quarta-feira, 29 de janeiro de 2014

Estadu Tenke Konsidera CPD-RDTL Sai Inspirador Dez.Nasional


Reprezentante Sosiedade Sivil, Remigio Laka Vieira sujere ba estadu atu labele hanoin negative ba servisu membru CPD-RDTL nian, maibe tenke hare sira hanesan ajente ida ne’e sai inspirador ba dezenvolvementu nasional.

Laka ne’ebe durante ne’e involve aan iha luta hodi kombate kiak no mukit iha rai laran, hateten saida mak membru Conselhu Popular Demokratika Republika Demokratika de Timor-Leste (CPD-RDTL) halo durante ne’e (Same), estadu tenke iha hanoin pozitivu ba sira.

“Ita nia nia maluk sira CPD-RDTL ne’ebe halo iha Welalu-Same no mos ba iha Beaco inklui fatin sira seluk baa mi sosiedade sivil, ami hare sira nia atividade ne’e diak tebes no sai hanesan barometru ida,”  Reprezentante Sosiedade Sivil ne’e dehan, iha Parlamentu Nasional.

Tanba tuir nia, maske sira (CPD-RDTL) la hetan apoia husi governu maibe sira bele mobilize ema hodi halo natar no to’os iha Welalahu no ikus mai hetan rezultadu diak.

“Ne’ebe hau dehan, ema ne’ebe osan laiha nia valor bo’ot liu duke ema iha osan maibe la hasa’e produsaun no laiha valor,” Laka kritika.

Nia parte fo apresia ba servisu CPD-RDTL nian iha Welaluhu tanba maske sira osan limitadu maibe konsege halo natar ho to’os ne’ebe agora hetan produsaun sa’e maka’as.

“Hanesan mos ami, foin dadauk ami halo natar iha Suai inklui kolam ikan 22, ami osan laiha, maibe ikus mai hetan rezultadu diak no Sekretariu Estadu Peska ba panen tiha,” Laka dehan.

Tanba tuir nia, problema la’os tanba osan barak ka oituan maibe importante mak spiritu servisu ema nian.

Iha parte seluk Deputadu Aurelio Freitas Ribeiro apresia tanba kooperativa ne’e hetan rezultradu diak.

“Agora dadauk hau seidauk hatene lolos,depois sira koa tiha ne’e, nia produsaun ne’e to’o hira ne’e ita seidauk hatene,” Deputadu Ribeiro katak.

Nia dehan, kooperativa ida ne’e diak maibe diak liu tan ida-idak tenke fila ba sira nia knua mak halo politika ida ne’e, depois husu ba governu atu suporta.

Deputadu ne’e mos husu ba governu, atu halo kontratu ho CPD-RDTL sira atu nune’e sira nia kolen labele saugate deit.

Entretantu Administrador Interino Manufahi ,Adao Mendes informa katak,kooperativa CPD-RDTL halo iha Welaluhu koileta tiha ona.

“Sira nia haree ne’e foin lalais Administrador Sub-distritu Fatuberliu mak organiza ema hodi ba koileta no agora hotu tiha ona,” Administrador Mendes ne’e katak.

Nia dehan, oras ne’e dadauk CPD-RDTL fo fiar hela ba ema nain lima iha fatin ne’eba mak atu tau matan hela.

“Hodi hein ba oin atu halo nusa,fo ba ema kbi’it la’ek sira ga fa’an ba Ministeriu Komersiu ga ita hein deit,,” Administrador Mendes katak.

Sem comentários:

Enviar um comentário