quarta-feira, 29 de janeiro de 2014

Fini Fehuk Ropa Kontentor Lima Dodok, FSG : Tenke Investiga

Diretor Farming Study Group (FSG), Remigio Laka Vieira, husu atu halo investigasaun ba fini fehuk ropa kontentor lima ne’ebe husik dodok deit iha Portu Dili.

Tanba tuir nia, ne’e gasta saugati deit osan povu nian, enkuantu povu balun desaraska kona ba fini nian.  “Presiza investiga klean, tanba ita labele hola fini mai depois dodok fali ,” Diretor FSG Remigio Laka sujere, via telephone.

Nia hateten, orsamentu ne’ebe mak  aloka ba Ministeriu Agrikultura no Peskas (MAP) sosa fini hamutuk $3 milioens, fini balun sosa no fahe ona ba iha distritus.

Nia hateten,tipu fini ne’ebe mak sosa mak hanesan batar ,hare, kanko  no tomate no kompania Fini ba Moris ba kaer projetu ne’e.

Lolos ne’e nia dehan, governu la presiza ona sosa fini husi rai liur, tanba fini iha rai laran mos barak ona.

Iha sorin seluk membru Komisaun D (ekonomia no eezenvolvementu), Deputada Brigida Antonia Correia, rekonese no lamentavel tanba governu husik dodok deit fini kontentor lima ne’e.

“Hau sei lembra iha momentu ami halo diskusaun osan $3 milioens atu sosa  fini, maibe agora dadauk realidade ita hotu akompanha katak fini fehuk ropa ne’ebe mak sosa estraga iha kontentor lima,” Deputada ne’e preokupa.

Coreia hateten, tuir deskrisaun ne’ebe mak Komisaun D hetan husi MAP, katak total fini ne’ebe mak sira sosa hamutuk toneladas 170 ho montante $525,000.

Kona ba fini dodok iha Portu Dili ne’e, nia diskunfia karik tanba sistema birokrasia iha Alfandega atraza mak halo fini fehuk ropa kontentor lima ne’e husik to’o dodok deit.

Entretantu Deputada Virginia Ana Belo, sente triste tanba OJE 2013 nian ho montante $3 milioens hodi sosa fini no fini dodok deit iha Portu Dili.

“Ita mai iha Portu ne’eba sasan sira ne’e dodok no dois hotu tiha ona, ita la’o iha Portu nia oin horon nia iis loos, ita bele desmaia,” Deputada Ana Belo hateten.

Deputada ne’e, dehan fini la’os kontentor lima deit mak sai dodok, maibe kontentor barak tanba ne’e nia husu proposta OJE 2014 nian ne’ebe atu sosa tan fini, tenke haree didiak.

Sem comentários:

Enviar um comentário