian ba tinan 2011-2030, atubele: Aprezenta programa manutensaun rodoviária nian ida ne'ebé abranjente; Reabilita tomak estrada nasionál no munisipál hotu-hotu tuir padraun internasionál to'o tinan 2020. Harii ponte foun ne'ebé fó asesu ba populasaun, iha kondisaun atmosférika sa'ida de'it, ba estrada prinsipál sira, iha tinan lima nia laran, no ba iha estrada nasionál no munisipál sira seluk to'o tinan 2030. Harii insfra-estrtura ne'ebé presiza atu fó apoiu ba dezenvolvimentu parte tasi-mane nian; Estabelese padraun nasionál hodi halo estrada ida ne'ebé hale'u nasaun ne'e no implementa ida ne'e to'o iha tinan 2030. 2.1.1 Estrada rurál sira Governu sei fó liután atensasaun ba dezenvolvimentu área rurál sira, ho hanoin atubele fó tulun ba komunidade iha zona rurál sira, asesu ne'ebé boot liután ba merkadu no servisu públiku sira. Ho hanoin ida ne'e, Governu sei kontinua investe atu hadi'a no halo manutensaun ba estrada rurál sira, tuir implementasaun Programa Estrada ba Dezenvolvimentu (R4D). Hahú husi tinan 2015, Governu sei implementa rekomendasaun sira husi Planu Mestre Estrada Rurál nian. Husi tinan 2015 to'o 2017 preve ona atu halo reabilitasaun adisionál ba estrada mínumu kilómetru 268. To'o tinan 2017, Governu sei investe atu halo manutensaun ba estrada hamutuk kilómetru 521 iha área rurál sira ne'ebé reabilita tiha ona tuir padraun mínimu. Estrada sira ne'ebé liga sentru munisipiu ba sentru postu administrativu sira, sei konsidera hanesan prioridade hodi bele suporta liután volume tráfegu, tanba sai hanesan ligasaun importante transporte ba ema no sasán. Servisu sira ne'e empreza konstrusaun sivíl nian iha nivel lokál maka sei hala'o, no sei uza de'it mak ekipamentu hirak ne'ebé uza liman de'it, ho nune'e hasa'e númeru postu servisu nian iha nível rurál no munisipál. Sei konklui mós programa ida kona-ba konstrusaun ponte sira. Programa ne'e sei halo no reabilita ponte sira ne'ebé presiza halo, troka ka hadi'a. 2.1.2 Estrada nasionál no munisipál sira Iha tinan rua hobalun oin mai, Governu sei hahú programa ida ho dimensaun boot, atubele hasa'e estrada nasionál no rejionál ba padraun internasionál ida. Governu sei kontinua konsidera katak empréstimu mak sai hanesan fonte finansiamentu nian ida mós ba projetu foun sira, hodi halo ligasaun rodoviáriu ne'ebé krítiku liu iha ita-nia Nasaun hanesan komponente husi Programa Melloramentu Estrada Nasionál nian sira. Estrada ne'ebé halo ligasaun entre Dili – Manatutu – Baukau sei hahú nia konstrusaun iha tinan 2015 nia laran. Bainhira dezeñu detalladu kona-ba ligasaun rodoviária Baukau – Lospalus (inklui Lautén-Kom) no Baukau-Vikeke hotu ona, tuir planu iha 2015, no bainhira análize ba projetu sira ne'ebé hetan finansiamentu husi empréstimu halo tiha ona, mak, iha tinan 2016, konstrusaun ba obra sira ne'e nian sei hahú. Inísiu konstrusaun estrada sira ne'ebé liga Maubara-Karimbala, Loes-Mota Ain, Glenu-Ermera sei hahú molok tinan 2016 remata. Estrada ne'ebé halo ligasaun Manatutu ho Natarbora ninia konstrusaun sei fahe ba faze (pakote) rua. Faze dahuluk, husi Manatutu to'o dalan fahe ba Laklubar, tuir previzaun sei hotu iha tinan 2017 nia rohan, no faze daruak, husi dalan fahe ba Laklubar to'o Natarbora sei remata iha inísiu tinan 2018 nian. Estrada husi Manatutu ba Natarbora ne'e, ne'ebé oras ne'e daudaun iha kondisaun aat loos, sei hasa'e ninia kualidade tuir padraun estrada internasionál nian ida atubele asegura ligasaun rodoviária ne'ebé importante entre norte no sul no sei promove dezenvolvimentu área tasi mane nian. Projetu boot estrada nasionál nian sira seluk, ne'ebé oras ne'e daudaun iha hela faze konstrusaun nian, maka hanesan estrada husi Dili-Likisá, Tibar-Glenu, no Karimbala-Loes tuir previzaun sei hotu iha tinan 2017. Ligasaun estrada nian ne'e inklui husi Tasi-tolu – Tibar, Maubara - Karimbala, Glenu – Ermera. Estrada sira ne'ebé eziste iha parte tasi mane nian, sei hadi'a mós tuir padraun internasionál, no kona-ba proposta auto-estrada Suai-Beasu, iha prosesu adiamentu nian to'o prienxe kondisaun hirak ne'ebé presiza atu avansa ho projetu ne'e. Governu sei konkretiza mós programa ida kona-ba reabilitasaun estrada iha munisípiu sira, inklui mós estrada sira iha Rejiaun Administrativa Espesiál Oe-kuse Ambenu no Atauru. Projetu sira ne'ebé atu konkretiza ne'e hanesan kategoria prioritáriu no bazeia ba estudu no dezeñu tékniku ne'ebé detalladu. Sein diminui importánsia husi projetu Tasi-Mane nian, no atubele dezenvolve ita-nia indústria petrolífera no dudu dezenvolvimentu sosio-ekonómiku iha parte tasi-mane nian, projetu estrada Suai-Beasu ne'ebé tuir planu atu hahú iha períodu tinan 2012-2017, agora daudaun iha hela revizaun nia laran tuir estimasaun sei hahú husi mandatu ne'e nia rohan. Iha tinan rua hobalu oinmai, konstrusaun projetu estrada Dili-Aileu-Maubise-Aitutu-Ainaru-Kasa sei hahú. Projetu ida ne'e sei loke tan koredór importante ida entre norte-sul, hodi fó asesu ba parte sentrál Timor-Leste nian, hodi promove turizmu, liuhusi ligasaun ne'ebé di'ak ba zona turístika Maubise no Hatubuiliku nian. Tanba liuhusi foho barak nia leet, projetu ida ne'e sei presiza estudu ne'ebé kle'an, planeamentu nebe di'ak no sei halo determinasaun kona-ba kustu ne'ebé loloos, ne'ebé sei sai hanesan responsabilidade Governu nian. Estrada sira iha sentru urbanu sira no iha Dili sei hetan nafatin konsiderasaun atu hadi'a. Governu sei kria programa ida kona-ba hadi'a, halo reabilitasaun no manutensaun ne'ebé apropriadu ba estrada urbana sira. Empreza konstrusaun sivíl nasionál hirak ne'ebé kualifikadu maka sei hala'o serbisu obra estrada urbanu sira nian, liuhusi konkursu públiku. Kona-ba dezeñu no supervizaun, kompañia konstrusaun sivíl internasionál nian sira maka sei halo, hamutuk ho kompañia konsultór nasionál sira. Durante nia mandatu, Governu sei buka atu realiza mós programa ida kona-ba manutensaun kompriensiva (ho rotina no periódika) ba estrada husi kategoria hotu-hotu, husi nasionál to'o rurál. Ne'e hanesan programa investimentu ne'ebé signifikativu ba manutensaun infraestrutura sira, atu infraestrutura sira ne'e labele aat, ho nune'e bele evita gastu sira ne'ebé la presiza ba reabilitasaun no rekonstrusaun. Prevee ona atu halo manutensaun ba estrada nasionál no munisipál ho totál kilómetru 1.426, aleinde ne'e, estrada rurál pelumenus kilómetru 521 sei reabilita mós to'o tinan 2017. 2.1.3 Anél (kadeli) auto-estrada nasionál Dezenvolvimentu eknómiku no sosiál Timor-Leste nian ezije Kadeli Auto-estrada Nasionál ida. Auto-estrada ne'e sei iha faixa (jalur) rua, iha ida-idak nia sentidu (kareta ho motór labele hasoru malu) no hale'u nasaun ne'e hanesan kadeli ida. Auto-estrada ne'e sei harii neneik tuir faze, ne'ebé faze dahuluk nian sei envolve kontrusaun estrada nasionál ho de'it faixa ida iha sentidu ida-idak (katak kareta ho motór bele hasoru malu). Iha faze inisiál konstrusaun nian sira sei fó espasu atu bele aumenta tan faixa ida. Governu sei hahú halo konsepsaun, planeamentu no determinasaun kona-ba kustu ba auto-estrada tomak, no hein katak, to'o 2030, Anél Auto-Estrada Nasionál nian hotu ona. 2.2 Bee no saneamentu Estratéjia kona-ba jestaun rekursu bee moos nian sai hanesan buat ne'ebé urjente, nune'e mós jestaun ba servisu abastasimentu bee no saneamentu báziku, ne'ebé importante tebes ba futuru nasaun nian, tanba elementu sira ne'e hotu hadi'a saúde públika nian, kria empregu no enkoraja dezenvolvimentu lokál no fasilita manutensaun no sustentasaun rekursu bee nian sira ne'ebé importante no mós infraestrutura sira seluk. Iha Timor-Leste, iha buat rua maka kauza maka'as liu mortalidade ba labarik ki'ik no kosok-oan sira ne'ebé foin moris - infesaun respiratória (kona ba pulmaun) no diareia (kabun moras) - kauza rua ne'e iha relasaun direta ho falta bee moos nian no saneamentu báziku no mós ijiene ne'ebé la di'ak. Maske populasaun ne'ebé iha asesu ba bee kanalizadu, posu ka bee bomba ne'ebé protejidu, rezervatóriu bee mós ka bee engarafadu, aumenta husi 48% iha tinan 2001 ba 66% resin iha tinan 2010, Governu rekoñese katak presiza halo serbisu liután, hodi bele garante ba sidadaun hotu-hotu hetan asesu ba bee moos no saneamentu ne'ebé di'ak. Governu konsidera importante tebes atu avalia oportunidade sira ne'ebé relasiona ho reforma institusionál sira iha setór bee no saneamentu nian, no kriasaun entidade reguladora ida. Nune'e, Governu sei investe maka'as iha servisu importante sira, ne'ebé mak iha relasaun ho abastesimentu bee no saneamentu, iha área sidade ninin no sentru munisípiu nian sira, eskola, klínika no ospitál sira iha Dili. Investimentu ida ne'e la'ós sai hanesan de'it insvestimentu kapitál maibé investimentu iha operasaun no manutensasun servisu sira ne'e nian. 2.2.1 Bee no saneamentu iha nivel rurál no munisipál Entre tinan 2015 to'o 2017, atu aumenta tan asesu ba bee moos iha hela-fatin iha área rurál sira, sei halo instalasaun sistema bee mós nian pelumenus 125. Aleinde ne'e, iha área infra-estrutra nian, Governu sei apoia asesu ba saneamentu iha área rurál sira, liuhusi harii latrina públika sira, promosaun komersializasaun produtu sanemanetu nian sira ho folin ne'ebé natón, nune'e mós liuhusi apoiu ba membru família nian hirak ne'ebé vulnerável. Infraestrutra bee no saneamentu nian barakliu iha fatin urbanu sira hanesan estasaun bomba bee nian, kanu tranzmisaun nian, válvula no tanke bee nian, barak maka sofre estragu iha tinan 1999. Governu sei hadi'a neneik infraestrutura sira ne'e, hodi garante abastesimentu ne'ebé seguru kona-ba bee kanalizadu ba uma sira iha área urbana, sentru munisípiu sira, bele fornese bee ba iha uma sira iha área urbana, sentru munisípiu sira, nune'e mós ho solusaun sira ne'ebé sei inklui sistema rekolla ezgotu, instalasaun atu halo tratamentu ba bee fo'er sira no ba fatin ikus ba lixu isin sira husi sidade. Tuir Planu Dezenvolvimentu Nasionál, atensaun sei fó liuliu iha área sira ne'ebé iha situasaun krítika liu, hanesan Baukau, Manatutu, Lospalus no Suai. Ida ne'e bele halo to'o tinan 2017, liuhusi: Dezenvolvimentu Planu Jerál ida ba Sentru Munisípiu sira, hanesan Baukau, Vikeke, Lospalus no Same, ho hanoin atu estuda solusaun no hatúr prioridade hodi halo intervensaun iha setór bee no saneamentu nian. Dezenvolvimentu solusaun sira kona-ba abastesimentu bee iha Suai. Implementasaun Planu Jerál Bee nian ba Manatutu no Oe-kuse. Hadi'a furu (fatin fura bee husi rai-okos), hadi'a kanu bee nian ne'ebé aat, no tau tuir regra ligasaun hotu-hotu. Lokalizasaun no konsolidasaun fonte bee nian foun sira. Harii fatin rezerva bee nian no instalasaun tratamentu nian. Ligasaun bee kanalizadu ba uma sira. Monitorizasaun no kontrolu kona-ba sistema rekolla bee fo'er husi instalasaun públika, komersiál, industriál, sosiál no hela-fatin sira. Levantamentu kona-ba fatin ikus atu soe lixu isin sira. Investimentu iha programa operasaun no manutensaun nian. Aleinde ne'e, importante atu hahú halo levantamentu kona-ba ita-nia rekursu bee nian sira iha territóriu Timor-Leste laran tomak, no mós kria enkuadramentu legál ba utilizasaun bee ba fin oin-oin. Governu sei fornese mós bee knalalizada ne'ebé seguru ba eskola públika hotu-hotu to'o tinan 2020, liuhusi programa ida hanaran Bee ba Eskola. 2.2.2 Bee no saneamentu iha Dili Atu abastese bee ho kuantidade ne'ebé sufisiente, ba uma barak liután iha Dili laran, Governu sei buka hetan tan fonte adisionál sira atu aumenta tan kuantidade bee ne'ebé agora iha, no mós sei halo tratamentu ba bee ne'e, tuir padraun bee hemu nian. Ida ne'e sei bele hetan liuhusi oinsá hetan bee no halo tratamentu ba bee, husi fura bee husi rai-okos, mota no fonte bee nian sira seluk, liuhusi manutensaun no hadi'a instalasaun tratamentu bee nian sira, no hadi'a instalasaun sistema distribuisaun nian ba área servisu nian sira, hodi liga uma barak liután ba sistema distribuisaun nian. Governu mós sei reabilita sistema abastesimentu ne'ebé iha nanis ona, liuhusi reparasaun sistemátika ba bee hirak ne'ebé fura husi rai-okos, kanu sira ne'ebé aat, ba válvula no kontadór, sei fó formasaun ba ema atu halo monitorizaun ba kontadór sira ne'ebé instala tiha ona, no estabelesimentu sistema selu bee nian, ba ema-hotu. Ba uma sira ne'ebé agora daudaun seidauk iha ligasaun ba sistema ne'e, sei hetan atensaun mós hodi asegura katak sei la iha ligasaun ilegál. Sei realiza mós estudu viabilidade ida kona-ba parseria públiko-privada (PPP) iha setór servisu abastesimentu bee nian sira iha Dili, atubele avalia situasaun sira tuirmai. Atu hamenus risku ba saúde no atu enkoraja dezenvolvimentu ekonómiku, Governu sei implementa Planu Jerál Ezgotu no Saneamentu Dili nian. Planu sira ne'e propoin atu hadi'a neneik nivel saneamentu nian, no mós reabilitasaun ezgotu ne'ebé oras ne'e iha, no haketak ezgotu husi drenajen bee fo'er nian husi drenajen udan-been nian. Planu Jerál Saneamentu no Ezgotu Dili nian sei abranje área urbana tomak iha Dili ne'ebé populasaun hela ba, ne'ebé tuir previzaun, sei aumenta ba 240.000 iha tinan 2025. Tuir previzaun, iha tinan 2025, populasaun Dili nian sei prodús bee fo'er 28.800 m3/loron ida. Ita presiza halo buat ruma agora kedas, hodi bele jere ita-nia kreximentu iha futuru. Governu sei haree uluk ba área sira ho densidade populasaun média no aas, hamutuk ho área komersiál, industriál no institusionál sira, atu hahú buat hirak ne'ebé sai hanesan prioridade iha área saneamentu nian. Objetivu Governu nian mak atu estabelese sistema ezgotu nian ida ne'ebé bele kobre ona maior parte Dili nian. Iha área ne'ebé la permite atu halo ligasaun direta ba ezgotu sira, sei halo tanke séptiku izoladu no sei entrega ba servisu ne'ebé akreditadu hodi periodikamente ba hasai hodi ba tau iha fatin ne'ebé destinadu. To'o tinan 2025, Governu sei posibilita atu infraestrutura sira bele sai sustentavel, bele opera no mantein ona ho di'ak, hodi rekolla, halo tratamentu no elimina ezgotu sira iha Dili. Governu mós sei buka haree estratéjia ida kona-ba jestaun reziduu1 hirak sólidu (fo'er/lixu rezistente) nian, inklui hadi'a atuál lixu-fatin iha Tibar, no mós buka solusaun seluk ba destinu finál reziduu sólidu sira ne'e. 2.2.3 Hadi'a drenajen sira Rai Timor Leste ne'ebé ho foho barak no klima monsaun1nian,ne'ebé hamosu bee-sa'e no rai-monu iha área rurál no urbanu sira. Rai-monu no bee-sa'e maka sai nu'udar kauza prinsipál hirak kona-ba kolapsu2no destruisaun estrada sira. Kanál apropriadu ba drenajen hirak ne'ebé iha no jestaun ida di'ak ba planu sira hasoru bee-nalihun bele ajuda hakmaan ita hosi bee-sa'e no rai-monu sira.Governu sei realiza servisu enjeñaria ne'ebé nesesáriu atu hakbiit komunidade lokál sira hodi bele buka solusaun lokál ba problema hirak kona-ba drenajen.Parte fundamentál ida hosi solusaun hirak ne'e maka manutensaun ba drenajen hirak atuál. Governu sei implementa Planu Jerál Drenajen nian hodi bele hamenus maka'as liután problema hirak kona-ba bee-sa'e no drenajen. Área kaptasaun sira ne'ebé iha li'ur hosi Dili, aas tebe-tebes, balun bele to'o metru 1.100 sura hosi nível tasi nian, besik 9 km hosi nivel bee nian. Bee-sulin hirak iha Dili, hetan área totál kaptasaun nian besik 280 km2, ida boot liu maka mota Komoro, ho besik 220 km2 . Volume kaptasaun nian hamutuk 90%, maka suli ba tasi, liuhosi bee-sulin haat: Comoro, Maloa, Kuluhun no Santana. Iha basia rua hodi tahan bee suli neineik, ida iha mota Maloa no seluk iha mota Becora, ne'ebé ema nahe atu hamenus korrente-bee nian, durante udan maka'as. Maske nune'e, basia hirak ne'e oras ne'e fo'er taka hela, hodi la sai operasionál. Governu sei enkomenda servisu hirak tuirmai, hanesan faze 2 hosi Planu Jerál Drenajen nian, hodi bele hamenus bee-sa'e tanba udan maka'as. Limpeza no ke'e-sai materiál hirak to'os, inklui rezíduu hirak to'os sedimentu no vejetasaun ne'ebé taka netik kanu ezgotu sira. Ke'e halí'is ka dada hali'is fali nível kanál sira hodi bele aumenta ninia inklinasaun ka ke'e-sai parte hirak aas ka tetuk iha kanál sira. Nahe fali basia tahan bee nian sira. Harii kanál ida atu tahan bee nian. Hadi'a mota Kuluhun no Maloa. Halo fali dezeñu kanál nian sira atu aumenta área transversál nian, hodi nune'e bele aumenta kapasidade korrente bee nian. Hadi'a bee-dalan iha estrada sira no dolak iha rai hirak aas, hodi halolon bee ba kanál drenajen nian sira. 2.3 Eletrisidade Governu sei uza rede eletrisidade ne'ebé foin hadi'a no haluan tan iha Timor-Leste, hodi bele dada eletrisidade ba país tomak. Eletrisidade maka fatuk-inan hodi haburas ekonomia, tanba ne'e maka, dada eletrisidade iha area rurál, sei lori benefísiu boot tebes ba ita nia povu.Ita sei garante atu ita nia populsaun bele hetan loron-loron, eletrisidade iha oras 24 nia laran. Enerjia hirak renovável no dada eletrisidade iha área rurál sei sai nu'udar rin-inan rua ba ita nia ajenda kona-ba eletrisidade, no tanba ne'e maka Governu hakarak kontinua hala'o programa ida ne'e, maibé ho forma ida apropriadu liu, bazeia ba análize ida kle'an kona-ba kustu no benefísiu sira. Ita sei kontinua hala'o programa kona-ba atu harii, liuliu iha área hirak dok hosi sidade, fasilidade enerjia solár no eóliku1nian, ne'ebé baratu no fasil atu harii, no sira bele asegura 10% hosi ita nia nesesidade ba enerjia, ne'ebé sei sujeita hela ba análize ida atu informa kona-ba desizaun ne'ebé sei determina destinu programa ne'e nian. Governu buka adia investimentu sira ne'ebé atu harii, ba da-lima, enerjia anin nian iha Lariguto no Bobonaro, hodi bele liga ho Rede Nasionál. Sentru Solár ne'ebé atu harii iha Hera, hakarak atu hetan proveitu boot liu, iha enerjia solár no atu hamenus dependénsia ba kombustível. Iha tinan rua ho balun tuirmai, Governu sei introdús meiu sira atu rekolla reseita sira, hodi nune'e bele aumenta rendimentu nasionál sira, bele hamenus kustu operasaun nian no bele asegura atu iha atendimentu ida di'ak liu iha setór eletrisidade nian. Governu mós sei avalia kondisaun setór ne'e nian, hodi estuda opsaun hirak di'ak liu no hodi determina estatutu apropriadu liu ba EDTL. 2.4 Transporte sira 2.4.1 Transporte marítimu sira Ho transporte marítimu sira, maka bele transporta naha hirak todan no boot ho kuantidade maka'as maibé ho kustu ki'ik, kompara ho transporte aéreu no terrestre. Iha ámbitu ida ne'e, maka tande'it Timor-Leste hanesan Nasaun ida ho kosta marítimu no, sei dependente ba importasaun produtu esternu sira, tenke hetan atensaun boot liu ba dezenvolvimentu setór ida ne'e nian. Governu sei tau atensaun no hatuur investimentu ne'ebé nesesáriu atu hadi'a kapasidade rekursu umanu nian sira, dezenvolvimentu institusionál, dezenvolvimentu lejizlasaun nian, no infraestrutura fíziku sira, hodi bele hadi'ak liután setór ida ne'e. Atu habelar ekonomia Timor-Leste nian, presiza aumenta kapasidade portu marítimu nian sira, la'os de'it iha kosta norte maibé mós iha kosta súl. Dezenvolvimentu infraestrutura portu marítimu nian sira mak esensiál hodi Timor-Leste bele importa sasán no ekipamentu hirak importante tebes , ne'ebé bele fo impulsu ba ninia ekonomia no bele harii infraestrutura hirak importante, nune'e mós atu bele apoia indústria esportasaun, inklui kafé, produtu mina-rai nian, ikan, na'an, ai-fuan no ai-han musan. Ita labele kontinua sai dependente nafatin ba úniku portu Nasionál ne'ebé iha Dili, ne'ebé maka ninia kapasidade la to'o ona, atu simu volume naha nian, ne'ebé hetok boot kompara ho ninia kbiit. Timor-Leste iha mós instalasaun portu nian sira iha Hera, Tibar, Oe-Cusse, Karabela, Ataúro no Kom, maibé sira nia estadu konservasaun aat hela. Aspetu importante ida ne'ebé presija haree, maka portu sira iha Oe-cusse no Ataúro ne'ebé sai nu'udar meiu hirak signifikativu ba asesu rejiaun hirak ne'e nian, bainhira kompara ho fatin hirak seluk iha Timor-Leste. La iha portu ka instalasaun sira ba ro-ahi ki'ik iha kosta súl, hodi nune'e mak agrikultura no indústria sira hotu depende de'it ba transporte rodoviáriu to'o iha norte. Transporte hirak ne'e, karun no ladún fiável. Governu sei harii portu Nasionál foun ida ne'ebé ho funsaun oin-oin iha Tibar, ho kapasidade atu simu kada tinan, tonelada tokon ida, no iha posibilidade atu simu ró komersiál no pasajeiru nian sira. Projetu portu Tibar nian sei envolve mós konstrusaun estrada ida ho nível internasionál, entre Dili no Tibar, konstrusaun molle1ida, instalasaun balun iha rai maran no sistema drenajen sira. Projetu boot infraestrutura nian ida ne'e, sei harii tuir faze, bainhira ezijénsia portu nian aumenta, no tuir alokasaun orsamentu nian, ne'ebé iha. Governu sei estabelese mós baze lojístik ida, ba setór petrolíferu iha Suai, ne'ebé konstrusaun portu foun ida, sei sai hanesan prinsipál pesa dezenvolvimentu nian. Instalasaun ida ne'e sei loke kosta súl hodi simu investimentu no kreximentu no sei sai hanesan pontu asesu internasionál mai Timor-Leste. Iha tempu badak nia laran, Governu sei estabelese programa integradu ida, iha nível intersetoriál, hodi dezenvolve infra-estrutura portuáriu sira iha kosta-súl, país ne'e nian. Portu foun iha Suai, sei sai hanesan pontu entrada, ba materiál no ekipamentu sira, ne'ebé sei sai nesesáriu atu harii infraestrutura sira no instalasaun indústria petrolífera nian sira. Sei sai mós hanesan portu marítimu ho funsaun oin-oin, no sei inklui parke kontentór nian sira, área lojístika armazein nian ida no instalasaun armazein ba kombustivel sira. Portu ne'e mós sei inklui estaleiru sira atu halo no hadi'a ro-ahi sira. Konstrusaun ba portu ne'e sei ezije kebramár2 ida, hodi garante protesaun hasoru laloran hirak mosu mai hosi tasi Timor. Governu sei hatuur programa ida kona-ba konstrusaun portu nian sira, ne'ebé maka sei inklui konstrusaun, reparasaun ka alargamentu subtansiál instalasaun nian sira, hodi materializa prosesu hotu-hotu kona-ba pre-konstrusaun nian. Obra konstrusaun nian sira sei adia liután termu mandatu mandatu Governu ida ne'e nian. Nune maka, projetu hirak atu hala'o maka tuirmai: Entre Laga no Lautem, atu harii portu ida, ho molle hodi fó protesaun ba peska sira. Konstrusaun portu ida iha Atauro, hodi apoia transporte merkadoria no pasajeiru sira, nune'e mós peska no turizmu. Konstrusaun portu ida iha Kairabela, iha Postu Administrativu Vemasse, ho dimensaun ki'ik, atu asegura asesu besik liuhosi tasi ba sentru munisípiu Baucau. Konstrusaun portu ida iha Manatutu, ne'ebé atu harii kais dezembarke nian ida, hamutuk ho instalasaun sira refrijerasaun nian, hodi bele halo esportasaun produtu sira hanesan ikan no agrikultura nian. 2.4.2 Transporte aéreu sira Transporte aéreu iha Timor-Leste, maske presiza atu hadi'ak liután, maibé kontribui ona ba dezenvolvimentu ekonomia país nian. Transporte aéreu mós fundamentál ba dezenvolvimentu setór sira seluk, hanesan ezemplu ida maka turizmu. Governu nia objetivu atu fó kontinuidade ba programa hirak estabelase tiha ona, liuliu ba dezenvolvimentu aeroportu no aeródromu sira, aleinde ida ne'e, nia mós sei tau atensaun ba programa kona-ba dezenvolvimentu institusionál, tuir lei no operasionál nia sira, hodi hadi'a funsionamentu instituisaun nian sira no hadi'a prestasaun servisu nian sira. 2.4.2.1 Aeroportu internasionál Prezidente Nicolau Lobato Kondisaun aeroportu internasionál Prezidente Nicolau Lobato nian ladún di'ak ona, no presiza atu hadi'a no dezenvolve ninia aspetu importante sira, atu bele hatán ba númeru pasajeiru ne'ebé hetok aumenta, no bele permite atu aviaun hirak boot,bele uza aeroportu ne'e ho seguru. Dezenvolvimentu ida tuir faze, sei hahú iha tinan 2015 no sei dura to'o tinan 2018. Faze dahuluk sei halo elevasaun (estensaun) ba kapasidade aeroportu Prezidente Nicolau Lobato, liuliu estensaun pista nian no zona ba estasionamentu "apron", ne'ebé prosesu pre-konstrusaun nian sei hahú iha tinan 2015. Faze da-ruak, mak atu haluan no moderniza aeroportu, ne'ebé prevee ona atu hahú iha tinan 2017. Programa ida ne'ebé bele iha estudu viabilidade ba aeroportu munisipiu nian sira, sei prevee iha tinan 2016. 2.4.3 Transporte terrestre sira Dezenvolvimentu sósiu-ekonómiku Timor-Leste nian depende mós ba dezenvolvimentu transporte terrestre sira. Governu sei kontinua dezenvolve transporte terrestre, inklui dezenvolvimentu infra-estrutura no instalasaun apoiu ba transporte terrestre públiku no privadu sira. La'os de'it ba insfra-estrutura fízika, maibé Governu mós sei tau atensaun adekuada ba dezenvolvimentu institusionál, inklui kuadru legál ne'ebé maka presiza no estabelesimentu programa ida integradu no intersetoriál atuhodi hadi'a tráfigu no minimiza asidente rodoviáriu sira. Promove seguransa rodoviáriu konsidera prioridade ba Governu ida ne'e. 2.5 Telekomunikasaun sira Telekomunikasaun sira ne'ebé di'ak, sei halo ema sai unidu no apoia kreximentu empreza sira nian no prestasaun servisu governu nian sira. Liga aldeia ida ba sira seluk, liga vila no sidade sira no hosi ne'e ba mundu tomak. Telekomunikasaun sira ne'e esensiál ba dezenvolvimentu futuru Timor-Leste nian, inklui kria empregu, haburas empreza sira no prestasaun servisu hirak importante tebes, hanesan saúde, edukasaun no seguransa. Mundu tama ona iha era foun, tuir nivel teknolojia komunikasaun nian sira, ne'ebé ho aparellu hirak foun la uza fiu, no ho kustu asesu nian ne'ebé baratu liu, kompara ho tempu uluk nian. Era foun ida ne'e, ne'ebé hosi parte ida ekonomia sira ne'ebé mosu mai maka dirije, sei transforma lala'ok oinsá ema sira negoseia no oinsá sira liga ba malun no ba mundu. Governu determinadu ona atu garante katak, ita mós halo parte ba mudansa estruturál ida ne'e, iha nível relasaun globál, sosiál no ekonómiku sira. Planu Estratéjiku ba Dezenvolvimentu nia vizaun ba 2011-2030, katak, ita sei iha rede modernu ida kona-ba telekomunikasaun sira, ne'ebé sei liga ema ida ba ema seluk, iha Timor-Leste laran tomak, no ba mundu, ne'ebé maka sei permite ita atu aproveita másimu avansu sira iha nível telekomunikasaun globál nian sira. Merkadu telekomunikasaun sai liberalizadu ona tanba mosu konkorrénsia no hetan kompetidór foun sira. Ida ne'e halo servisu sira sai di'ak, aumenta kobertura rede movel, haluan asesu ba internet ho banda largu nian no sei hatún presu. Reforma hirak importante ne'e, dala barak hadi'a ona asesu ba servisu telekomunikasaun hirak ne'ebé barutu, fiável no modernu. Etapa tuirmai hosi reforma telekomunikasaun nian sira mak atu liga Timor-Leste ba fibra óptika terrestre no ba sub-akuátika ba-iha rede nasionál no rede internasionál nian ida. Realidade iha Timor-Leste maka sei kontinua depende ba ligasaun ho satelite ba internet ne'ebé la satisfás ona ezijénsia sira iha sistema telekomunikasaun sira modernu nian. Atu ita bele benefisia rede globál telekomunikasaun nian sira, ita presija hetan asesu ba kabu sub-akuatiku ida. 2.6 Aprovizionamentu projetu boot nian sira Governu ninia programa ida ne'e prevee atu halo servisu hirak importante tebes kona-ba infra-estrutura sira, inklui servisu hirak kona-ba portu, aeroportu no estrada sira. Haree ba importánsia sentrál ne'ebé projetu sira ne'e hetan iha ita nia dezenvolvimentu mak importante atu projetu sira ne'e bele remata ho fundamentu boa-governasaun nian ida no, ho relasaun di'ak ida ho kualidade ka kustu obra sira nian. Atu garante katak, projetu infra-estrutura nian sira bele implementa ho másimu efikásia no efektividade, maka Komisaun Aprovizionamentu Nasionál, iha tempu liubá, kontrata ona servisu sira hosi firma internasionál espesializada ida atu superviziona prosesu aprovizionamentu, ne'ebé relasiona ho projetu hirak boot no kompleksu. Servisu hamutuk ho Komisaun Aprovizionamentu, firma internasionál ne'e apoia jestaun prosesu aprovizionamentu nian, ho nível aas integridade no profisionalizmu nian, inklui prosesu sira planeamentu nian, preparasaun dokumentu ba konkursu, negosiasaun kontratuál sira no ajudikasaun kontratu nian sira, nune'e mós apoiu nafatin ba aprovizionamentu no monitorizasaun, durante implementasaun projetu sira ne'e. Hafoin transfere tiha koñesimentu ba ita nia rekursu umanu sira, no hafoin hala'o formasaun espesífika, mak oras ne'e espesialista timoroan sira ne'ebé formadu no kualifikadu mak asegura responsabilidade kona-ba aprovizionamentu nian. Ko'alia ba ida ne'e, Governu sei aprezenta Lei Jerál ida kona-ba Aprovizionamentu ne'ebé sei uniformiza kontratu, modelu no prosedimentu sira kona-ba aprovizionamentu, relasiona ho aprovizionamentu hotu-hotu Governu nian, inklui projetu boot sira. 3. DEZENVOLVIMENTU SETÓR EKONÓMIKU Timor-Leste, país ida ne'ebé ho rendimentu ki'ik, ho setór privadu foin hakbi'it-an, ladún iha diversifikasaun ekonómika, no konsentra de'it ba produsaun agríkola. Maibé, ita nia país iha oportunidade ekonómika sira ne'ebé boot, no potensia ida ne'ebé forte, atu sai Nasaun ida ho rendimentu médiu. Governu hakarak dezenvolve ekonomia merkadu ida ne'ebé dinámiku, ho setór privadu ida ne'ebé metin, hodi nune'e bele garante empregu ba timoroan sira hotu, no bele asegura katak fatin hotu-hotu, iha ita nia Nasaun, hetan dunik benefísiu husi dezenvolvimentu riku-soi, husi rekursu naturál Timor-Leste nian. Ita mós rekoñese katak, ita labele depende de'it ba ita nia rezerva sira, ne'ebé boot husi petróleu no gás naturál, tan ne'e presiza atu diversifika ita nia ekonomia. Ho ida ne'e, Governu sei konsentra liu- liu, ba-iha espansaun no modernizasaun ba ita nia setór agríkola, no ba-iha kriasaun setór turístiku ne'ebé forte nafatin, hodi mós enkoraja ita nia setór privadu ba nível sira ne'ebé aas, liuhusi haburas indústria no dudu empreza ki'ik no mikro-empreza sira. Maske Timor-Leste hasoru dezafiu hirak boot, kona-ba atu reestrutura ita nia ekonomia hodi atinje vizaun ida ne'e, ita iha pontu forte no vantajen barak, inklui rezisténsia no determinasaun ita nia povu nian, reseita petrolíferu hirak ne'ebé importante, riku-soi rekursu tasi nian no rekursu naturál sira seluk, ita nia lokalizasaun ba-iha rejiaun mós dinámika Sudeste Aziátiku nian, ne'ebé dudu daudauk parte barak hosi kreximentu ekonómiku mundiál. Ita mós sei iha ambiente naturál ne'ebé sei di'ak no mós, tau tan ita nia kultura, patrimoniu no istória ne'ebé úniku, buat sira ne'e hotu mak oferese poténsia di'ak tebes ba dezenvolvimentu setór turizmu no otelaria, ho valór aas. Maibé pontu forte ho vantajen sira ne'e, hasoru hela insfra-estrutura ne'bé aat, iha ita nia país nia laran, nune'e mós difikuldade iha área indústria, finanseiru no komérsiu nian sira. Atu konsege dunik dezenvolvimentu ekonómiku, Governu tenke rezolve dezafiu, barreira no kondisionalizmu hirak ne'e hotu. Governu kompromete nafatin atu kaer vizaun Planu Estratéjiku Dezenvolvimentu nian, ne'ebé dehan katak, to'o 2030, Timor-Leste sei kaer ekonomia modernu no diversifikadu, iha infra-estrutura ho kualidade aas tebes, inklui estrada, eletrisidade, portu no telekomunikasaun sira. Agrikultura subsisténsia sei lakon, hodi haburas fali ona agrikultura komersiál, husi proprietáriu sira ki'ik. Timor-Leste sei hetan auto-sufisiénsia iha ai-han, no sei hetan produtu agríkola oin-oin ba esportasaun, inklui buat seluk hanesan animal sira, ai-fuan no modo-tahan sira no kolleita komersiál sira seluk, nune'e mós produtu florestál no peska nian sira. Setór petrolíferu, inklui mós produsaun petróleu no gás no indústria sira ne'ebé sei mosu, mak sei sai nu'udar baze industriál ba ita nia ekonomia. Turizmu, liuliu turizmu ekolójiku, sei fó kontribuisaun maka'as ida ba ekonomia nasionál, nune'e mós indústria lijeira sira maka sei kompleta no halo ekonomia oin-oin. Atu konkretiza vizaun ida ne'e, Governu sei hatuur dezenvolvimentu ekonomia Timor Leste nian, iha indústria esensiál tolu : agrikultura, turizmu no petróleu. Timor-Leste iha vantajen ne'ebé boot iha indústria sira ne'e, tanba ita nia rekursu naturál sira, ita nia lokalizasaun jeográfika no ita nia perfil ekonómiku. Setór tolu ne'e sei hetan apoiu, husi inisiativa polítika lubuk ida, atu dudu kreximentu setór privadu nian, liuliu iha área rurál sira, hodi hadi'a prestasaun servisu no hodi hetan rezultadu, prioritáriu liu hodi hetan konkretizasaun ba objetivu dezenvolvimentu nian. 3.1 Agrikultura Governu sei enkoraja setór agríkola atu sai forte liután, hodi nune'e bele hamenus ki'ak, garante seguransa alimentár no promove kreximentu ekonómiku, hodi mós aumenta empregu, iha área rurál sira no tuirmai iha nasaun tomak. Setór agríkola ida ne'e buras ho di'ak, maka sei promove dezenvolvimentu rurál. Ita nia planu ba etapa da-uluk, mak atu konsege hetan seguransa alimentár. Tuirmai, sei halo promosaun ba produtu ai-han ba merkadu sira iha rai laran. Etapa tuirmai, sei halo promosaun no investimentu ba-iha melloria input ne'ebé presiza hodi fó garantia ba diversifikasaun no melloria kualidade produsaun nian ba esportasaun . Planu ida ne'e sei inklui servisu, atu hadi'a prátika agríkola nian sira, hodi aumenta fós no batar, nune'e bele hametin seguransa alimentár, no loke oportunidade ba moris di'ak iha zona rurál sira, no hamenus défise komersiál sira. Ita sei kontinua promove melloramentu ba produsaun kafé no mós baunilla. Governu sei asegura mós hatama bee ba agrikultura, hodi investe ba-iha infra-estrutura irigasaun nian, no halo rekolla no armazenamentu bee, no apoiu ba atividade akua-kultura, atu bele haburas setór peska nian sira. 3.1.1 Seguransa alimentár Governu sei hadi'a seguransa alimentár iha Timor-Leste, liuhusi promosaun uza teknolojia ba produsaun foun, inklui uza variedade foun hodi hetan produtividade aas, ne'ebé Ministériu Agrikultura iha ona, nune'e mós hodi aplika no emprega téknika foun ba kolleita no armazenamentu ba sereál sira (foos, batar, koto, fore) no produtu agríkola granulársira seluk, liuliu koto sira. Sei insentiva hodi aumenta produtividade no kolleita ba foos, hodi bele dezenvolve produsaun doméstika sereál importante ida ne'e, nune'e mós produtividade batar iha etare ida-ida. Atu hetan objetivu ida ne'e, Governu sei kontinua investe ba-iha reabilitasaun no alargamentu sistema irrigasaun no ba-iha melloria abastesimentu bee nian. (kontinua halo estudu viabilidade ba konstrusaun barrajen sira ba finalidade agrikola nian). Iha tinan rua ho balu oinmai, sei hala'o servisu formasaun nian ida, atuhodi aplika teknolojia adekuadu, hodi bele orienta agrikultór sira, kona-ba kolleita ne'ebé di'ak no métodu kona-ba kuda rai nian ne'ebé atu adota, tuir kondisaun lokál nian sira. Tuir Planu Asaun Nasionál "Timor Leste la iha Hamlaha no Malnutrisaun", Governu sei kontinua garante ba agrikultór subsisténsia nian sira, asesu ba formasaun no ba asisténsia téknika nesesáriu, hodi bele aumenta produtividade lokál no fortalese kapasidade rezisténsia komunidade nian sira,bainhira hasoru alterasaun klimátika no kreximentu populasionál. 3.1.2 Estratéjia hirak kona-ba riku-soi esensiál sira Governu sei buka aumenta investimentu no kapitál ba-iha kolleita xave, hanesan kafé no baunilla, noz-muskada no mina-nuu, sei tulun agrikultór sira iha setór ida ne'e, hodi fó paresér finanseiru no marketing espesializadu, no sei fasilita rezolusaun permanente ba kestaun hirak kona-ba na'in ba rai, iha área rurál sira. 3.2 Kriasaun animál Iha tina rua ho balu oin-mai, Governu sei kontinua ho planu atu hadi'a programa intersetoriál kona-ba hakiak Animal sira (karau, fahi, bibi no kuda), nune'e mós animál ki'ik sira (manu, koellu, ) iha área própriu dunik, liuhusi harii kooperativa sira ba objetivu ida ne'e. Sei hala'o nafatin kampaña nasionál sira kona-ba habelar programa ne'e, hodi promove kuidadu báziku saúde animal nian sira, inklui promove indústria agropekuária. Nune'e, ita sei fo kontribuisaun signifikativa ida ba melloramentu seguransa nutrisionál iha Timor-Leste, liuhusi aumenta asesu ba na'an fresku no asesu no fonte proteina nian husi susu-been. Governu sei fó mós vasina gratuitu ba karau, bibi, fahi no kuda no ba manu sira, hodi aumenta númeru animal hirak ne'e nian iha tinan rua ho balu oin mai. Governu sei hahú programa-pilotu foun ida kona-ba vasinasaun, atuhodi bele kontrola moras animal sira nian. 3.3 Peska Governu kontinua promove esplorasaun sustentável ba rekursu tasi nian, iha liña kosteira ne'ebé naruk kilometru 735, atu iha tempu mediu no naruk nian, bele fo benefisiu nutrisaun no ekonómiku nian, ba kada Munisipiu hosi Munisípiu kosteiru 11 ne'e. Sei kontinua tulun hodi kuda tan budu-tasi no promove hakiak boek no kadiuk. Governu sei promove programa apoiu ba atividade peska komersiál, iha área tasi Zona Espesiál Eskluzivu, ho finalidade komersiál sira. Estratejia Nasionál Dezenvolvimentu kona-ba Akua-kultura (hakiak ikan iha tanki) (2011 ba 2030) prevee atu halo dezenvolvimentu akua-kultura nian, hodi halo remata seguransa alimentár no nutrisaun nian iha país laran, liuliu, iha área rurál sira. Ba ida ne'e, Governu sei investe iha estabelesimentu akua-kultura ikan nian, hanesan ikan tilápia no espesie seluk ne'ebé iha valór komersiál no iha nutrisaun, hodi bele fornese ikan ba iha área sentrál sira iha país laran, no mós, liuliu, hadi'a merenda eskolar liuhusi proteina sira. Governu sei revee lisensa ba peska komersiál ba-iha bee zona territoriál no Zona Ekonómika Espesiál nian, atuhodi bele garante esplorasaun sustentável rekursu marinu sira, hanesan mós hodi asegura prazu médiu no naruk nian, retornu ekonómiku boot ba ita ninia país. 3.4 Floresta no área protejidu sira Iha tinan rua ho balun nia laran oin mai, Governu sei kontinua promove no investe iha reflorestasaun, liuliu ba-iha área ne'ebé afetadu no mós ba-iha bee-lihun sira ho espésie rasik no ho valór komersiál, atuhodi prezerva biodiversidade naturál, koservasaun rai no minimiza impaktu sira erozaun nian ba-iha foho sira ne'ebé la iha ai sira. Governu kontinua fó apoiu ba programa ne'ebé hala'o hela, relasiona ho área protejida, ne'ebé iha rai ka iha tasi laran. Tau atensaun espesiál ba protesaun Parke Nasionál ne'ebé iha ona, nu'udar kondisaun ne'ebé nesesáriu no fundamentál hodi halo prezervasaun ba biodiversidade no "banku jenétiku" país nian. Governu sei etabelese kuadru legál ida hodi bele garante protesaun ba rekursu florestál sira no esplorasaun industriál rekursu hirak ne'e nian, ba finalidade komersiál sira . Governu sei kontinua fó apoiu no dezenvolve viveiru florestál sira no liuliu viveiru komunidade nian atu nune'e bele hetan partisipasaun efetiva husi populasaun sira ba-iha programa reflorestasaun no koservasaun ba solu no biodiversidade. 3.5 Petróleu no minerál sira Setór petrolíferu, maka sei sai nu'udar pilar fundamentál ba ita nia dezenvolvimentu futuru-esensiál la'ós de'it ba ita nia forsa no kreximentu ekonómiku, maibé mós ba ita nia progresu iha futuru, nu'udar Nasaun ne'ebé hetan susesu di'ak no estável. Bainhira ita dezenvolve setór ida ne'e, ita sei presiza asegura katak riku-soin husi rekursu naturál sira Timor-Leste nian, uza dunik atu harii ita nia Nasaun no atu fó apoiu ba ita nia povu. Oras ne'e, Timor-Leste seidauk iha infra-estrutra importante sira, indústria apoiu nian no rekursu umanu atu opera no jere ita nia setór petrolíferu tomak. Ida ne'e, maka halo ita lakon oportunidade mesak boboot ba ita nia povu no ba ita nia Nasaun. Governu sei servisu, atu kaer metin oportunidade sira ne'e, no atu alarga indústria petrolíferu, hodi nune'e indústria ne'e bele oferese aliserse ne'ebé metin, atu halo transformasaun estruturál ekonomia Timor-Leste nian ba-iha ekonomia ida halai liu ba-iha indústria petrolífera, ekonomia indústriál, esportasaun no servisu sira ne'ebé hetan susesu nian, ho setór privadu ida ne'ebé tasak ona no buras daudaun. Governu sei analiza, liuhosi kordenasaun ho Ministériu relevante sira, potensialidade diversifikasaun ekonómiku nian . Ho dezenvolvimentu ita nia Kompañia Nasionál Petrolíferu - TIMOR GAP, E.P., Governu sei haka'as-an hodi aproveita di'ak liu ita nia riku-soin, hanesan minarai no gás, no projetu Tasi-Mane, iha Kosta-Sul. Ita sei fó garantia ba kualifikasaun no esperiénsia ne'ebé timoroan sira presiza hodi nune'é bele lidera no jere dezenvolvimentu ita nia indústria petrolífera. Ita sei kontinua ho kompromisu metin kona-ba transparénsia ba-iha kontabilidade reseita sira nian hahú husi setór petrolíferu . Hodi hatán ba dezafiu sira ne'ebé país hasoru, Governu sei hala'o servisu tuirmai ne'e: Reseita petrolífera sira sei kontinua sai transparente hotu no sei utiliza ba dezenvolvimentu sosiál no ekonómiku. Sei dezenvolve indústria petrolífera atuhodi bele hetan partisipasaun másima hosi sidadaun timoroan no empreza sira Timor-Leste nian. Sei hadi'a no dezenvolve rekursu umanu sira ne'ebé presiza ba operasaun indústria petrolífera nian. Sei dezenvolve kosta-sul atu fó apoiu hodi habelar ita nia indústria petrolífera rai laran nian, inklui mós sei estabelese infra-estrutura importante sira ne'ebé sei mós fasilita diversifikasaun ba ekonomia naun-petrolífera. Setór petrolíferu maka, sai nu'udar fonte reseita ne'ebé boot liu ba Orsamentu Jerál Estadu nian. Timor Leste deside ona atu hatudu transparénsia dunik ba rendimentu husi ninia rekursu pertolíferu, atu ema hotu bele haree retornu finanseiru, movimentasaun fundu públiku sira no retorno investimentu fundu petrolíferu nian. Kompromisu ne'e sei hatudu liuhusi adezaun ida loloos no nafatin ba mekanizmu sira internasionál transparénsia nian hanesan ho inisiativa ba Transparénsia ba-iha Indústria Extractivas (ITIE). Governu sei servisu atuhodi garante ita nia povu bele hetan benefísiu la'os de'it husi reseita petrolíferu maibé mós husi empregu no partisipasaun administrativa ba-iha Indústria petrolífera. Nune'e mak, ita bele hasa'e benefísiu ba ita nia povu, la'os mai husi de'it reseita minarai no gás. Atu ita nia povu iha posibilidade hodi partisipa maka'as liu iha konstrusaun indústria petrolífera, ita hahú ona programa estensu no kontinuadu ida ba dezenvolvimentu rekursu umanu nian. Programa ida ne'e sei inklui mós formasaun ba timoroan sira iha área importante sira hanesan jeolojia, enjeñaria kímika no petrolífera, finansas minarai no jestaun projetu nian sira. Formasaun ida ne'e hala'o liuhusi bolsa estudu internasionál ensinu superior ne'ebé ho reputasaun, liuhosi oportunidade sira dezenvolvimentu profisional funsaun públika nian iha Timor Leste no mós iha estranjeiru, liuhosi haruka pessoal sira ba-iha empreza internasionál minarai ho gás nian no mós liuhusi harii sentru formasaun ne'ebé relasiona ho hala'o atividade minarai no gás, iha Politékniku ida ne'ebé sei harii iha Suai . Aspetu Importante ida maka atu temi katak, parte barakliu husi programa ne'e, inklui bolsa estudu internasionál no doméstika, hetan finansimentu husi Fundu Kapitál Umanu no sei garante atu Timor Leste bele iha elementu sira ne'ebé iha kualifikasaun no esperiénsia ne'ebé presiza hodi lidera no jere dezenvolvimentu ba ita nia indústria petrolífera no mineira. Estratéjia dezenvolvimentu nian ba ita nia indústria petrolífera sei hala'o liuhusi operasaun no atividade husi ita nia Kompañia Nasionál Petrolíferu – TIMOR GAP, EP. Kompañia ida ne'e maka sei lidera dezenvolvimentu ba ita nia indústria liuhusi partisipasaun, responsabilidade no investimentu ba-iha ita nia setór petrolíferu. Sei halo Timor-Leste bele hola parte direta no benefisia espansaun setór ida ne'e nian. TIMOR-GAP sei kompromete hodi hasa'e kbi'it ita nia rekursu umanu sira no koñesimentu espesializadu kona-ba kestaun petrolífera sira, atunune'e Timor-Leste bele iha responsabilidade no partisipasaun . Entre 2015-2017 Governu sei hahú dezenvolvimentu indústria mineira nian ho aprovasaun ba kódigu mineiru, transformasaun Autoridade Nasionál Petróleu (ANP) ba fali Autoridade Nasionál Petroleu no Mineral (ANPM) no kriasaun ita nia Kompañia Nasionál Mineira – MINAS DE TIMOR (MdT). 3.5.1 Projetu Tasi-Mane Governu sei dezenvolve infra-estrutura sira apoiu nian, iha kosta-súl, atu dezolve minarai iha ita nia país, no atu bele hetan osan-funan ekonomia direta husi atividade indústria minarai nian. Projetu "Tasi-Mane" maka sei responsabiliza ba dezenvolvimentu plurianual, kona-ba indústria tolu iha kosta-súl, ne'ebé forma hun-kbiit indústria minarai Timor-Leste nian. Projetu ne'e sei envolve dezenvolvimentu zona kosteira ida, husi Suai to'o Bee-Asu, no sei garante ezisténsia infra-estrutura sira atu apoia indústria petrolífera doméstika ida ne'ebé atu sai boottán. "Tasi-Mane" ne'e sei inklui aglomeradu (kompleksu) Baze Fornesimentu Suai, aglomeradu Refinaria no Indústria Petrokímika Betano, no aglomeradu Instalasaun Gás Naturál Likuefeitu (GNL) Bee-Asu nian . Governu sei estabelese baze lojístika ida ba setór petrolíferu, iha Suai. Baze ida ne'e sei fó kapasidade atu kosta-súl bele dezenvolve ita nia setór petrolíferu doméstiku ida, hamutuk ho indústria no negósiu sira ne'ebé relasionadu no apoiu nian. Nia sei sai nu'udar portu entrada ba materiál no ekipamentu sira, ne'ebé maka presiza atu harii infra-estrutura no instalasaun sira indústria petrolíferu Timor-Leste nian.Suai sei sai sentru ida ba indústria petrolíferu iha Timor-Leste, hodi fó servisu no asegura lojístika no rekursu umanu sira. Ida ne'e sei inklui konstrusaun portu marítimu ida, kompleksu abitasionál ida iha Kamanasa, aeroportu reabilitadu ida iha Suai, ofisina ida ba metál pezadu sira (besi todan), no estaleirus (doka), atu konstroi ka repara ró-ahi sira. Baze fornesimentu Suai nian sei sai nu'udar baze ida industriál Nasionál no plataforma lojístika ida hodi dudu kria empregu no dezenvolvimentu ekonómiku iha kosta-súl. Baze ida ne'e mós, sei fó apoiu atu estabelese sentru petrolíferu sira, iha Betanu no Bee-Asu . Aglomeradu Betanu nian sei kompostu husi parke industriál ida, ne'ebé sei lokaliza indústria petrokímia no refinasaun sira, hamutuk ho sidade administrativa ida ba indústria petrolífera ne'e. Sidade ne'e sei fornese servisu abitasionál no sosiál no sei forma baze foun ida ba empregu iha kosta-súl. Sentru petrokímiku no refinaria ne'e sei harii, husi kooperasaun entre setór públiku no setór privadu. TIMOR GAP sei iha knaar fundamentál ida ba-iha dezenvolvimentu ida ne'e. Faze inisiál sei harii refinaria ida hodi prodús kombustível ba komsumu rai-laran nian, hanesan gazóleo, gazolina, kombustíve ba aviaun no alkatraun. Nune'e mós, produtu sira refinaria nian ne'e, sei esporta ba rai li'ur, hodi aumenta ita nia komérsiu produtu petrolíferu no gás nian sira . Aglomeradu Estasaun Gás Naturál Likuefeitu (GNL) Bee-Asu nian mak área ne'ebé, gazodutu (pipeline) ba gás naturál nian to'o territóriu Timor-Leste, no ne'ebé lokaliza instalasaun sira GNL nian hodi prosesa gás. Entre 2015-2017 sei kontinua hala'o estudu tékniku no hamamuk rai sira iha ne'ebá hodi kumpri objetivu ida ne'e. Atu bele liga aglomeradu tolu ne'e, no atu bele apoia kresimentu indústria petrolífera, sei konstroi estrada boot ida, husi Suai ba Bee-Asu. Estrada ne'e sei halo, tuir etapa sira. Sei dezenvolve kada etapa tuir nesesidade ekonómika no tuir kresimentu indústria no dezenvolvimentu naun-petrolíferu kosta-súl nian. Etapa dahuluk sei hahú iha 2015 no bele remata iha 2018. 3.6 Turizmu Beleza naturál, kultura no istória Timor-Leste nian bele halo indústria turizmu sai nu'udar setór industriál úniku no meiu importante ida ba ita nia dezenvolvimentu ekonómiku. Setór turizmu ida ne'ebé iha susesu di'ak sei hamosu empregu, sei prezerva no promove ita nia istória no sei kria negósiu sira ne'ebé bele fó benefísiu ba vizitante no ema timoroan sira, inklui restaurante, otél, sentru sira hodi deskansa no diverte-an no indústria sira ho dimensaun média. Tanba setór ne'e iha hela faze dezenvolvimentu hahú nian, Governu sei tau Timor-Leste, tuir estratéjia, hanesan país ida ne'ebé dada vizitante sira ba merkadu turizmu ekolójiku, mariñu, istóriku no aventura nian. Governu sei fasilita kresimentu indústria turizmu nian, liuhusi reabilitasaun infra-estrutura, inklui aeroportu Dili nian, telekomunikasaun no estrada sira iha fatin prinsipál balun ne'ebé define tiha ona ba atividade turizmu nian. Iha tinan hirak oinmai, Governu sei kontinua servisu ba-iha projetu konstrusaun, iha Dili, sentru formasaun ba turizmu no otelaria. Sei estabelese mós Sentru Informasaun Turístika nian ida iha Dili, Lospalos, Balibó no Baucau . Iha tinan rua ho balun nia laran, ita sei alarga ita nia atividade sira atu halo promosaun ba turizmu iha nível internasionál, inklui kalendáriu anuál ida, atu hatudu loloos ita nia eventu espesiál no ita nia atrasaun sira. Ne'e sei inklui tau pakote ki'ik sira viajen nia, ne'ebé sei hetan promosaun iha sentru turístiku sira iha Austrália no Indónezia, nune'e mós iha rejiaun Ázia-Pasífiku. Governu sei kontinua promove no alarga kampaña turístika no publisitária ho títulu "Dili, Cidade de Paz " (Díli Sidade Dame nian), ne'ebé inklui Maratona "Cidada da Paz", " haleu Timor Leste", ho bisikleta foho nian no liuhusi Munisipiu 13 ida idak iha País, "Concurso de Pesca de Ataúro", " Regata anual Darwin-Díli (Kompetisaun ró halai taru" tinan-tinan hosi Darwin-Dili"), "Concurso Internacional Fotografia de Mergullho" "Corrida de Aventura de Dili", ho "Festival Pesca de Kom". Ita sei kontinua promove realizasaun "Festival Caravana Nacional" ne'ebé sei reprezenta husi munisípiu oioin no komunidade no sira nia pontu prinsipál atrasaun turístik niana. Eventu hirak ne'e la'os de'it lori turista sira mai Timor-Leste, maibé mós atu foti ita-nia país nia perfil iha nível internasionál, tan ne'e mak ita sei kontinua haburas liután eventu importante sira ne'e. Governu sei prepara-an hodi hola parte iha "Exposição Universal Milão 2015, ho tema "Alimentar o Planeta, Energia para a Vida", ida ne'e mós atuhodi hasa'e perfil país nian. Nune'e mós iha 2015, Governu sei organiza komemorasaun tinan atus lima Portugés sira to'o iha Timor-Leste, ne'ebé sei hala'o iha Lifau . Governu sei servisu mós iha "Plano Mestre do Turismo", ne'ebé prevee asaun lubun ida (projetu fiziku, rekuperasaun infra-estrutura no ezekusaun obras nian), hodi nune'e bele hala'o mós atividade iha zona turístika espesiál tolu maka hanesan tuirmai ne'e. 3.6.1 Zona turístika orientál Zona Turístika Oriental, maka husi Tutuala to'o Kom no Baucau husi estrada kosteira to'o Hera. Zona ne'e, parte integrál husi ita nia oferta turístika (saida mak ita bele oferese ba turizmu), no inklui praia trópika sira ne'ebé sei moos hela, paizajen foho leten nian no atividade aventura nian, nune'e mós ezemplu sira arkitetura no kultura lokál portugés sira. Governu sei garante katak, Tutuala no Jaku tenke mantein moos nafatin, hodi nune'e bele oferese esperiénsia loloos ida kona ba turizmu ekolójiku ba ita nia vizitante sira. Ita sei transforma vila Kom nian ba-iha baze turístika ida ba área ne'ebá, ho ligasaun ba estrada kosta norte nian. Iha tasi ibun Baukau nian, Governu sei apoia atu estabelese "sentru turizmu ho kualidade di'ak". Sidade Baucau, sei funsiona hanesan baze hodi la'o ho ain de'it no ba vizita kulturál sira, tanba besik kedas foho Matebian. Reabilitasaun no alargamentu estrada boot sira iha kosta norte sei fasilita turista sira atu ba iha fatin sira ne'e. Ita sei implementa mós projetu turizmu komunitáriu iha área Vemase/Karavela nian. Ita sei tau sinál sira estrada nian, besik ba túnel funu japonés nian, ba-iha estrada súl Baukau no ita sei hatudu área orgullu nasionál ba-iha munisípiu orientál sira durante rezisténsia, inklui sira seluk tan, maka hanesan Mundu Perdidu. Ita sei kontinua promove Parke Nasionál Nino Konis Santana, nu'udar destinu turístiku, aleinde ninia estatutu nu'udar rezerva naturál, liuhusi formasaun ba mata-dalan lokál sira, no dalan sira iha área nia laran ne'ebé define tiha ona atu la'o ho ain de'it, tanba nakonu ho beleza naturál no ho signifikadu kulturál no istóriku. Sentru Informasaun Turístika iha Lospalos sei fornese konsellu no asisténsia ba viajante sira iha rejiaun ne'ebá, no mós sei organiza opsaun sira kona-ba alojamentu ba viajante sira atu sira bele hili hela iha uma familia nian sira. Hanesan mós fatin seluk, Parke Nasionál Nino Konis Santana iha sasán artístiku no fatin sira ne'ebé hatudu ema lokál sira nia fiar ba fatin no sasán lulik sira maka hanesan ba ita ninia paizajen, ahu-ruin, animál, dolok oan sira no sasán no matebian sira. Pintura sira ne'ebé iha ahu-ruin nia lolon iha Ili Kerekere, sei dada ema atu halo vizita turístika aleinde iha dansa rasik husi etnia ida ne'e nian, ne'ebé atu lakon dadauk ona. Governu sei promove forma, atu oinsá ita nia povu no vizitante sira bele hatene parte husi patrimóniu ida ne'e. 3.6.2 Zona turístika sentrál Zona turístika Sentrál inklui Kapitál Dili, illa Ataúro no rejiaun furak Maubisse nian. Governu sei hala'o programa dinámiku ida kona-ba dezenvolvimentu turístiku iha kapitál, tanba Dili mak odamatan prinsipál tama nian ita nia Nasaun. Ita sei loke Sentru Informasaun Turístika Timor-Leste nian iha Díli, atu fornese informasaun sira kona-ba fatin sira interese lokál no nasionál, nian, nune'e mós atu fornese informasaun turístika sira iha aeroportu . Ita sei tau sinál no informasaun sira hamutuk ba-iha área importante sira ba ita nia rezisténsia nasionál, inklui Semitériu Santa Cruz, Arkivu no Muzeu Rezisténsia nian, Komisaun Akollimentu, Verdade no Rekonsiliasaun no Sentru Memoriál Dare nian. Dili funsiona hanesan odamatan tama nian ba-iha illa Atauro, ne'ebé Governu sei promove espansaun turizmu ekolójiku, ne'ebé hahú dezenvolve ona no sei ko'alia liu kona-ba oportunidade sira turizmu mariñu nianno mergullu (luku iha tasi okos) ne'ebé iha ona. Husi Súl Dili nian, sidade Maubise sei funsiona hanesan baze ba turizmu iha área ne'ebá, inklui promosaun ba roteiru ida, ne'ebé sei husi Maubise to'o foho ne'ebé a'as liu Timor-Leste nian, Foho Ramelau, ne'ebé reabilita tiha ona Pouzada Maubise nu'udar referénsia importante atuhodi apoia objetivu ida. 3.6.3 Zona turístika osidentál Zona Turístika Osidentál inklui estrada boot husi kosta norte nian to'o Balibó, Maliana, Bobonaru no rai sira kuda kafé nian iha Ermera. Estrada boot kosta norte nian sei fó asesu ba praia no paizajen foho nian ne'ebé furafurak, iha parte ita nia nasaun ida ne'e nian. Governu sei promove "forte holandés ", iha Maubara, "forte portugés nian iha Balibó" no prizaun Ai-Pelo nian – uma ruin sira no futuru muzeu. Governu sei fó apoiu ba reabilitasaun Forte Balibó nian inklui harii otél ida iha forte ne'e nia laran, loke kafé ida, harii muzeu ki'ik ida, no tau sinál sira hodi fó hatene istória fatin ne'ebá nian . Governu sei promove turizmu ekolójiku, hodi fó-sai liu-liu kona-ba área kuda kafé nian iha Ermera no dezenvolve projetu sira turizmu komunitáriu iha Loes. Governu sei fó-sai promosaun ba bee manas Marobo nian, inklui hadi'a sinál sira no atualiza uma ruin no hela fatin nian sira, hodi nune'e bee-matan ne'e sai fatin importante ida atu bele dada ema atu halo vizita ba Zona Turístika Osidentál. 3.7 Enkorajamentu aumentu empregu nian Atu harii Nasaun ida no atu fó empregu no rendimentu ba ita nia povu, Timor-Leste presiza dada investedór sira, estabelese parseria ho firma internasionál sira atuhodi harii infra-estrutura sira no fó apoiu ba empreza lokál sira ne'ebé namkari iha país laran ne'ebé atu hahú no haburas- an. Presiza dunik, atu potensia investidór sira bele iha konfiansa katak, sira moris iha ambiente ida ne'ebé negosiu sira la'o ho justu no ne'ebé buat hotu la'o loos tuir lei, norma no prosesu sira ho impaktu kona-ba sira ninia ivestimentu sira. Nune'e mós, ita presiza garante katak, ita iha kontrolu ba-iha ita nia rekursu no ativu sira (taxa, impostu, reseita, donativu no patrimóniu sira), no ita estabelese orientasaun sira atuhodi dezenvolve hodi fó benefísiu ba ita nia populasaun tomak. Governu sei servisu hodi garante katak, emprezariu timoroan sira bele iha kualifikasaun no apoiu ne'ebé sira presiza atu identifika oportunidade sira negósiu nian, kria negósiu, habelar área foun sira ka merkadu, ka hahú esporta daudaun ona. Iha área barak ne'ebé emprezariu timoroan sira bele dezenvolve ekonomia no kria empregu, inklui turizmu, agrikultura, petróleu no indústria kulturál sira. Dezenvolvimentu empreza lokál sira no ita nia setór privadu sei suporta no dudu ita nia dezenvolvimentu nasionál, tan ne'e maka Governu sei fó atensaun liu atu garante katak ita nia povu bele konta ho apoiu, asesu ba finansas no ba formasaun emprezariál ne'ebé sira presiza atu hetan susesu. Governu sei kontinua hala'o polítika hodi promove investimentu privadu, inklui reforma ba regulasaun emprezariál sira, asesu ba mikrofinansas, promosaun Banku Nasionál ba Dezenvolvimentu no estabelesimentu Zona Ekonómika Espesiál sira. 3.8 Situasaun emprezariál no investimentu nian Futuru ita nia ekonomia nian ejiji atu kria setór privadu ida ho maturidade. Governu sei fó nafatin prioridade ba dezenvolvimentu situasaun emprezariál ne'ebé bele fó apoiu ba kresimentu setór privadu oin-oin no kria negósiu foun no indústria esensiál sira atu loke kampu servisu ne'ebé bele halo ekonomia nakfila ba ekonomia ne'ebé la depende ba ekonomia minarai nian de'it. Governu sei kontinua hadi'a situasaun emprezariál, liuhusi resposta sira ne'ebé adekuadu ba dezafiu importante sira, ne'ebé, bainhira la rezolve, maka sei la fó korajen ba investidór sira. Medida sira ne'e sei inklui aumentu kapasidade atu : Hetan finansiamentu; Obriga kumpri kontratu sira; Rejistu ba empreza sira, inklui simplifikasaun rejistu no aumenta koordenasaun interministeriál, nune'e mós Asegura títulu rai nian no rejista propriedade sira; no Rezolve disputa negosiál sira. Reforma sira ne'ebé ita halo ona to'o ohin loron fó ba Timor-Leste sistema tributáriu ida ne'ebé atraktivu liu ba negósiu sira, iha mundu. Nu'udar parte husi Reforma Fiskal ne'ebé atu hala'o, Governu sei revee impostu no taxa sira ne'ebé bele aplika ba empreza lokál sira, hodi nune'e bele garante katak sira iha nafatin kompetisaun no fásil liu atu administra no kumpri . Ita sei kontinua fó apoiu atu reforsa Kâmara Komérsiu no Indústria Timor Leste nian, atu nia bele fó ba ita nia emprezáriu sira formasaun, akonsellamentu, advokasia no reprezentasaun. Nune'e mós, Governu sei kontinua apoia no dezenvolve "Balkaun Úniku – SERVER" (fatin ida de'it atu atende ema sira ne'ebé hakarak trata surat kona ba negosiu), ka Servisu Rejistu no Verifikasaun Emprezariál nian, ba rejistu empreza sira nian, Ajénsia Espesializada Investimentu nian no sei dezenvolve "Governu Eletroniku" atu bele asegura alternativa efisiente ida atu sidadaun sira bele iha ligasaun ho Governu. Sei hametin liután, aktual sistema rezolusaun disputa nian, liuhusi hadi'a kapasidade sistema justisa nian, hodi rezolve disputa komersiál sira, estabelese mekanizmu alternativu ba rezolusaun disputa nian, inklui posibilidade hodi bele rekorre ba tribunál internasionál sira. Ikusliu, Governu sei haka'as an mós ba iha Dezenvolvimentu Ekonómiku Sub-Rejionál Integradu, ba ida ne'e iha ona unidade ida ho Misaun "ad hoc"hodi implementa plataforma dezenvolvimentu integradu nian entre Timor-Leste, Leste Indonesia no Norte Australia nian. 3.8.1 Parseria Públiku-Privadu sira Atu konstrói ita nia Nasaun no atu diversifika ita nia ekonomia sei presiza tebes kooperasaun entre setór públiku no setór privadu. Parseria Públiku-Privadu bele sai mekanizmu efektivu atu finansia no konstroi projetu sira infra-estrutura nian ne'ebé importante tebes atu halo ekonomia sai oioin. Governu sei kaer ba Dekretu-Lei ne'ebé iha ona no sei kontinua dezenvolve prosesu sira hodi halo identifikasaun, avaliasaun no konstrusaun ba infra-estrutura sira liuhusi Parseria Publiku-Privadu sira. Servisu ida ne'e sei kontinua inklui mós kriasaun kapasidade interna atu negosia, superviziona no jere Parseria Publiku-Privadu sira. 3.8.2 Banku Nasionál dezenvolvimentu Timor-Leste Dezenvolvimentu setór privadu Timor-Leste nian iha situasaun ida ne'ebé difísil atu hetan asesu ka la iha asesu ba kréditu no finansiamentu ba prazu ne'ebé naruk ba taxa sira ne'ebé bele hetan asesu. Ita nia empreza sira presiza kréditu atuhodi investe, haburas, sosa sasán no ekipamentu no hadi'a ninia instalasaun sira. Iha dunik nesesidade boot ne'ebé seidauk hetan resposta, kona-ba kréditu atu otél sira bele dezenvolve-an, vendedór sira ne'ebé faan sasán ba públiku bele sosa sasán barak liu no empreza sira konstrusaun sivil nian bele sosa ekipamentu pezadu, nune'e mós atu bele konstroi uma no eskritóriu sira. Governu sei haka'as-an nafatin hodi harii Banku Nasionál Dezenvolvimentu Timor-Leste nian atu hadi'a asesu, husi setór privadu, ba finansiamentu iha tempu naruk nian. Banku ida ne'e sei permiti empreza timoroan sira atu buras, kria empregu no konstrói infra-estrutura akonómika ita nia Nasaun nian . Ho apoiu husi parseiru internasionál, servisu halo deskrisaun no estrutura ba Banku Nasionál Dezenvolvimentu nian sei hala'o hela maibé ho konsiderasaun ba nesesidade katak halo jestaun ba Banku atuhodi fó apoiu ba konkorrénsia merkadu nian ba-iha setór finanseiru no insentiva, em vez de impede, kresimentu banku privadu . Governu fó ona apoiu hodi estabelese institutu vokasionadu ida ba investimentu nasionál, atuhodi ajuda emprezas sira ne'ebé kontribui ba kresimentu ita nia ekonomia nian, ho diretiva sira investimentu nian ne'ebé klaru no rigorozu, operasaun administrativa no komersiál independente sira no padraun ne'ebé aas kona-ba governasaun di'ak nian. Institutu ida ne'e sei kontribui hodi dezenvolve oportunidade sira investimentu nian no lori projetu estratéjiku no komersiál sira ne'ebé importante. 3.8.3 Banku Nasionál Komérsiu Timor-Leste nian Iha Timor leste, asesu ba kréditu sai problema ida ba emprezáriu ki'ik no mós ba individuu sira, inklui sira ne'ebé moris iha área rejionál no rurál sira. La iha kréditu impede empreza ki'ik sira atu buras, limita kapasidade ita nia sidadaun sira nian atu kria empreza no ida ne'e, impede ita nia ekonomia atu buras. Governu transforma ona Institutu Mikrofinansas Timor Leste nian ba Banku Nasionál Komersiál Timor Leste nian, ne'ebé iha ona ninia ajénsia iha Munisípiu ida-idak no to'o iha Postu Administrativu sira liuhusi veíkulu "banka móvel", no ninia servisu sira sei kontinua belar ba nafatin. Governu sei kontinua fó apoiu no haluan tan Banku ida ne'e, atuhodi serbí ita nia populasaun, atu presta servisu bankáriu no kréditu nian, hodi fó asesu ba servisu finanseiru ba timoroan sira no ba-iha mikro, empreza ki'ik no média sira iha sidade laran no mós ba-iha área rurál sira inklui mós dezenvolvimentu rurál . Iha kontestu ida ne'e mós, hala'o ona programa ida kona-ba dezenvolvimentu "mobile Phone Banking", ba-iha parseria entre Banku Nasionál Komérsiu Timor-Leste no Banku ANZ. 3.8.4 Zona Ekonómika Espesiál sira Tuir Planu Estratéjiku Dezenvolvimentu 2011-2030 nian, ne'ebé trasa ona husi Governu liubá, kona ba liña prinsipál sira ba programa dezenvolvimentu zona ekonómika nian iha territóriu laran tomak. Rejiaun Administrativa Espesiál Oe-Cusse Ambeno no Zona Ekonómika Espesiál Ekonomia Sosiál Oe-Cusse no Ataúro kria ona liuhusi lei. Lei ne'e estabelese polítika ida ba dezenvolvimentu ekonómiku no sosiál orientadu husi prinsípiu ekonomia sosiál merkadu ba espasu territoriál Oe-Cusse no Ataúro nian. Ataúru ne'e nu'udar pólu komplementár ida dezenvolvimentu nian iha Zona Espesiál nia laran. Modelu ekonomia nian iha karaterístika inkluzivu, partisipativu ekonómiku no sosiál ne'ebé diversifikadu, sustentadu no sustentável, ne'ebé investimentu hetan benefísiu espesiál, dezenvolvimentu infra-estrutura ne'e fundamentál no dezenvolvimentu ne'e sai prioridade ida. Governu sei kontinua fó apoiu ba projetu ida ne'e ho hanoin ida katak modelu foun dezenvolvimentu ekonómiku sosial ida ne'e bele atrai investimentu esternu no internu.Kria ona mós Fundu Espesiál ba Dezenvolvimentu nu'udar institutu fomentu nian ho definisau ba ninia knaar jerál sira. Benefísu sira mai husi Zona Ekonomika espesiál sira, inklui : Promosaun ba dezenvolvimentu setór indústria no servisu nian sira, liu liu ba-iha setór sira ne'ebé tama ona iha planu. Kriasaun empregu no hamosu rendimentu nasionál sira. Kresimentu indústria esportasaun nian. Kriasaun oportunidade ba empreza internasionál sira. Hadi'a infraestrutura nasionál sira. Kazu Timor-Leste nian, implementasaun projetu pilotu ba Zona Espesiál Ekonomia Sosiál Merkadu, sei sai nu'udar projetu pioneiru ida dezenvolvimentu integradu nian ne'ebé hala'o hamutuk ho dezenvolvimentu sosiál ba dezenvolvimentu ekonómiku, ne'ebé ita fiar katak bele sai hanesan kazu susesu ida ne'ebé investimentu públiku sei hamosu kresimentu ekonómiku sustentável. 3.8.5 Apoiu adisionál ba aumentu empregu iha área rurál sira Dezenvolvimentu rurál sai nu'udar preokupasaun prioridade nian ida ba Governu, tanba besik pursentu 70 husi ita nia populasaun maka moris iha área rurál sira. Iha nível nasionál populasaun aumenta daudaun, no karik ritmu ne'e mantein maka populasaun Timor-Leste nian sei aumenta lais-liu iha tinan hirak oinmai. Governu sei implementa polítika atu garante empregu ba joven sira iha área rurál no mós iha área urbana ne'ebé boot, nune'e mós ajuda garante seguransa alimentár, kriasaun empregu no hamenus kiak. Governu nia programa ba dezenvolvimentu rurál, hetan apoiu husi ita nia planu globál atuhodi dezenvolve ekonomia Timor-Leste nian bazeia ba indústria tolu ne'ebé importante tebe-tebes: agrikultura, turizmu no petróleu. Maibé mós hetan apoiu husi inisiativa polítika espesífika oioin ne'ebé atu orienta kresimentu setór privadu nian iha área rurál sira . Diseminasaun no sustentabilidade dezenvolvimentu nian sei la akontese bainhira la iha apoiu ne'ebé seguru no permanente husi setór sira seluk, liuliu transporte no estrada sira, bee no saneamentu, eletrisidade, saúde no edukasaun. Progresu dezenvolvimentu rurál nian bele la'o lais sei iha ligasaun direta ho reabilitasaun no melloria ba infra-estrutura sira Nasaun nian ne'ebé mós la'o ho lais. Kona-ba dezenvolvimentu rural iha Timor-Leste nia laran tomak, setór privadu iha kapasidade atu hetan kna'ar ne'ebé importante tebes atuhodi halakon kiak no mukit. Tanba ne'e maka Governu sei apoia inisiativa sira, ne'ebé fornese baze ekonómika ne'ebé bele hala'o ba dezenvolvimentu rurál. Ne'e sei inklui motivasaun atu diversifika aktividade ekonómikas foun sira, nune'e mós atu hadi'a efisiénsia aktividade sira atuál nian. 3.8.6 Kuadru Nasionál Planeamentu nian Governu sei dezenvolve Kuadru Nasionál Planeamentu nian ida ba Timor-Leste atuhodi orienta halo kresimentu ekonómiku sustentável no dezenvolvimentu ekuitativu (ekilibradu) la'o lalais , hahú husi nível Nasionál to'o suku sira, maibé fó protesaun ba ambiente naturál Timor-Leste nian. Governu sei utiliza prosesu Kuadru Nasionál Planeamentu nian atu garante katak, ita nia setór agríkola sei dezenvolve ho forma ida ne'ebé minimiza estragu sira ba ambiente, tanba natar no to'os iha kondisaun di'ak no bele prodús presiza mota sira, hatama bee, ai-laran no rai ne'ebé bokur. Zona produsaun no konservasaun agríkola nian sei determina tuir fatór sira hanesan adekuasaun terrenu nian (rai, inklinasaun, altitude no aspetu), klima (rai-udan no rai-manas), terrenu ne'ebé uza daudaun, viabilidade finanseira opsaun sira produsaun nian, polítika sira apoiu nian no iha fertilizante no pestisida orgániku ka inorgániku sira. Zona sira produsaun agríkola nian sei funsiona nu'udar rekomendasaun no la'ós orden ka obrigasaun. Agrikultór sira bele deside rasik saida maka sira hakarak kuda, hodi hetan asesu ba informasaun di'ak sira ne'ebé mak iha kona-ba variedade kolleita no fini sira ne'ebé iha posibilidades atu hetan rezultadu di'ak iha área balun. Kuadru Nasionál Planeamentu nian sei identifika oportunidade sira dezenvolvimentu nian, bazeia ba karakterístika espesífika sira rejiaun balun nian, hodi nune'e bele hamenus diferensa sira progresu nian entre rejiaun sira no entre área urbana no rurál sira, nune'e mós atu enkoraja investimentu husi setór privadu ba-iha área espesifika sira. Bainhira iha ekonomia ne'ebé hetan mudansa lalais la sees mós husi dezekilibriu sira entre zona urbana no rurál sira, no dezekilibriu rejionál sira. Presiza uza rai sira ho di'ak no iha planeamentu di'ak ba konservasaun atu garante kresimentu ekuitativu liu no atu bele fahe prosperidade ba Timor-Leste tomak. 3.8.7 Sentru Dezenvolvimentu Empreza nian sira Institutu Apoiu ba Dezenvolvimentu Emprezariál (IADE) estabelese ona Sentru Dezenvolvimentu Empreza nian iha Baucau, Dili, Maliana, Maubise, Suai, Lospalos no Oe-Cusse. Sentru sira ne'e, fó formasaun kona-ba oinsá bele identifika no harii empreza, hadi'a empreza no espande empreza ida . Governu sei loke tan Sentru Dezenvolvimentu Empreza husi IADE iha Munisípiu hotu-hotu, hodi espande servisu lubuk ida ne'ebé sira oferese, atubele inklui mós servisu agro-indústria nian ho servisu seluk tan, ne'ebé identifika liuhusi avaliasaun ba nesesidade sira munisípiu nian. Sei buka parseria ho Sentru Formasaun Profisionál sira, atu fó formasaun iha kualifikasaun téknika sira ne'ebé relevante. Sei kontinua fó mós formasaun ba funsionáriu no formadór sira husi IADE no Sentru Dezenvolvimentu Empreza nian sira – formasaun ba formadór sira, atu aumenta sira nia kapasidade no hodi bele garante katak sira fó formasaun ne'ebé di'ak ba formandu sira. Sentru Dezenvolvimentu Empreza nian sira sei kontinua hodi dezenvolve konkursu no inisiativa sira ne'ebé maka buka atu promove negósiu inovadór sira no nune'e bele sai hanesan ‘Inkubadora Empreza nian. 3.9 Desentralizasaun Polítika desentralizasaun nian sira husi Governu sei ajuda mós dezenvolvimentu setór privadu nian iha área rurál sira. Governu apoia partisipasaun demokrátika lokál, husi sidadaun hotu-hotu, no sei estabelese prestasaun servisu públiku ida ne'ebé efetiva, efisiente no ekuitativa liután, atubele tulun dezenvolvimentu sosiál no ekonómiku Nasaun nian. Governu sei garante katak governasaun sei besik liután ba povu tuir posibilidade ne'ebé iha, atubele permite autodeterminasaun, dignidade no konkretizasaun ba buat hirak ne'ebé sai hanesan ita-nia povu nia mehi no aspirasaun . Governu sei introdús nivel governasaun lokál nian foun ida, ne'ebé sirkunskrisaun administrativa munisipál ida-idak korresponde ho unidade podér lokál ida. Sei servisu hamutuk mós ho órgaun sira husi Rejiaun Administrativa Espesiál Oe-cusse Ambeno nian, atubele hakle'an liután prosesu desentralizasaun administrativa nian no instalasaun órgaun reprezentativu sira no servisu Podér Lokál nian sira, tuir modelu ida ne'ebé haree tuir kontestu no nesesidade espesífika rejiaun ne'ebá nian . Órgaun no servisu podér lokál sira sei hetan meiu hirak ne'ebé sira presiza atu kontinua misaun ne'ebé sira iha atu sira bele presta servisu públiku sira ne'ebé efisiente no ho kualidade ba sidadaun hotu-hotu. Ba ida ne'e, ita sei dezenvolve ita-nia administrasaun lokál sira-nia kapasidade administrativa no jestaun nian, atubele introdús sistema, prosesu no prosedimentu sira kona-ba jestaun públika no governasaun demokrátika lokál. Governu sei kontinua halo esforsu hodi fó kapasitasaun no valorizasaun ba ita-nia rekursu umanu sira ne'ebé potensiál hodi bele garante katak sira rasik bele hala'o sira-nia funsaun finanseira no tezouru nian ho efikás, nune'e mós dezenvolve, halo planu no akompaña ezekusaun ka jestaun ba programa públiku sira no prestasaun servisu públiku ne'ebé kualifikadu iha nivel lokál . To'o 2017, Governu sei dezenvolve no sei ezekuta Polítika Desentralizasaun Administrativa no Instituisaun Podér Lokál nian. Polítika ne'e sei prevee reorganizasaun Administrasaun Lokál, hodi deskonsentra iha Administrasaun Lokál kompeténsia lubuk ida kona-ba foti desizaun ne'ebé fasilita prestasaun servisu públiku lokál sira no bainhira iha avaliasaun ba polítika ne'e maka hatudu dunik rezultadu di'ak, maka sei desentraliza kompeténsia sira ne'e ba podér lokál liuhusi entrega kompeténsia sira ne'e no eleisaun ba ninia órgaun reprezentativu husi munisípiu tolu to'o lima. Projetu-pilotu instalasaun desentralizasaun nian sei hahú dahuluk iha Aileu, Liquiça no Ermera. 3.9.1 Programa Objetivu Dezenvolvimentu Miléniu nian sira, iha Suku sira Governu sei kontinua hala'o Programa Objetivu Dezenvolvimentu Miléniu nian ba Suku sira, ne'ebé hahú iha tinan 2011. Programa ne'e nia objetivu mak atu harii uma iha aldeia sira, tuir prosesu atu halo fali reordenamentu komunitáriu. Uma sira ne'e sei hetan mós enerjia solár, bee no saneamentu. Vantajen boot husi projetu ne'e maka Komunidade lokál sira serbisu hamutuk ho sira-nia viziñu sira ne'ebé mak mukit liu, hodi garante katak hotu-hotu hetan uma ne'ebé mak adekuadu. 3.9.2 Programa Nasionál ba Dezenvolvimentu Suku Planu Nasionál ba Dezenvolvimentu Suku sira nian atu aselera dezenvolvimentu iha suku hotu-hotu iha Timor laran tomak maka programa ne'ebé hahú atubele realiza objetivu sira husi Planu Estratéjiku Dezenvolvimentu nian ba tinan 2011-2030. Maske nune'e, Governu sei halo revizaun no avaliasaun ne'ebé kle'an kona-ba programa ida ne'e no, karik iha justifikasaun dunik, programa ne'e bele kansela, hodi hein to'o munisípiu sira harii hotu . Objetivu husi programa ida ne'e mak ajuda komunidade sira promove rasik sira-nia dezenvolvimentu, liuhusi planeamentu, konstrusaun no jestaun ba sira-nia infraestrutura rasik. Programa ida ne'e atu fó fasilidade ba komunidade suku nian sira, atubele aselera dezenvolvimentu infraestrutura, hadi'a asesu ba servisu sira no kria empregu ba komunidade suku laran. Maibé, haree ona katak presiza dunik atu halo kontrolu no fiskalizasaun ida ne'ebé di'ak liu ba projetu fíziku sira ne'e hodi bele garante rasionalizasaun ida ne'ebé boot liután rekursu sira nian no ninia sustentabilidade finanseira. 3.10 Komérsiu Governu sei kontinua formula polítika komersiál sira hodi promove dezenvolvimentu husi ninia atividade sira, inklui jestaun no organizasaun merkadu munisípal sira, ne'ebé harii fasilidade no kondisaun sira, no mós define programa sira apoiu nian ba sirkulasaun produtu sira nian iha nasaun laran no iha rai-li'ur . Liga nafatin ho ida ne'e, kona-ba regulasaun komersiál nian, sei propoin medida sira kona-ba regulasaun atividade komersiál, ne'ebé kria sistema padronizasaun no metrolojia nian, hodi asegura implementasaun sistema indikadór ho presu referénsia nian ida konstante no propoin medida preventiva sira atu salvaguarda sasán sira ne'ebé ita importa mai, atu labele viola padraun nasionál sira ne'ebé maka Governu define ona no padraun sira ne'ebé nasaun barak adopta ona . Haree ba alargamentu merkadu nian, divulgasaun produtu karaterístiku sira ne'ebé iha valór ekonómiku akrexentadu sai hanesan orden ne'ebé ita tenke hala'o atu lori produtu sira ne'e ba-iha merkadu rai-laran no mós rai-li'ur, no uza imprensa no meiu komunikasaun sosiál sira hodi fó-hatene ba merkadu rai-laran no mós rai li'ur. Estratéjia marketing nian ida no apoiu husi Governu ba produtór no indústria ki'ik sira sai hanesan buat ne'ebé importante atu introdús produtu nasionál sira iha merkadu nasionál no internasionál . Iha faze dahuluk, ita sei fó atensaun espesiál ba produtu sira ne'ebé halo husi au, liuhusi kolaborasaun ne'ebé besik ho Institutu Peskiza, Dezenvolvimentu, Formasaun no Promosaun au nian. Hanesan dalan atu dezenvolve komérsiu nian ida, Governu sei kontinua investe iha infraestrutura sira iha setór komérsiu nian, hodi bele dezenvolve setór komérsiu, hanesan armazein tránzitu no konservasaun nian no fasilidade rekreativa sira no tempu livre nian, liuliu hirak ne'ebé mak ema buka barak liu iha iha rai-laran ne'ebé haree mós ba kultura no tradisaun nasionál sira. Formasaun no kapasitasaun iha matéria empreza nian ba ajente ekonómiku sira sei kontinua sai hanesan prioridade ida, liuliu liuhusi kooperasaun ho Institutu Apoiu ba Dezenvolvimentu Emprezariál (IADE) . Sentru Lojístiku Nasionál sei kontinua asegura nesesidade lojístika Estadu nian, ho dalan ne'ebé konsentradu, no mós rasionaliza intervensaun sira husi Estadu tuir rejime legál sira abastesimentu públiku nian no normalizasaun sasán importante sira nia folin. Tanba ne'e, Governu kontinua promove armazein sira ne'ebé harii tiha ona iha Tibar, Bebora, Maubise no Maliana, hodi dehan katak sei halo tan estudu viabilidade hodi harii armazein sira seluk no mákina deskaskadora (dulas hare nian) iha Venilale (Viqueque, Lospalos no Baucau), Natarbora (Manatuto, Same, Aileu no Ainaro) no Maliana (Suai, Maliana, Liquiça, Ermera). 3.11 Indústria Governu sei kontinua enkoraja setór privadu atu presta servisu dezenvolvimentu nian, liuliu iha área agro-indústria nian sira, ne'ebé sei reprezenta parte importante ida husi setór privadu nian rasik. Governu sei enkoraja servisu agro-indústria nian sira, iha área sira tuirmai ne'e: Estudu kona-ba merkadu Korrespondénsia merkadu nian, hanesan ezemplu fasilita akordu kontratuál ho kintál sira. Dezenvolvimentu estratéjia komersializasaun nian sira. Avaliasaun no planeamentu projetu nian. Polítika no advokasia. Formasaun no asisténsia téknika. Dezenvolvimentu teknolojia no produtu nian sira. Mekanizmu finansiamentu nian sira. Governu sei ajuda mós setór privadu atu fó meiu báziku sira ba kintál sira, hanesan fini, rai-metan no makina rega aimoruk nian, liuhusi promosaun servisu apoiu agríkola nian ba-iha setór privadu. Governu sei enkoraja setór privadu atu hala'o formasaun ba agrikultór sira, ne'ebé sei haree liu ba oinsá hasa'e rendimentu liuhusi agro-indústria sira. Tanba servisu estensaun públiku ninia kobertura limitadu, sei fó motivasaun ba agrikultór sira atu aumenta sira-nia matenek, nune'e sira sei hetan asesu ba kursu formasaun nian ho durasaun badak . Governu sei kontinua apoia kampaña sira kona-ba estensaun – ka formasaun – estratéjka iha agrikultura. Presiza dunik atu iha peritu sira área indústria nian ne'ebé dezenvolve materiál estensaun no formasaun nian atu promove teknolojia no téknika espesífika sira, ka atu hatán ba kondisionalizmu espesífiku sira, henesan moras ba kolleita espesífiku sira. Ajente estensaun nian sira husi setór públiku no setór privadu nian, inklui ONG sira, sei hetan formasaun kona-ba aplikasaun teknolojia sira ne'e nian, molok implementa kampanã sira kona-ba estensaun. Kampaña sira ne'e haree ba dezempeñu, sei hetan kobertura ida ne'ebé luan no sei loke dalan atu bele mosu ona estensionista husi setór privadu . Governu sei dezenvolve no ezekuta kampaña no estratéjia sira kona-ba estensaun agríkola nian relasiona ho kuda kafé, baunilla, kamí, mina-nuu no au. Governu sei kontinua dezenvolve mós polítika industriál ida, hodi formula liña orientasaun prinsipál hirak ne'ebé sei sai hanesan baze ba ezekusaun atividade industriál ba tempu badak no tempu naruk . Kriasaun polu indústriál (fatin hosi sidade ne'ebé determina ona ba indústria) ninia abjetivu maka konsentra hamutuk indústria sira husi tipu ne'ebé hanesan, hodi fó importánsia liu ba adaptasaun ba realidade no potensialidade rejiaun ida-idak nian iha nasaun ne'e. Iha faze dahuluk, sei hahú ho dezenvolvimentu indústria transformadora sira hanesan: Transformasaun produtu alimentár ne'ebé mai husi to'os ba merkadu sira iha rai-laran (Kafé, tempe, tahu no tapioka (ai-fariña uut), nsst.) Produsaun materiál konstrusaun nian hodi bele troka materiál konstrusaun nian ne'ebé ita importa (tijolu, bloku, serámika/fatuk naturál. nsst.) Indústria manufatura ki'ik sira hodi bele troka produtu ai-han nian balun ne'ebé ita importa, hanesan masin, bee no supermi. 3.12 Kooperativa sira Governu sei kontinua fó apoiu atu harii koperativa sira, hodi dudu kreximentu setór privadu nian iha área rurál sira, liuhusi finansiamentu inisiál ida no fó formasaun, kapasitasaun no akompañamentu ba koperativa sira, nune'e mós ho apoiu sira seluk inklui apoiu hodi sosa ekipamentu. Kooperativa sira sai hanesan modelu ideál ida atu komunidade rurál sira bele hala'o atividade sira setór privadu nian iha área oin-oin, inklui jestaun kona-ba kuda au, hakiak manu-inan sira, peska no soru-tais. Apoiu ne'ebé Governu fó, sei haree liu ba kapasitasaun rekursu umanu, no ba kapasitasaun institusionál, liuhusi Sentru Formasaun no Kapasitasaun ba Grupu Koperativa sira, dezenvolve asaun akompañamentu no akonsellamentu ba empreza mikro no kooperativa sira, no mós ba prestasaun subsídiu sasán ba kooperativa sira ne'ebé prienxe kritéria. Sei iha kréditu sasán ka ferramenta hirak ne'ebé bele uza hodi hadi'a kualidade produtu sira nian, haluan tan merkadu, harii sentru merkadu nian no promove produtu sira, no mós hadi'a infraestrutura, hanesan ezemplu liuhusi reabilitasaun edifísiu sira nian atubele utiliza hanesan sede kooperativa nian sira. 4. DEZENVOLVIMENTU SETÓR GOVERNASAUN NIAN Governasaun ne'ebé di'ak no setór públiku ne'ebé profisionál, iha kapasidade no responsabilidade sai importante ba prestasaun servisu governu nian sira. Ita-nia setór públiku maka sei sai hanesan motór prinsipál ba kreximentu ekonómiku iha tempu médiu, no tenke estabelese baze ba ita-nia nasaun nia progresu, liuhusi dezenvolve ita-nia rekursu umanu no jestaun ba ita-nia programa infraestrutura nian sira. Governu sei kontinua halo estrutura ba servisu públiku nian, atubele reflete nesesidade sira tuir situasaun Timór nian no orienta ekonomia no kreximentu empregu nian. 4.1 Planeamentu no Investimentu Estratéjiku Konsepsaun, koordenasaun no avaliasaun ba polítika sira ba planeamentu no investimentu estratéjiku nian, ne'e importante atu konkretiza Planu Estratéjiku Dezenvolvimentu nian, hodi permite rasionalizasaun rekursu finanseiru sira no konkretizasaun objetivu dezenvolvimentu ekonómiku no sosiál nasaun nian. Nune'e, to'o 2017, Governu sei fó atensaun ne'ebé maka'as liután ba: Planeamentu, konsepsaun no monitorizasaun programa no projetu estratéjiku Governu nian ne'ebé promove kreximentu, hamenus moris-kiak no kria empregu. Garantia ba investimentu boot no kriasaun empregu iha nivel nasionál, munisípal no iha nivel postu administrativu nian sira. Fiskalizasaun no monitorizasaun ba ministériu operasionál sira no akompañamentu ba implementasaun programa–xave sira. Funsaun hirak ne'e sei inklui planeamentu ekonómiku no dezenvolvimentu polítika nian, hodi halo konsepsaun ba abordajen no inisiativa sira ne'ebé kondús dezenvolvimentu, kreximentu ekonómiku, kriasaun empregu no diversifikasaun indústria iha Timor-Leste. Relasiona ho ida ne'e, Governu sei hala'o levantamentu estensivu kona-ba dadus hirak ne'ebé importante atu kumpre Planu Estratéjiku Dezenvolvimentu nian iha fatin hirak tuirmai ne'e: Suai Vila, ba planeamentu urbanu ida ne'ebé iha kondisaun sira atu bele simu prestasaun servisu sira ba atividade sira Baze Fornesimentu nian. Planeamentu ne'e ko'alia mós kona-ba abastesimentu bee nian ba sidade no kaptasaun bee nian ba atividade agríkola sira, ne'ebé ninia produsaun tenke hasa'e no tenke permanente atubele garante ezisténsia no kontinuidade husi empreza ki'ik no empreza média sira iha área agro-indústria nian. Vila sira Aileu, Liquiça no Ermera nian, hodi la'o tuir planu, kona-ba inísiu prosesu desentralizasaun administrativa nian. Vila hirak ne'ebé ohin loron iha ne'e sei merese planeamentu urbanu ida ne'ebé apropriadu, ho koloka didi'ak fali populasaun sira, atu sentru administrativu sira ne'e komesa sai modernu neineik tuir faze, tanba populasaun Timór nian barak liu mak ema foin-sa'e de'it, nune'e tenke hetan orientasaun atubele iha vizaun ne'ebé haree ba futuru kona-ba dezenvolvimentu nasaun nian. Iha parte seluk, kona-ba Investimentu Estratéjiku, Governu sei halo kontaktu no hala'o estudu ne'ebé kle'an atu haree ba posibilidade hodi aprezenta proposta sira kona-ba planu sira ba investimentu Fundu Petrolíferu nian. Liuhusi koordenasaun ho Ministériu no instituisaun relevante sira, Governu mós sei: Estuda no analiza proposta sira atu halo estudu viabilidade kona-ba minériu, no tuirmai, proposta lei ida atu estabelese Fundu Minerál nian ida. Estuda, analiza no propoin kriasaun estrutura finanseira ida, iha ne'ebé la'os Governu Timór nian de'it mak envolve maibé mós Banku estranjeiru no entidade privada sira, atu hatán ba setór privadu nasionál sira ninia nesesidade sira, no bele karik, ho dimensaun rejionál ida. Analiza proposta investimentu nian ne'ebé lori impaktu sosio-ekonómiku liuhusi kriasaun empregu permanente. Fó atensaun didi'ak ba potensiál turístiku nasaun nian, atubele komesa dezeña ona aproveitamentu ida husi potensiál ida ne'e ho forma ne'ebé integrada, liuhusi koordenasaun ho setór agrikultura no peska nian, kona-ba kriasaun agro-indústria. Relasiona ho planeamentu no investimentu estratéjiku, Governu sei tau mós hanesan prioridade atu kontrola no hadi'a kualidade obra sira nian, sistema aprovizionamentu nian no implementasaun projetu ki'ik no projetu boot sira iha área infraestrutura nian, inklui mós projetu fíziku sira husi programa PDID (Planeamentu Dezenvolvimentu Integradu Distritál) no PNDS (Programa Dezenvolvimentu Nasionál Suku sira nian). Kona-ba programa hirak ne'e, sei halo avaliasaun no revizaun ne'ebé kle'an, tanba to'o ohin loron seidauk iha rasionalizasaun kona-ba kustu no rezultadu sira ne'ebé satisfatóriu, nune'e urjente atu deside medida konkreta atu garante sustentabilidade no kualidade ne'ebé boot projetu sira nian . Sei iha relasaun mós ho Planeamentu no Investimentu Estratéjiku nia programa, sei kontinua nafatin programa sira ne'ebé tuirmai ne'e: Komisaun Nasionál Aprovizionamentu, atu halo apresiasaun ba projetu boot sira, hodi garante nia kualidade, gastu ne'ebé efisiente no nivel transparénsia, profisionalizmu no integridade ne'ebé aas, ba-iha projetu infraestrutura prinsipál sira. Ajénsia Dezenvolvimentu Nasionál maka responsavel atu halo avaliasaun ba proposta kona-ba infraestrutura prinsipál sira no atu halo monitorizasaun no relatóriu kona-ba ezekusaun projetu fíziku sira. Fundu Infraestrutura no Fundu Dezenvolvimentu Kapitál Umanu, ne'ebé admite projetu plurianuál sira, bele garante kontinuidade husi programa boot sira kona-ba investimentu iha infraestrutura no iha programa sira kona-ba dezenvolvimentu kapasidade rekursu umanu timoroan sira nian iha setór estratéjiku sira. 4.2 Estabilidade makro-ekonómiku Governu sei kontinua dezenvolve no hadi'a ninia kuadru makro-ekonómiku ba tempu médiu, hodi bele ajuda determina kuantidade envelope rekursu fiskál sira husi 2015 to'o 2017. Sei dezenvolve, liuliu, polítika ida kona-ba estensaun atu foti verba sira husi Fundu Petrolíferu. Ida ne'e sei hatuur limite ba investimentu sira ne'ebé presiza atu apoia Planu Estratéjiku Dezenvolvimentu 2011-2030 no enkoraja kriasaun empregu ba-iha ekonomia, no iha tempu ne'ebé hanesan, sei asegura katak indikadór importante sira seluk, hanesan valór fundu petrolíferu no inflasaun nian, ita bele mantein iha nivel ne'ebé ho kuidadu. Grupu serbisu tékniku makro-ekonómiku sei kontinua dezenvolve esforsu iha sentidu ida ne'e, ne'ebé envolve mós instituisaun oin-oin, atuhodi garante inkluzaun ba-iha dezenvolvimentu kuadru makro-ekonómiku nian, husi interveniente oin-oin ninia pontudevista. Governu mós sei hametin kapasidade atu halo jestaun dívida nian, iha Ministériu Finansas nia laran, atubele hadi'a kuadru makro-ekonómiku hodi garante katak osan sira ne'ebé Governu empresta serve dunik ba fin produtivu sira no sei lori dunik benefísiu líkidu ba povu Timor-Leste tomak. 4.2.1 Reforma Sistema Impostu Iha tempu ne'ebé ekonomia dezenvolve-an daudauk, Planu Estratéjiku Dezenvolvimentu ba 2011 to'o 2030, prevee katak baze fiskál sei la depende de'it ona ba Alfándega no komérsiu no sei konsentra mósi ba impostu kona-ba rendimentu no osan funan sira husi kapitál. Ho hanoin atu hadi'a ekilibriu fiskál nasaun nian, oras ne'e daudaun halo reforma ba sistema tributáriu, hodi haluan nia baze fiskál no aumenta reseita doméstika Estadu nian. Iha tempu hanesan, Governu kompriende katak, iha nesesidade atu atrai investimentu, liuhusi rejime fiskál ida ne'ebé kompetitivu no zona ekonómika livre sira, ne'ebé bele dada negósiu privadu sira. Nune'e, aumentu reseita doméstika tenke mai husi alargamentu baze fiskál nian, mai husi korresaun ba situasaun sira ne'ebé kontribuinte sira la selu impostu no liuhusi fortalesimentu administrasaun kobransa ba impostu nian. Governu sei konsidera alterasaun fiskál lubuk ida, inklui mós posibilidade atu introdús Impostu kona-ba Valór Akrexentadu, maibé desizaun sira hanesan ne'e bele foti, bainhira halo ona konsulta ne'ebé barak liután ho sidadaun timoroan sira, lider emprezariál sira no mós interveniente sira seluk, atubele garante katak alterasaun sa'ida de'it maka halo sei fó benefísiu dunik ba timoroan hotu. Sei iha mós aumentu ba reseita sira, ne'ebé mai husi jestaun instituisaun autónoma sira nian iha baze komersiál ida, atu lukru sira ne'ebé maihusi ne'ebá bele finansia atividade governu nian sira. Utilizasaun lukru husi organizasaun sira ne'e, atu fornese reseita esensiál sira hodi apoia programa Governu nian, sei signifika mós katak, Governu sei asegura liután fiskalizasaun finanseira kona-ba organizasaun sira ne'e. 4.2.2 Hadi'a kapasidade orsamentu nasionál atuhodi presta servisu sira Governu sei kontinua liga, ho klareza liután, Planu Anuál Instituisaun Estadu nian sira ho Orsamentu, no sei kontinua dezenvolve ferramenta reporte finanseiru no monotorizasaun nian, ne'ebé permite povu atu bele hatene loloos osan hirak mak gasta ona, no permite mós Governu atu halo kontrolu ida ne'ebé di'ak liu kona-ba despeza operasionál sira. Governu sei garante mós katak Ministériu operasionál sira bele presta servisu ne'ebé di'ak liu ba povu, liuhusi fortalesimentu planeamentu kooperativu nian no prosesu ezekusaun orsamentál no ezekusaun projetu fíziku sira. Ida ne'e sei realiza liuhusi formasaun, no mós fortalesimentu kapasidade ministériu operasionál sira nian kona-ba uza software jestaun finanseira Governu nian. Governu sei utiliza nafatin sistema sira ne'e atu hadi'a efisiénsia husi despeza Governu nian, hodi introdús oferta periódika ba aprovizionamentu Governu nian sira, kona-ba iten hanesan karreta no komputadór sira, atubele garante relasaun kualidade-folin ne'ebé di'ak liu, no padronizasaun ida kona-ba kualidade. Governu sei kontinua hadi'a nafatin kualidade, presizaun, prontidaun no utilidade husi informasaun finanseira Governu nian, hodi asegura katak instituisaun governu nian hotu-hotu utiliza dunik sistema hirak ne'e, ho efisiénsia, hodi fó kontinuidade ba prosesu reforma software jestaun finanseira nian. 4.2.3 Aumentu husi Transferénsia direta, fundu ba Munisípiu no Suku sira Governu sei kontinua serbisu atu hadi'a ninia infraestrutura sistema informasaun nian sira, liuliu ba ministériu no instituisaun operasionál sira iha Munisípiu sira. Ida ne'e sei la posibilita de'it informasaun no lala'ok foti desizaun nian ne'ebé di'ak liu iha área rurál sira, maibé mós sei permite dezembolsu ne'ebé boot no efikás liután fundu ne'ebé fó diretu ba instituisaun sira iha nivel munisípiu no suku sira. Governu mós sei kontinua serbisu ho setór banku nian no sei habelar ninia funsaun Tezouru nian ba to'o munisípiu sira, nune'e bele halo transferénsia direta fundu sira ba nivel munisípiu no suku sira. Ida ne'e sei la'ós kanaliza de'it fundu ba fatin sira ne'ebé presiza liu fundu hirak ne'e, maibé sei ajuda mós esforsu atu atrai fornesimentu kréditu ba-iha fatin hirak ne'ebé remota liu iha ita-nia nasaun. 4.2.4 Reforsu sistema sira responsabilizasaun nian Governu sei kontinua hametin sistema monitorizasaun, avaliasaun no responsabilizasaun nian, liuhusi hametin kapasidade planeamentu, monitorizasaun no avaliasaun nian, iha instituisaun sentrál importante sira, hanesan Gabinete Primeiru-Ministru nian no Ministériu Finansas. Sei halo análize regulár sira ne'ebé detalladu ba setór ida idak, porezemplu hanesan análize kona-ba despeza públika sira. Relatóriu sira ne'e sei fó-sai ba públiku no sei kompleta inisiativa ne'ebé la'o daudaun, hanesan sidadaun sira-nia mata-dalan ba Orsamentu Nasionál. Sei hametin auditoria interna iha Governu nia laran tomak, liuliu iha Ministériu sira ne'ebé iha estrutura no orsamentu ne'ebé boot liu, atu nune'e bele garante katak ajente governu nian sira halo tuir dunik prátika hirak ne'ebé loos no jere loloos despeza públika sira. 4.2.5 Fornesimentu informasaun finanseira ne'ebé presiza no lais ba interveniente hotu-hotu Governu sei kontinua buka atu hadi'a kualidade, prontidaun, ezatidaun no disponibilidade dadus estatistíku sira ba ita-nia povu. Ita sei kontinua prosesu atu dezenvolve no insentiva uzu teknolojia nian sira, hanesan Portál Transparénsia nian sira, no ita sei kompleta ida ne'e liuhusi uza maka'as meiu komunikasaun sosiál nian sira seluk, atu garante katak, informasaun sira ne'e to'o dunik ba ita-nia sidadaun sira hotu. Governu sei haka'as-an atu atualiza hela de'it Portál Transparénsia nian, liuhusi utilizasaun sistema finanseiru eletróniku ne'ebé iha (GRP – Sistema Rekursu Planeamentu Governu nian), hodi nune'e, bele fó-sai informasaun iha tempu ne'ebé apropriadu. Ita sei kontinua dezenvolve estudu barak liután kona-ba rendimentu no despeza família sira nian, atu bele hametin ita-nia kompriensaun kona-ba ekonomia, no hodi fó informasaun sira ba servisu analítiku importante sira seluk, hanesan análize kona-ba moris-kiak. Ita sei kontinua mós programa estudu regulár sira ba tempu naruk, porezemplu hanesan sensus 2015 nian, ne'ebé sei fó mai ita dadus no indikadór sira ne'ebé kredível kona-ba ita-nia nasaun nia situasaun atuál. Bainhira to'o nia tempu, parte boot liuhusi serbisu estatístiku nian atu rekolla no distribui dadus estatístika nasionál sira, autoridade independente ida maka sei halo. 4.3 Governasaun di'ak ba-iha Setór Públiku Funsaun Públika presiza programa reforma nian ne'ebé metin, ba tempu naruk, atu hadi'a ninia kapasidade hodi ezekuta ninia funsaun sira. Presiza reforma iha área sira hanesan jestaun lideransa, sistema no prosedimentu sira, administrasaun, kontabilidade no finansas, ezekusaun orsamentál no aprovizionamentu, jestaun koñesimentu no jestaun dokumentu sira, no planeamentu monitorizasaun estratéjiku . Governasaun di'ak ba-iha funsaun públika sai hanesan buat ida ne'ebé importante mós tanba funsaun públika maka garante katak públiku bele tau fiar ba Governu no mós ba ita-nia instituisaun demokrátika sira. Transparénsia no responsabilizasaun ne'ebé independente la'ós obstákulu ba governasaun ida ne'ebé efetiva. Maibé kontráriu fali, sira na'in rua ne'e maka garante katak, ita moris iha governsaun di'ak nia laran, no katak ita-nia povu nia interese governu hatán dunik. Governasaun ne'ebé di'ak ajuda mós previne korrupsaun. Prinsípiu fundamentál sira kona-ba governasaun di'ak nian maka transparénsia no responsabilizasaun, integridade no lideransa . Prinsípiu hirak ne'e orienta dezempeñu ne'ebé di'ak liuhusi promove jestaun risku sira nian, responsabilizasaun ba rezultadu sira, mekanizmu ba sidadaun sira atu bele hato'o keixa hirak ne'ebé ajuda identifika no rezolve área sira ne'ebé iha problema, no liuhusi uza tuir dalan osan povu nian. Transparénsia maka sai nu'udar protesaun ne'ebé di'ak liu kontra komportamentu sira ne'ebé la étiku no sai dalan ida ne'ebé di'ak liu atu harii kultura étika ida, iha funsaun públika no atu promove responsabilidade pesoál. Ita implementa ona inisiativa importante sira iha nivel governasaun nian, inklui reforma importante sira hanesan tuirmai ne'e: Estabelesimentu Komisaun Funsaun Públika nian Estabelesimentu Komisaun Anti-Korrupsaun nian Reforsu ba podér Gabinete Inspesaun-Jerál nian atu nia funsiona ho dalan indepente bainhira hala'o inspesaun no auditoria ba ministériu no instituisaun governu nian sira, no Estabelesimentu Kámara Kontas, Tribunál Superiór Administrativu, Fiskál no Kontas nian. Reforma sira ne'e la'o ba oin nafatin, ho intensaun atu kria kultura responsabilizasaun no abertura nian ida no ladún iha burokrasia, ba-iha ita-nia funsaun públika nia laran, no atu harii instituisaun sivíl importante sira, ne'ebé independente husi governu ezekutivu. Governu sei kontinua fó apoiu ba reforma hirak ne'e. Liuliu, Governu se fó-apoiu ba Komisaun Anti Korrupsaun, hodi fó ba nia rekursu hotu-hotu no mós fundu ne'ebé nia presiza atu kumpre ninia mandatu importante ne'e . Maske iha ona progresu importante balun iha nivel reforma governasaun di'ak no reforma setór públiku nian, maibé sei presiza fó kontinuidade ba prosesu reforma nian atu harii setór públiku ida ne'ebé iha kbiit atu hatán ba dezafiu sira ne'ebé sei hasoru aban-bairua . Governu sei hahú programa reforma nian ida ne'ebé sei haree ba aspetu hirak tuirmai: Fó serteza ba funsionáriu públiku hotu-hotu kona-ba sira-nia funsaun sira, ho kedas deskrisaun kona-ba sira nia kargu, devér no responsabilidade sira; Aumenta nivel akadémiku, kualifikasaun, koñesimentu no kapasidade traballadór sira setór públiku nian. Kria jestaun ida ne'ebé di'ak liu kona-ba dezempeñu no promosaun ne'ebé bazeia ba méritu. Hadi'a teknolojia informasaun nian atu apoia prestasaun servisu. Garante koñesimentu ne'ebé adekuadu no ba jestaun dokumentu nian. Hasa'e koñesimentu no adezaun ba valór funsaun públika nian sira, inklui profisionalizmu, kapasidade atu fó resposta, imparsialidade no apartidarizmu ba-iha funsaun ne'ebé hala'o no iha servisu públiku. Dezenvolve estrutura organizasionál setór públiku nian ida, ne'ebé iha kbiit atu bele asegura rezultadu sira ne'ebé di'ak liu. Komisaun Funsaun Públika sei simu nafatin responsabilidade atu implementa programa ida ba tempu naruk nian atu garante katak ita-nia funsaun públika: Adere ba ninia kódigu valór no étika nian. Foti desizaun sira kona-ba empregu bazeia ba méritu no igualdade. Sai profisionál, onestu, dedikadu, no kooperante atu defende interese nasionál sira. Iha imparsialidade polítika. Konsentra maka'as tebes iha prestasaun servisu. Ida ne'e maka knaar Komisaun Funsaun Públika nian, aleinde funsaun sira seluk ne'ebé iha relasaun ho dixiplina ho konduta la di'ak no mós atu implementa sistema hato'o keixa nian ida. Responsabilizasaun funsionáriu públiku sira nian sei kontinua hadi'a nafatin, liuhusi avaliasaun regulár ba dezempeñu tuir planu servisu nian. Análize dezempeñu nian ne'e sei haree liu ba iha konkretizasaun rezultadu sira ne'ebé hakarak hetan. Kuadru jestaun dezempeñu nian, Komisaun Funsaun Públika maka sei dezenvolve no kondús, liuhusi serbisu hamutuk ho Ministériu hotu no funsionáriu públiku sira. Governu sei kontinua implementa programa intensivu ida atu dezenvolve rekursu umanu sira iha funsaun públika, ne'ebé ligadu ho ita nia objetivu sira dezenvolvimentu estratéjiku no desenvolvimentu mão-de-obra ne'ebé efikás no efisiente nian. Ida ne'e sei envolve fornesimentu abordajen sira kona-ba formasaun no dezenvolvimentu profisionál sistemátika, espesífika no ho relevánsia ba kargu sira. Governu sei uza baze governasaun di'ak nian, iha Timor-Leste, liuhusi mós polítika no medida sira tuirmai. 4.3.1 Informasaun ba públiku Governu determinadu ona atu garante komunikasaun ida ne'ebé di'ak liu ho sidadaun timoroan sira, liuliu ho sira ne'ebé maka hela iha área remota no bele laiha asesu ba informasaun sira ne'ebé atualizada no útil ba sira nia dezenvolvimentu rasik . Governu hakarak estabelese parseria sira ne'ebé hotu-hotu iha partisipasaun ativa, responsável no interesada liután, iha buat ne'ebé koñesidu ho naran auditoria sosiál, atu halo análize ba indikadór sira husi asaun governasaun nian ho izensaun no responsabilidade ne'ebé boot liután, atu nune'e ema hotu bele partisipa iha prosesu ne'e ho prestasaun servisu ne'ebé di'ak ba povu timoroan . Portál eletróniku Governu nian sei kontinua reforsa mós atubele fó sai informasaun kona-ba Timor-Leste no kona-ba atividade Governu nian liuhusi internet, hodi aumenta servisu hirak ne'ebé disponível ba sidadaun timoroan sira, hodi prevee dadauk ona dezenvolvimentu inisiativa "Governu eletróniku". Governu mós sei kontinua promove programa sensibilizasaun nian sira kona-ba perspetiva jéneru nian no debate públiku sira liuhusi meiu komunikasaun sosiál nian sira, liuliu iha rádiu komunidade nian sira no iha TVTL. Iha perspetiva atu koordena di'ak liután asuntu sosiál sira, maka sei estabelese mekanizmu koordenasaun eletróniku entre Ministru Estadu, Koordenadór Asuntu Sosiál no komunidade sira ne'ebé hela iha área remota sira, no sei hahú hanesan atividade pilotu ida ba-iha Munisipiu tolu. Instituisaun Governu nian sira seluk prepara daudauk ona mós sira-nia portál eletróniku atu nune'e, to'o tinan 2017, bele iha ona plataforma setoriál ba aproximasaun no interatividade ne'ebé boot liután ho públiku nasionál no internasionál. 4.3.2 Governu eletróniku Iha tinan hirak ikus ne'e, Governu sira iha mundu tomak sente katak importante liután ba sira, atu iha kbiit hodi bele komunika ho sidadaun sira liuhusi internet. Internet mós maka sai hanesan meiu dahuluk ne'ebé iha rai-laran ka iha rai-li'ur uza hodi buka informasaun kona-ba ita-nia Nasaun. Tanba ne'e Governu sei kontinua koloka informasaun sira kona-ba Timor-Leste no kona-ba atividade governu nian sira ba-iha internét, hodi aumenta servisu hirak ne'ebé disponivel iha internét ba sidadaun timoroan sira, liuhusi inisiativa ida "Governu eletróniku" nian. Tanba ne'e, ita sei uza portál eletróniku Governu nian oras ne'e, hodi halo ligasaun ba Ministériu no instituisaun Governu nian hotu-hotu, iha plataforma dijitál ida ne'ebé bele halo komunikasaun entre sidadaun sira ho Governu . Sistema ida ne'ebé di'ak liu sei aselera mós prestasaun servisu governu nian sira, bainhira bele halo asesu ne'ebé fasil ba servisu hirak ne'ebé bele presta liuhusi internét, hanesan renovasaun ba karta kondusaun, rekerimentu sira atu rejista empreza, rekerimentu konsesaun nian sira, formuláriu no informasaun sira kona-ba vistu no impostu sira, selu eletrisidade no servisu sira seluk, rekerimentu sira ba aprovasaun edifísiu no reklamasaun sira hasoru funsaun públika, no mós kontaktu ho Governu liuhusi internét. Plataforma eletrónika ne'e sei sai hanesan portál ne'ebé permite utilizadór sira hodi hetan asesu ba servisu sira ne'ebé Governu disponibiliza no hetan esperiénsia interativa ida ho Ministériu no instituisaun Governu nian sira, nune'e aumenta efisiénsia ba-iha prestasaun servisu iha setór públiku. Atu konkretiza hanoin ida ne'e, Governu sei harii unidade TIK (Teknolojia Informasaun no Komunikasaun nian) no Unidade Governu Eletróniku, iha nivel interministeriál ho hetan supervizaun husi Gabinete Primeiru-Ministru nian, ne'ebé responsável ba planeamentu, servisu, diresaun no estratéjia sira, halibur prátika di'ak hirak ne'ebé di'ak liu, solusaun teknolójika sira, plataforma komunikasaun nian sira, no mós formasaun ba rekursu umanu sira, nuene'e mós sensibilizasaun públiku ba vantajen sira Governu eletróniku nian. Aleinde sai hanesan responsavel ba dezenvolvimentu no regulasaun ba norma hotu-hotu kona-ba sistema informasaun nian sira husi Governu, unidade ne'e mós sai nu'udar koordenadora prinsipál ne'ebé responsabiliza ba dezenvolvimentu polítika jerál sira Governu nian ne'ebé iha relasaun ho Teknolojia Komunikasaun no Informasaun nian sira. 4.3.3 Lejizlasaun kona-ba protesaun ba denunsiante sira Denunsiante mak ema sira ne'ebé, bele funsionáriu públiku ka ajente sira seluk, sira ne'ebé ho aten barani, hato'o ba autoridade sira, hahalok korrupsaun nian, fraude ka ilegalidade, ne'ebé mosu iha sira-nia serbisu-fatin. Aktu sira ne'e bele inklui hahalok aat ne'ebé grave, korrupsaun, administrasaun ne'ebé la loos, fraude, ka perigu boot ba saúde ka ba seguransa públika. Atu proteje denunsiante sira husi ódiu no presaun, Governu sei reforsa lejizlasaun ne'ebé iha tiha ona, liuliu aprova lejizlasaun foun husi Parlamentu Nasionál hodi garante reforsu rejime legál ida kona-ba protesaun kontra presaun sira no responsabilidade sivíl no kriminál ba denunsiante sira, karik sira fó-sai situasaun ne'ebé sai hanesan interese públiku nian. Lejizlasaun ne'e mós sei proteje ema sira ne'ebé hato'o informasaun kona-ba situasaun konduta ladi'ak Governu nian. 4.3.4 Kódigu konduta ba membru Governu nian sira Ita sei kontinua serbisu hodi hadi'a ezbosu Kódigu Konduta ba membru Governu nian sira, ne'ebé elabora foin daudaun ne'e. Kódigu ne'e sei hatuur regra no devér hirak ne'ebé rigorozu kona-ba problema sira hanesan konflitu interese no atividade komersiál sira, no mós informasaun kona-ba prienximentu no kustu gabinete ministériu nian sira. Kódigu ne'e sei ezije katak prezente hotu-hotu ne'ebé membru Governu nian ida simu, aas liuhusi valór ne'ebé determina tiha ona, sei tama ba-iha sistema rejistu nian ida kona-ba prezente Estadu nian. 4.3.5 Lei kona-ba liberdade Asesu ba Dokumentu Administrasaun nian sira Transparénsia no abertura Governu nian signifika sidadaun sira iha direitu atu hetan asesu ba informasaun hirak ne'ebé iha kona-ba sira rasik iha baze-dadus Administrasaun Públika nian. Maske Estadu Timor-Leste sei presiza atu hametin ninia prosesu kona-ba jestaun informasaun no fixeiru sira, no mós sistema armazenamentu informátiku, ne'ebé ligadu liuhusi rede, objetivu ba tempu médiu nian maka promove liberdade atu hetan asesu ba informasaun. Iha Governu liubá ne'e nia mandatu, hato'o ona nesesidade atu halo lejizlasaun iha Parlamentu Nasionál, atu fó ba sidadaun sira direitu hodi hetan informasaun hirak ne'ebé Governu fó-sai, ne'ebé iha relasaun ho sira rasik, ho limite legál sira, liuliu iha ámbitu prosesu kriminál nian. Maske prátika internasionál bele prevee esesaun sira kona-ba kazu informasaun sira ne'ebé bele fó impaktu ba seguransa nasionál, konfidensialidade komersiál, privasidade individuál no konfidensialidade sorumutuk Konsellu Ministrus nian, lejizlasaun ne'e sei estabelese direitu jerál ida ba sidadaun timoroan sira hotu kona-ba asesu ba dokumentu governu nian hirak ne'ebé iha impaktu ba sira. 4.4 Pás no Estabilidade Povu Timor Leste funu hasoru okupasaun rai seluk nian iha tinan 24 nia laran sein simu tulun husi nasaun seluk, no ikus mai konsege hetan ninia Restaurasaun Independénsia. Impaktu husi funu ne'e hamosu dezafiu hirak ne'ebé úniku hodi hametin seguransa interna hafoin hetan tiha ukun rasik-an. Maibé, maske iha krize no atrazu sira ne'e, Timor-Leste bele ultrapassa no asume lideransa iha nia setór estratéjiku sira, hanesan seguransa interna. Bainhira Forsa Estabilizasaun Internasionál no Misaun Nasoins Unidas remata iha tinan 2012 nia rohan, ita sai hanesan nasaun ida ne'ebé aprende ona husi nia frajilidade rasik, investe ona iha rekonsiliasaun no bele moris iha pás sosiál no polítika nia-laran . Aleinde relasaun diplomátika sira no amizade ne'ebé ita harii tiha ona to'o oras ne'e ho, kuaze, nasaun hotu iha mundu tomak, ita mós partisipa maka'as liután iha forun internasionál sira hodi fahe dezafiu no susesu ne'ebé ita hetan iha ita-nia istória. Governu sei kontinua esforsu atu Timor-Leste partisipa nafatin iha organizasaun internasionál iha ámbitu globál no rejionál, hodi fó ninia kontributu ba pás no estabilidade internasionál. Pás no estabilidade maka fatór prinsipál ba dezenvolvimentu nasionál no bainhira koa'lia kona-ba dezenvolvimentu sei ko'alia mós kona-ba justisa no direitu. Ita sei labele harii nasaun ida ne'ebé justu karik ita labele asegura justisa maka hanesan pilár importante iha ita-nia sosiedade, ne'ebé ema hotu bele iha asesu ba. Tanba ne'e ita tenke hadi'a ita-nia instituisaun sira-nia funsionamentu no ida ne'e ita bele halo de'it liuhusi reforsa kapasidade kompeténsia husi nia kuadru sira, buat ne'ebé ejize avaliasaun ida ne'ebé kle'an ba setór Justisa nian no estabelesimentu kuadru kooperasaun foun ida nian ne'ebé adekuadu ba nesesidade sira nasaun nian. Governu mós serbisu hela kona-ba Konseitu Estratéjiku Defeza no Seguransa Nasionál nian, ne'ebé daudaun ne'e tama ona iha faze konsertasaun polítika iha Parlamentu Nasionál, ne'ebé sei estabelese pilár sira ba estratéjia jerál no espesífiku sira iha área defeza no seguransa nasionál ba setór governasaun nian sira hotu. 4.5 Defeza Governu sei garante modernizasaun no profisionalizasaun ba forsa armada nian sira atu nune'e F-FDTL iha kapasidade hodi defende ita-nia nasaun, no mós fó tulun ba ita-nia seguransa rai-laran no fó sira nia kontributu ba esforsu sira atuhodi hatán ba ameasa ba pás no estabilidade rejionál no globál sira, nune'e mós hodi halo intervensaun hamutuk ba-iha situasaun krize tanba kalamidade públika (dezastre ne'ebé provoka husi ema), katástrofe (dezastre ne'ebé mosu mesak) ka dezastre naturál sira no alterasaun orden públika ne'ebé grave. Durante tinan rua ho balu ne'e, ita sei kontinua dezenvolve forsa armada sira nu'udar forsa defeza profisionál no konvensionál ida, iha kontrolu demokrátiku nia okos. Ita sei estrutura no organiza fila-fali F-FDTL hodi garante katak sira iha kapasidade rekursu umanu nian sira ne'ebé bele tau sira iha nivel prontidaun operasionál aas ida, kona-ba misaun lubuk ida ne'ebé sira simu. Ita sei harii Sistema Jestaun Rekursu Umanu Defeza nian ida, atubele dezenvolve ita-nia militár sira, ne'ebé foka liu ba iha área lideransa, motivasaun, dezempeñu, koezaun no foti desizaun sira. Governu sei kontinua avalia, monitoriza no ko'alia konaba ameasa tranznasionál sira hanesan krime organizadu, tráfiku droga nian, terrorizmu, estragu ambientál, alterasaun klimátika no dezastre naturál sira, tanba ameasa hirak ne'e sei fó perigu ba ita-nia sidadun sira-nia moris, no tanba ne'e presiza prevee no kombate ameasa hirak ne'e. Valoriza asuntu tasi nian ba-iha estratéjia defeza nasionál nian no halo diagnóstiku ida kona-ba ameasa no oportunidade hirak ne'ebé Timor-Leste hasoru atuhodi organiza Autoridade Marítima ninia ezersísiu tuir ninia nesesidade sira. Governu sei kontinua hametin Institutu Defeza Nasionál hodi bele kumpre loloos knaar ka funsaun ne'ebé maka fó ona ba nia . Governu iha kompromisu atu fó tulun ba veteranu sira atubele reforma an ho dignidade ne'ebé sira merese. Governu sei kontinua konsidera katak feto sira iha papél ne'ebé boot liután iha defeza nasionál. Governu mós sei kontinua dezenvolve no kapasita Kompañia Enjeñaria F-FDTL nian hodi iha envolvimentu ativu ba- iha dezenvolvimentu nasionál. Ita sei halo esforsu hotu atu F-FDTL bele partisipa iha operasaun manutensaun pás nian sira, iha Nasoins Unidas nia mahon, no to'o tinan 2017, ita sei aumenta kapasidade ita-nia sistema nian ne'ebé ko'alia kona-ba Komando, Kontrolu, Komunikasaun, Komputadór no Informasaun sira (K4I). Governu sei kontinua haka'as-an iha nível rejionál no internasionál, hodi reforsa ita-nia partisipasaun iha ezersísiu militár rejionál no internasionál sira. Ita mós sei kontinua dezenvolve kooperasaun tékniku-militár ho parseiru estratéjiku Timor Leste nian oin-oin no kontribui ba polítika esterna nasaun nian no ba reforsu konfiansa liuhusi dalan diplomasia defeza nian no estratéjia ba pás. 4.6 Seguransa Seguransa, hanesan funsaun esensiál estadu nian ida, sai hanesan rekizitu ida ne'ebé importante atu sidadaun sira ezerse sira-nia direitu no liberdade fundamentál sira. Garantia ba prezervasaun estabilidade husi ninia sosiedade rasik no dezenvolvimentu normál atividade ekonómiku depende mós ba seguransa. Seguransa laiha dezenvolvimentu mós la iha . Ba ida ne'e, Governu asume hanesan prioridade ba nia asaun atu adopta polítika no medida konkreta sira ne'ebé kontinua kontribui hodi halo Timor-Leste sai nasaun ida ne'ebé seguru liu, no reforsa autoridade Estadu nian no dezenvolvimentu no konsolidasaun ba efikásia husi Forsa no Servisu Seguransa nian sira, tanba rekoñese katak ida ne'e hanesan área ida ne'ebé kontinuasaun investimentu nian hatudu vantajen boot tebe-tebes, iha tempu badak, tempu médiu no mós tempu naruk nia laran. Tanba ne'e, Governu sei kontinua implementa planu estratéjiku abranjente ida ne'ebé hatán ba realidade oin-oin, abranje kestaun hirak ne'ebé relevante tebes, hanesan prevensaun ba buat hira ne'ebé sai nu'udar risku ba estabilidade sosiál, kombate hasoru kriminalidade, kontrolu iha fronteira no iha área tasi nian, protesaun sivíl no nível asidente ne'ebé mosu iha estrada sira. Governu sei kontinua implementa Planu Estratéjiku Seguransa Interna 2030 nian hanesan dalan atu garante dezempeñu ne'ebé di'ak liuhotu kona-ba pás, seguransa no estabilidade . To'o tinan 2017, Governu sei hala'o hotu Faze da-1 (tinan 2011-2015) husi planu ne'e, ne'ebé haree liu ba Fortalesimentu no Konsolidasaun Baze Seguransa nian sira. Faze da-1 ne'e sei fahe ba iha pilár rua ne'ebé la hanesan: Reforma no Dezenvolvimentu Instituisaun Seguransa nian sira no Konsolidasaun Orden no Seguransa Públika. Aleinde halo monitorizasaun kona-ba kumprimentu ba objetivu sira ne'ebé determina ona ba Faze da-1, Governu sei hahú implementa faze da-2 (tinan 2016-2020), ba Planu Estratéjiku Seguransa Interna 2030 nian ligado ba asuntu Alargamentu no Dezenvolvimentu Seguransa Interna nian. Liga ba ida ne'e, durante tinan rua ho balu oinmai, ita kontinua dezenvolve esforsu atubele aumenta kapasidade operasionál efetiva ba-iha prevensaun no investigasaun krime nian, ba-iha konsolidasaun seguransa públika no kontrolu iha área fronteira. Ita mós sei kontinua enkoraja modelu polítika komunitária no ita sei mantein estabilidade no seguransa públika hanesan responsabilidade fundamentál sira Polísia Nasionál Timor-Leste nian. Governu sei kontinua fó atensaun ba-iha kualifikasaun rekursu umanu nian no ba-iha profisionalizasaun Instituisaun Seguransa nian sira, hodi orienta rekrutamentu no formasaun atubele hatán ba nesesidade agora no aban bai-rua nian. Sei implementa Regulamentu Dixiplinár foun ida no Estatutu ida ba membru Polísia Nasionál Timor-Leste nian sira. Implementasaun instrumentu legál hirak ne'e ninia objetivu mak atubele hetan administrasaun no jestaun rekursu umanu ne'ebé di'ak ba Instituisaun ida ne'e. Sei harii mós Sentru Nasionál Operasaun sira nian ida ne'ebé maka trata kona-ba Seguransa Rodoviária no sei prepara rekursu umanu atubele jere di'ak liután dezafiu ne'ebé boot ba bebeik ne'ebé Timor-Leste hasoru iha área ida ne'e. Governu mós sei remata ninia programa enkuadramentu legál nian no fó apoiu ba ekipamentu no nesesidade profisionál sira Protesaun Sivíl nian, liuliu Korpu Bombeiru sira, ho perspetiva atu habelar tán papél bombeirus nian iha Munisípiu sira. Ita mós sei hametin Diresaun Nasionál Prevensaun Konflitu Komunitária nian, atu hametin konfiansa, lei no orden ba-iha ita-nia komunidade sira nia leet, no mós ho sira-nia partisipasaun ba-iha Konsellu Munisipál Seguransa sira no ba-iha programa sira edukasaun sívika nian. Ho lia-fuan badak katak, kontinuasaun dezenvolvimentu no konsolidasaun Instituisaun Seguransa nian sira, iha área ida ne'e, maka preokupasaun prinsipál hirak ne'ebé orienta atuasaun Governu nian, ho lójika konjuntu nian ida ne'ebé haree mós ba preokupasaun komplementaridade nian no ne'ebé permite hetan rezultadu sira ne'ebé di'ak liu ho dalan ne'ebé efisiente liu, liuhusi simplifikasaun, klarifikasaun no utilizasaun meiu no prosesu sira ne'ebé modernu no ajustadu. 4.7 Justisa Iha tinan rua ho balu oinmai ne'e, Governu sei kontinua tau matan ba fortalesimentu no reforma setór justisa nian, ho hanoin atubele hametin estabilidade, pás no Estadu Direitu nian. Ita sei kontinua promove kriasaun kuadru normativu orientadór ida ba nasaun modernu no progresista ida. Bainhira hala'o tiha ona esforsu inisiál ne'ebé signifika mudansa totál husi defeitu estruturál ba-iha nia kuadru legál no ba-iha kriasaun sistema justisa nian ne'ebé bele garante katak kumpri dunik direitu no liberdade fundamentál sira, mak agora Governu propoin atu halo reforma setór justisa nian no halo estudu ida ne'ebé kle'an kona-ba reforma lei sira, iha aspetu formál, iha uniformizasaun no armonizasaun lejizlativa no mós, iha avaliasaun ba nesesidade intervensaun husi Governu ka husi Parlamentu Nasionál . Bainhira kria ona infraestrutura no servisu báziku justisa nian sira, agora Governu tenke prepara an hodi lori besik liután sistema justisa nian ba sidadaun sira, hodi hato'o ba sira, koñesimentu kona-ba sira-nia direitu no meiu hirak ne'ebé disponível ba sira nia responsabilidade, liuliu ba sidadaun sira ne'ebé kbiit laek liu iha sosiedade nia laran, ne'ebé la iha kondisaun ekonómika ka sosiál atubele hetan benefísiu husi sistema justisa nian. Governu sei haka'as an, atu supremasia Konstituisaun no lei nian hetan rekoñesimentu, hodi kontribui ba konstrusaun sosiedade ida ne'ebé livre, justu, no hotu-hotu moris hanesan iha lei nia okos. Tanba ne'e, sei kontinua haka'as an atu reforsa independénsia Majistratura Judisiál sira nian, autonomia Ministériu Públiku nian no ezerse tomak profisaun jurídika sira. Sei garante responsabilidade judisiál efetiva ba interese lejítimu sidadaun sira nian, liuliu ba sistema ne'ebé frájil liu iha sosiedade nia laran, hodi kria, ba ida ne'e, kondisaun sira atu ezerse tomak direitu, liberdade no garantia no estabelese mekanizmu sira ne'ebé adekuadu asesu nian ba direitu no ba tribunál sira. Governu sei kontinua mós ninia knaar prinsipál atu harii kuadru legál no normativu ida, hodi garante ninia armonizasaun no unidade ordenamentu jurídiku, ne'ebé bazeia nafatin ba kontestu espesífiku no reál Timor nian. Iha planu lejizlativu nian, Governu sei haka'as an atu adopta regra no limite sira kona-ba oinsá uza lia-fuan ne'ebé simples bainhira hakerek lei, no sei kontinua promove diálogu ho sosiedade sivíl, no halo konsulta públika bainhira halo lei. Sei fó atensaun maka'as ba kapasitasaun no espesializasaun ba nia kuadru tékniku sira, hodi nune'e bele hamenus, bainhira bele, dependénsia ba asesoria internasionál sira, no atu promove asesór nasionál sira hodi neineik troka ona asesór internasionál sira. Iha área ida ne'e mós, Governu sei fó atensaun espesiál atu kria medida sira ne'ebé bele transforma sistema jurídiku ba sistema ida ne'ebé efetivu iha lian-rua, liuhusi promosaun tradusaun jurídika lei sira nian, atuhodi garante katak lian ofisiál rua ne'e uza loloos no hanesan de'it, hodi dezenvolve Tetum jurídiku, hanesan kondisaun esensiál atu sidadaun timoroan hotu-hotu iha asesu ba justisa no hatene kona-ba direitu. overnu sei halo esforsu mós hodi fó-sai no disponibiliza servisu justisa nian sira, ba-iha munisípiu sira, tantu iha ámbitu instituisaun judisiál nian sira, liuhusi distribuisaun no kolokasaun majistradu, prokuradór no defensór públiku sira, iha territóriu nasionál tomak, no mós liuhusi disponibilizasaun servisu públiku kona-ba rejistu notariadu, kona-ba promosaun no divulgasaun direitu no lei sira, ka liuhusi regulasaun no promosaun meiu rezolusaun alternativa ba kontestasaun judisiál, hanesan mediasaun, arbitrajen ka dame-malu, liuliu, iha matéria laborál, familiár ka hadau malu rai nian. Governu sei reforsa papél institusionál Defensoria Públika nian, hodi hala'o ninia autonomizasaun kuadru tutelár Ministériu Justisa nian. Hanesan instituisaun fundamentál justisa nian, ninia objetivu mak atu bele hala'o servisu públiku nian ida ne'ebé vokasionadu loloos dunik atu garante asesu ba direitu, liuhusi fó asisténsia jurídika, integrál no gratuitu, judisiál no estrajudisiál ba sidadaun sira hotu ne'ebé la iha kbiit atu selu hodi hetan asesu ba justisa. Nune'e mós advogadu sira bele konta nafatin ho apoiu Governu nian, tanba ita hatene katak ita-nia sistema justisa nian presija iha klase advogadu nian ida ne'ebé kualifikadu, iha kapasidade téknika deontolójika, ne'ebé preparadu atu asegura reprezentasaun legál sidadaun sira nian. Sei dezenvolve kampaña konxiensializasaun legál ba sidadaun sira hotu liuhusi asaun divulgasaun no edukasaun públika, ho atensaun espesiál ba Munisípiu sira ne'ebé nível konfiansa nian iha sistema justisa formál menus liu . Kona-ba ida ne'e, dezenvolve daudaun ona esforsu atu konkretiza realizasaun asaun konxiensializasaun iha eskola bázika no sekundária hotu-hotu iha nasaun laran, ho naran "Justisa bá Eskola", ho hanoin atu fó-hatene ba alunu joven sira kona-ba sistema Justisa nian ne'ebé eziste iha ita-nia nasaun. Governu sei kontinua promove kriasaun sistema justisa nian ida ba labarik ki'ik sira, liuhusi adopsaun modelu edukativu ida ba-iha sistema justisa nia laran, ne'ebé aplikasaun medida sira determina husi nesesidade atu eduka joven sira ba direitu no promosaun ba sira-nia moris di'ak, hodi kontribui ba manutensaun pás no orden iha sosiedade nia laran. Governu sei asegura mekanizmu própriu atubele kria sistema prizaun nian ida ne'ebé umanu, justu no seguru, ne'ebé orienta ba reinsersaun sosiál, liuhusi ezekusaun medida ne'ebé iha limite ba liberdade no la iha limite ba liberdade, hodi fó liu atensaun ba joven adultu sira. Liga ba ida ne'e, dezenvolve dauduan ona projetu ida ne'ebé ninia objetivu maka garante aplikasaun prátika Pena Suspensa no Liberdade Kondisionál, aktu jurídiku hirak ne'ebé previstu tiha ona iha lejizlasaun prosesuál penál, no iha sorin seluk, Regulamentu Jerál kona-ba Estabelesimentu Prizionál iha ona faze elaborasaun nian, instrumentu ne'ebé importante atu aplika loloos Rejime Ezekusaun Penál, ne'ebé hetan aprovasaun foin daudaun ne'e . Kona-ba infra-estrutura fundamentál, Estabelesimentu Prizionál Suai ninia konstrusaun tama ona ba faze finál, no konstrusaun Sentru Juveníl ba joven adultu sira, ne'ebé lokaliza iha Tibar, hein de'it ona aprovasaun finál ba orsamentu . Ikus liu, fatin atu harii Sentru Saúde Mentál nian no Estabelesimentu Prizionál Baucau nian determina tiha ona, hodi hein de'it ona konkluzaun prosedimentu hirak ne'ebé presiza atubele hahú konstrusaun ne'e . Governu sei kontinua promove seguransa jurídika no justisa kriminál, liuhusi kapasitasaun téknika no umana ba-iha área sira hanesan investigasaun kriminál, medisina legál no siénsia forense nian sira seluk, hodi reforsa ninia kapasidade no téknika investigasaun, estratéjia no planeamentu, rekolla no analiza indísiu sira, no téknika atu halo investigasaun kona-ba krime sira ne'ebé kompleksu liu, hanesan krime organizadu, krime korrupsaun ka brankeamentu kapitál, nune'e mós krime sira husi natureza doméstika no natureza seksuál. Ko'alia mós kona-ba kriasaun no mós inísiu funsaun sira Polísia Sientífika Investigasaun Kriminál nian ne'ebé sei dezenvolve an tuir nia dalan rasik . Governu, husi ninia parte, kontinua iha interese atu fortalese baze demokrátiku sira kontrolu, fiskalizasaun no transparénsia nian liuhusi estruturasaun institusionál Kámara Kontas nian. Governu sei kontinua fó atensaun espesiál ba prosesu regularizasaun propriedade rai nian, hodi promove rejistu titularidade propriedade privada nian, no asegura mekanizmu jestaun nian hirak ne'ebé efikás ba rikusoin sira Estadu nian tantu iha domíniu públiku (estrada, ponte, tasi, no seluk tan) no privadu ( karreta ka motor Estadu nian, uma no buat seluk tan ne'ebé uza iha Ministériu ida nia laran). Ita sei kontinua promove aprovasaun ba Lei Rai nian, ne'ebé importante tebes atu asegura pás no dezenvolvimentu sósio-ekonómiku no investimentu, internu no mós esternu, no tanba ne'e ita sei kontinua haka'as an halo lejizlasaun kona-ba área ida ne'e, tanba selae ita labele konkretiza projetu dezenvolvimentu nian sira ne'ebé esensiál no kria empregu. Timor-Leste hasoru, iha ámbitu prosesu reforma ba propriedade rai nian, dezafiu oin tolu: rai hodi halo to'os tuir lala'ok lisan nian; rai sira iha sidade ne'ebé presiza "zonamentu" no direitu ba propriedade ne'ebé klaru; no rai Governu nian ne'ebé bele uza ba investimentu públiku ka privadu, iha ámbitu projetu investimentu nian ne'ebé, haree ba nia eskala ka nia impaktu ekonómiku, sosiál, ambientál ka teknolójiku, bele sai nu'udar interese boot ba nasaun tuir estratéjia Planu Dezenvolvimentu Nasionál nian. Liga ba ida-ne'e, iha ona esforsu ne'ebé dezenvolve dadauk atu estabelese sistema modernu ida hodi halo levantamentu kadastrál ne'ebé sistemátiku, ne'ebé estabelese pontu referénsia nian atu bele kria rede jeodézika (pontu aas iha terrenu ne'ebé permite lokalizasaun loloos ba kualkér fatin ba-iha mapa rai nian) nasionál ida, uniformiza naran jeográfiku sira no halo klasifikasun ida loloos kona-ba atu uza rai. Tanba jestaun patrimóniu imobiliáriu Estadu nian sai hanesan kestaun prinsipál ida ba-iha prosesu dezenvolvimentu nian, mak implementa daudaun ona sistema informasaun únika ida ba kadastru, regularizasaun no rejistu propriedade no tributasaun patrimóniu nian . Governu sei implementa regra sira ne'ebé justu no loos ne'ebé proteje pertensa no transferénsia rai nian, ne'ebé la sees husi interese proprietáriu tradisionál sira, no garante serteza no seguransa ba investimentu . Sistema justisa nian maka riin ida Estadu Direitu nian no sai nu'udar funsaun ida husi funsaun sira soberania importante Estadu nian. Kona-ba ida-ne'e, Governu, liuhusi Ministériu Justisa, sei kontinua kontribui ba kualifikasaun no dezenvolvimentu sustentável Estadu Direitu nian, atuhodi reafirma valór universál kona-ba direitu fundamentál sira, reforsa sidadania no atuhodi promove sosiedade ida ne'ebé moris iha prinsípiu no valór demokrátiku, étiku no justisa nian sira. 4.8 Polítika Esterna Timor -Leste iha lokalizasaun jeográfika ida ne'ebé estratéjiku tebe-tebes, no tanba ne'e ita-nia rikusoin no rekursu naturál sira no ita-nia seguransa sei depende ba ita-nia kapasidade atu bele mantein relasaun sira ne'ebé di'ak ho ita-nia nasaun viziñu no nasaun belun sira. Ita-nia polítika esterna maka proteje no promove interese fundamentál sira povu Timor nian, no salvaguarda ita-nia Nasaun nia independénsia, soberania no integridade . Iha tinan sanulu hirak ikus ne'e, evolusaun polítika, sosiál no ekonómika nasaun sira nian, barak liu maka la'o ho rítmu ida ne'ebé lalais ho dinámika oin-oin. Senáriu markante hirak ne'ebé ita haree to'o oras ne'e ba-iha kontinente oin-oin (Áfrika, Médiu Oriente, Europa, Ázia no Amérika), fó atensaun mai ita katak Timor-Leste presiza formula no hala'o polítika esterna ida ne'ebé própriu tuir situasan globál nian sira. Kestaun sira hanesan terrorizmu, estremizmu, ultra-nasionálizmu, fanatizmu relijiozu nian, hadau malu territóriu, resesaun ekonómika-finanseira no esplorasaun ba rekursu naturál sira la ho medida bele muda no hamosu problema ba orden internasionál. Iha era globalizasaun ekonómiku no teknolójiku nian ida ne'e, laiha nasaun ida ne'ebé, maske dook husi episentru akontesimentu ka husi sentru desizaun nian sira, maka sei livre husi impaktu ne'ebé bele mai husi ne'ebá. Kompleksidade relasaun entre nasaun sira ezije ita atu identifika loloos prioridade no dezafiu sira, no antesipa mudansa no dinámika polítika, sosiál no ekonómika nasaun sira nian ne'ebé ita mantein relasaun kooperasaun nian ho sira atu nune'e ita bele koordena ho dalan ne'ebé efisiente ita-nia rekursu sira, ajusta ita-nia perspetiva, polítika no aktu sira, hodi salvaguarda ita-nia interese nasionál maibé la husik hela ita-nia papél no responsabilidade iha nivel internasionál . Governu VI sei kontinua dezenvolve relasionamentu espesiál ho nasaun viziñu sira, hanesan Indonézia no Austrália, nune'e mós ho parseiru dezenvolvimentu nian sira no nasaun belun sira ne'ebé namkari iha mundu tomak . Governu mós sei kontinua hametin relasaun bilaterál ho parseiru rejionál sira no halo esforsu ba adezaun Timor-Leste nian ba-iha Asosiasaun Nasaun Sudeste Aziátiku (ASEAN) no reforsa papél Timor-Leste nian iha organizasaun rejionál no internasionál sira hanesan ba-iha Furun Illa Pasífiku nian sira, Fórum Rejionál ASEAN, Diálogu Pasífiku Sudoeste (SWPD) nian no Grupu Estadu Afrikanu Karaíba no Pasífiku nian sira. Timor-Leste fiar katak multilateralizmu maka mekanizmu ida ne'ebé efikás atu fó solusaun ba problema globál sira. Liga ba ida, ita sei kontinua hola parte ativu ba-iha forun multilaterál sira, liuliu ba-iha Asembleia-Jerál Organizasaun Nasoins Unidas nian, nune'e mós ho instituisaun no organizasaun internasionál hirak ne'ebé relevante ba-iha defeza ita-nia interese no prinsípiu universál sira bainhira iha konvivénsia entre povu no estadu, hanesan direitu umanu sira no demokrasia, meiu ambiente, kombate hasoru terrorizmu internasionál, krime tranznasionál sira seluk no krime kontra umanidade sira. Timor-Leste defende prinsípiu fundamentál sira Movimentu Naun Aliñadu sira nian no Karta Nasoins Unidas nian ba-iha prezervasaun no promosaun pás iha mundu, liuhusi diálogu no diplomasia entre Estadu sira no evita atu uza forsa hodi rezolve konflitu sira . Durante tinan rua 2014-2016, Timor-Leste kaer knaar prezidénsia rotativu Komunidade Nasaun Lian Portugés (CPLP) nian. Governu VI sei kontinua ho esforsu no inisiativa sira, la'os de'it atu kumpre kompromisu ne'ebé asume tiha ona ba-iha Konferénsia X Xefe Estadu no Governu sira nian maibé mós atu hametin kooperasaun no amizade entre nasaun membru sira organizasaun ida ne'e nian ne'ebé haree liu ba kooperasaun ekonómika no emprezariál. Ita mós sei kontinua dezempeña papél dinamizadór no papél solidariedade internasionál nian ida, hodi tama ba-iha estrutura internasionál sira hanesan g7+ no papél apoiu nian ba grupu nasaun frájil nian sira no/ka nasaun sira ne'ebé sofre situasaun konflitu nian. Relasiona ho Polítika Esterna nian, ida husi ita-nia prioridade sira maka, tuir direitu internasionál nian, atu asegura definisaun ita-nia fronteira tasi nian, rai-maran no aéreu nian sira. Konsellu ba Delimitasaun Definitiva Fronteira Marítima, ne'ebé hetan tiha ona aprovasaun iha Parlamentu Nasionál iha tinan kotuk, sei halo esforsu tomak kona-ba matéria ne'e atu Estadu Timor-Leste bele ezerse loloos podér soberania nian ba ninia territóriu nasionál rasik. Ita sei hala'o abordardajen ida kona-ba kooperasaun internasionál, hodi hametin relasaun kulturál, ekonómika no komérsiál sira ho nasaun sira seluk, ne'ebé importante hodi mantein ativu lala'ok inovasaun no investimentu nian sira, ne'ebé importante ba nasaun joven ida ne'ebé dezenvolve an hela, hodi hadi'a ita-nia métodu servisu nian sira no opta ba prinsípiu hirak ne'ebé hakerek tiha ona ba-iha deklarasaun París, ajenda asaun ACRA nian, no kompromisu hirak ne'ebé asume iha forun nivel aas iha Busan nian ba Parseria Kooperasaun Efetiva ba Dezenvolvimentu. Governu sei hahú prosesu elaborasaun liña jerál sira kona-ba orientasaun polítika esterna Timor-Leste nian ne'ebé sei sai hanesan instrumentu tranzitóriu to'o elaborasaun Livru Mutin Polítika Esterna nian, ne'ebé sei remata iha tinan 2017. 4.8.1 Relasaun bilaterál sira Kona-ba relasaun bilaterál sira, Governu sei kontinua adere ba iha ita-nia prinsípiu konstitusionál, relasaum amizade nian ho nasaun hotu iha mundu, la haree ba nia dimensaun, lokalizasaun no ideolojia. Ita hela iha rejiaun ida iha ne'ebé iha dinamizmu polítiku ida no ekonómiku ne'ebé boot, ne'ebé interese jeoestratéjiku sira hasoru malu. Tanba ne'e relasaun bilaterál ne'ebé di'ak ho ita-nia nasaun viziñu sira sai hanesan obrigasaun ida, la'os eskolla. Ita-nia nasaun nia lasu no dalan istória nian la'ós hariku de'it ita-nia identidade nu'udar nasaun, maibé hariku mós partikularidade husi ita-nia relasaun ho nasaun no povu sira la'os de'it iha ita-nia rejiaun, maibé mós ho sira iha kontinente hirak ne'ebé dook husi ita. Sei halo análize kle'an ida kona-ba situasaun no distribuisaun husi ita-nia reprezentasaun diplomátika no konsulár sira, atu nune'e bele halo reajustamentu ne'ebé presija atu hatán ba realidade foun sira . Ita sei mantein nafatin ita-nia relasionamentu ne'ebé di'ak tebe-tebes ho ita-nia viziñu sira ne'ebé besik liu ita, Austrália no Indonézia, no sei kontinua promove mós lasu istóriku no amizade nian ho Portugal no ho nasaun membru CPLP nian ida-idak. Ita sei mantein nafatin relasionamentu ida ne'ebé forte no pozitivu ho Estadus Unidus Amérika tanba haree ba ninia kontribuisaun ne'ebé boot tebes ba demokrasia, seguransa, estabilidade no dezenvolvimentu. Ita sei kontinua mós kooperasaun ho Xina, Japaun, no Repúblika Korea ne'ebé sai nu'udar poténsia ekonómika ba-iha rejiaun Ázia nian. Ita sei servisu nafatin atu hametin lasu amizade no kooperasaun nian ho membru ASEAN no Uniaun Europeia nian ida-idak, no ho nasaun belun sira iha Áfrika, nune'e mós ho Cuba no Nova Zelándia, ne'ebé sira-nia kontributu sai hanesan elementu importante ida ba-iha ita-nia dezenvolvimentu. Nu'udar nasaun ida husi nasaun rua ba-iha rejiaun sudeste aziátiku nian ne'ebé soi presentajen katóliku nian boot liu, Ita sei fó atensaun espesiál ba ita-nia relasaun ho Santa Sé. Ita hein katak iha tinan ne'e nia rohan ita bele asina ona konkordata ho Santa Sé, buat ne'ebé sei hametin liután ita-nia relasaun ho Igreja Katólika. 4.8.2 Fortalesimentu Institusionál no Reforsu Relasaun Internasionál sira Sei halo reajustamentu ba estrutura Ministériu Negósius Estranjeirus no Kooperasaun nian, tuir buat ne'ebé hakerek iha Lei Orgánika Governu Konstitusionál VI RDTL nian, atuhodi promove reestruturasaun ne'ebé di'ak ba-iha ninia servisu no rekursu sira, hodi hamenus burokrasia no promove efisiénsia no efikásia jerál instituisaun ne'e nian. Prosesu reestruturasaun ne'ebé di'ak no revee dimensaun ita-nia reprezentasaun diplomátika no konsulár sira nian sei hahú tuir objetivu espesífiku misaun ida-idak nian. Númeru reprezentasaun nian sira iha rai-li'ur, nune'e mós ninia rekursu sira sei aumenta ka bele mós hamenus, tuir nesesidade ne'ebé iha . Sei hala'o levantamentu ida ne'ebé kompletu kona-ba rekursu umanu, finanseiru, patrimóniál no materiál sira ne'ebé disponivel iha reprezentasaun RDTL nian ida-idak iha rai-li'ur, no mós análize ida kona-ba ninia enkuadramentu no atuasaun polítika sira . Ho intensaun ida atu dignifika funsaun diplomátika hanesan karreira espesiál Funsaun Públika nian, Estatutu Karreira Diplomátika nian sei define mekanizmu sira kona-ba funsionamentu karreira diplomátika nian, no mós direitu no devér lubuk ida funsionáriu sira servisu diplomátiku nian. Tanba ne'e, ita sei elabora diploma tranzitóriu ida, molok Estatutu Karreira Diplomátika nian tama iha vigór, atu regula aspetu fundamentál sira kona-ba kolokasaun, transferénsia, progresaun no promosaun funsionáriu diplomátiku sira nian, ne'ebé oras ne'e daudaun hala'o hela sira-nia funsaun . Ita sei elabora mós diploma autónomu ida hodi regula prosesu tranzisaun ba funsionáriu sira ne'ebé hala'o tiha ona ka hala'o hela funsaun diplomátika nian iha Ministériu Negósius Estranjeirus no Kooperasaun nian, atu hetan aprovasaun hamutuk ho Estatutu Karreira Diplomátika, ne'ebé kria komisaun ida ad hoc no halo lista ida kona-ba kritériu no forma sira ponderasaun nian ba ekivalénsia kategoria sira ne'e nian . Ita sei investe maka'as liután iha profisionalizasaun no kualifikasaun rekursu umanu sira iha ámbitu Ministériu Negósius Estranjeirus no Kooperasaun nian, atu sira bele sai efisiente no iha kapasidade atu hala'o serbisu oin-oin liuliu téknika no diplomátika atu dezempeña funsaun hirak ne'ebé fó ba sira. Governu mós sei finaliza kurríkulu ba Institutu Estudu Diplomátiku nian, hodi hetan meiu hirak ne'ebé presiza atu hala'o atividade formasaun nian sira. Tuirmai, sei halo identifikasaun kona-ba nesesidade formasaun nian ba diplomata ida-idak no halo planu formasaun individuál nian, hodi hahú formasaun sistemátika ba ita-nia diplomata sira iha Institutu Estudu Diplomátiku nian, liuhusi kooperasaun ho instituisaun espesializada sira seluk. Ba kumprimentu, konsisténsia no armonizasaun maka sei halo levantamentu kompletu ida kona-ba kompromisu internasionál hotu-hotu ne'ebé kesi Estadu Timor-Leste, no halo lista ida kona-ba obrigasaun sira no halo enkuadramentu no integrasaun ba-iha rejime jurídiku nasionál. Ita sei fó prioridade ba Regulamentu kona-ba Lei Tratadu Internasionál nian sira, ne'ebé sei regula hotu Lei Tratadu Internasionál nian sira, ne'ebé hetan aprovasaun iha tinan 2010, ne'ebé ko'alia kona-ba faze oin-oin husi prosesu konkluzaun tratadu internasionál sira nian ne'ebé Estadu Timor-Leste nian mós sai hanesan parte . Sei halo mós armonizasaun ida ne'ebé loloos ba prosedimentu no mekanizmu nasionál nian hotu-hotu kona-ba aktu ne'ebé vinkula Estadu ka instituisaun Estadu nian sira atu garante ninia enkuadramentu ba-iha polítika no prioridade sira Timor Leste nian, nune'e mós atu kumpri responsabilidade sira ne'ebé simu ona. Ho objetivu atu estabelese padraun ida kona-ba tratamentu ba entidade boot sira no prosedimentu sira ne'ebé iha hodi asegura dignifikasaun ba entidade sira, merese fó atensaun ba kontinuidade ba prosesu finalizasaun Lei Presedénsia Protokolu Estadu nian.

infomasaun klaru bele loke ou Kli'ik ida ne'e http://timor-leste.gov.tl/?cat=39&lang=tp Banku Sentrál de Timor-Leste Autoridade Nasionál Petróleo MAE (Ministériu Administrasaun Estatál) Ministériu Finansa Ministériu Justisa Sekretaria Estadu Arte no Kultura CPLP – Komunidade País sira Língua Portugeza ASEAN – Asosiasaun Nasoens Sudeste Aziátiku nian Arkivu & Muzeu Rezisténsia Timorense KAK – Komisaun Anti-Korupsaun Portál Transparénsia Orsamentu Tribunal sira Timor-Leste nian Institutu Defeza Nasionál Portál Transparénsia Ajuda Externa Portal Aprovizionamentu Portál Rezultadu Governu

https://youtu.be/nPM_d8l5cVc